IGIHE

Misiri: Abanyarwanda bibutse abazize Jenoside yakorewe Abatutsi mu 1994

0 14-05-2022 - saa 18:30, IGIHE

Abanyarwanda baba mu Misiri bibutse ku nshuro ya 28 Jenoside yakorewe Abatutsi mu 1994. Iki gikorwa cyabereye i Cairo mu Murwa Mukuru wa Misiri kuwa 13 Gicurasi 2022.

Cyaranzwe n’ibiganiro biganisha ku mateka yaranze u Rwanda kugeza kuri Jenoside yakorewe Abatutsi muri 1994, ndetse n’uko igihugu cyayigobotoye kikongera kwiyubaka mu ngeri zose.

Abatanze ibiganiro bagaragaje kandi ko Abanyarwanda muri rusange n’urubyiruko by’umwihariko, bafite inshingano zo kwigira ku mateka no kubungabunga ubumwe bw’Abanyarwanda barwanya icyaha cy’ingengabitekerezo ya Jenoside n’ibyaha bifitanye isano na yo; banakangurirwa guhangana n’abashaka guhakana no gupfobya Jenoside yakorewe Abatutsi mu 1994, cyane cyane hifashishijwe imbuga nkoranyambaga.

Mu butumwa yageneye abitabiriye iki gikorwa, Ambasaderi w’u Rwanda mu Misiri, Alfred Kalisa, yibukije abitabiriye ko intego igihugu cyihaye yo kuba umwe igomba kubaranga aho bari hose no kwigira ku mateka yaranze igihugu cyacu.

Yasabye urubyiruko kubyaza amahirwe igihugu cyabahaye no gukomeza kurinda ibyagezweho dore ko ari rwo bayobozi b’ejo hazaza.

Yarusabye kandi gusura inzibutso za Jenoside rukiga amateka yaranze igihugu dore ko benshi mu rubyiruko bavutse nyuma ya Jenoside.

Ambasaderi Kalisa yasoje yihanganisha abiciwe ababo muri Jenoside abasaba gukomera ndetse asaba n’abitabiriye iki gikorwa gukomeza kubaba hafi.

Ambasaderi w’u Rwanda mu Misiri, Alfred Kalisa, acana urumuri rw'icyizere
Urubyiruko rwasabwe gusura inzibutso za Jenoside yakorewe Abatutsi kugira ngo rurusheho kumenya amateka y'igihugu cyarwo
Ibiganiro byatanzwe byagarutse ku kurwanya abapfobya Jenoside yakorewe Abatutsi bifashishije imbuga nkoranyambaga
Uyu muhango wari witabiriwe n'abanyarwanda hamwe n'inshuti zabo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza