IGIHE

Uko wakwita ku bimera byifashishwa nk’imitako mu ngo

0 19-05-2022 - saa 09:37, Uwase Divine

Ni kenshi uzagera ahantu ugasanga mu nzu hari ibimera bihatatse, birashoboka ko na we waba ubikunda cyane ndetse wizihirwa no kubihozaho ijisho ariko ukaba wibaza uburyo bwiza bwo kubyitaho.

Ibi bimera bikoreshwa ahantu hatandukanye nk’imitako mu nzu, hanze, mu bukwe n’ahandi bikunze kwitwa ’Succulent’. Ibi bimera ntibikunze gukenera amazi menshi kuko bibika amazi bigakunda n’izuba. Muri iyi nkuru turagaruka ku byo wakora kugira ngo bihore bitoshye ntibyangirike.

Ikintu cya mbere wakorera ibimera byo hanze mu busitani cyangwa ku mbaraza z’inzu, ni ukubishyira ahantu hari izuba rihagije nibura amasaha atandatu ku munsi igihe izuba ricanye cyane. Ibyo mu nzu ubishyira ku idirishya bikahafatira ubushyuhe.

Ibi bimera bikenera ingano y’amazi itandukanye bitewe n’ibihe. Mu gihe cyo kuhira ugerageza kubiha amazi aringaniye kugira ngo bikure neza, imizi ibone umwanya wo gukamukamo amazi.

­Mu gihe cy’ubukonje n’icy’imvura ibi bimera birekera gukura, bityo bikenera amazi make. Kuhira cyane ubutaka bw’ibimera ni kimwe mu bituma bikura nabi. Ni byiza kwigengesera ukuhira aho biri ngombwa gusa.

Ku bimera byo hanze hakenerwa ubutaka butoshye hamwe n’ivaze ifite imyenge hasi kugira ngo amazi atakiri ngombwa abone aho asohokera bityo imizi ikabona ubuhumekero ndetse bikarinda ibimera kubora.

Niba ufite ibimera byo mu nzu ni byiza ko wakoresha ubutaka bworohereye, butabika amazi buzwi nka ‘Coarse’ kuko bwinjiza umwuka uhagije mu kimera bigatuma kituma. Ni byiza gufumbira ibimera byawe iminsi mike mu mwaka kugira ngo byongere imbaraga zo gukura. Ntabwo ari ngombwa gushyiramo ifumbire kereka mu gihe ubutaka buyikeneye.

Kwita ku bimera byawe birafasha, cyane ibyo mu nzu bikunze guhura n’ikibazo cy’udukoko kurusha ibyo hanze. Utu dukoko tuba twerekana ko ibimera byawe birimo amazi menshi cyangwa ifumbire nyinshi.

Udukoko twitwa ‘Mealybugs’ tunywa umutobe uva mu kimera kandi tugatera n’amagi menshi cyane tukabyangiza. Gutera imiti yabugenewe ni ingenzi kugira ngo utwo dukoko dupfe n’amagi yatwo yangirike. Mu gihe uguze ikimera cya succulent kikiri gito, ni byiza ko ureba neza utaba uguze ikirimo udukoko.

Ibi bimera bikunda gutakwa mu ngo yaba mu nzu no hanze
Ibi bimera bikunda gukoreshwa mu bukwe
Ibi ni ibimera bataka hanze
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza