Umunya-Ethiopia Tadesse Ghichile yatunguye benshi ubwo ku myaka 69 yafataga icyemezo cyo gutangira amasomo ya Kaminuza mu bijyanye n’Ubuganga.

Uyu mugabo ufite abana 11 yavuze ko yafashe iki cyemezo kuko yahoranaga ipfunwe ryo kuba atararangije kaminuza bitewe n’uko yabaye impfubyi akiri muto bikamuviramo gucikiriza amashuri.

Mu myaka 10 ishize ni bwo Tadesse Ghichile yafashe icyemezo cyo gusubukura amasomo ye kuko yari yayahagarikiye mu mwaka wa munani kubera kubura ubushobozi.

Ubu yamaze gutsinda ikizamini kimwinjiza muri kaminuza ndetse yujuje ibisabwa byose kugira ngo atangire amasomo ye muri Jimma University, iherereye mu Burengerazuba bwa Ethiopia.

Mu kiganiro yagiranye na BBC yavuze ko afite icyizere gikomeye cy’uko mu myaka mike iri imbere azaba arangije amasomo ye mu bijyanye n’ubuganga.

Yemeza ko kuba ageze kuri iyo ntambwe uyu munsi abikesha bagenzi be biganye bagiye bamuba hafi ndetse ntibamuce intege kuko ari kwiga akuze.

Tadesse Ghichile akomeje gutangaza benshi kubera icyemezo yafashe cyo gutangira kwiga kaminuza ku myaka 69