IGIHE

Byinshi kuri ‘Ndrangheta’, agatsiko k’amabandi kinjiza amafaranga aruta ay’ibihugu byinshi

0 26-06-2022 - saa 08:00, Muyisenge Jean Felix

Bimwe mu bikubiye mu nyandiko z’amabanga y’ibihugu yashyizwe hanze n’ikinyamakuru WikiLeaks muri 2011, harimo amagambo yatangajwe n’umwe mu bayobozi bakuru ba Amerika avuga ko iyo intara ya Calabria itaza kuba igice cy’u Butaliyani, yari kuba igihugu kidashobotse.

Aya magambo yayashingiye ku buryo iyi ntara yashegeshwe na ruswa no kutagendera ku mategeko ahanani bitewe n’udutsiko tw’amabandi azwi nka ‘mafia’ twibumbiye mu mutwe wa “Ndrangheta”.

Ndrangheta iri mu miryango ikora ibikorwa bitemewe n’amategeko ya mbere ikomeye ku Isi, aho yinjiza akayabo mu bikorwa byo gucuruza ibiyobyabwenge, magendu, kwambura abantu, kunyereza imisoro, gushimuta abantu n’ibintu, gucuruza abantu n’ibindi.

Kimwe mu bikorwa byamamaye ni mu 1970 ubwo bashimutaga umwuzukuru wa John Paul Getty, umuherwe w’umunyamerika wamenyekaniye mu bucuruzi bw’ ibikomoka kuri peteroli.

Icyo giye ingurane ya miliyoni 2$ yatanzwe ngo uyu mwana arekurwe, yafashije Ndrangheta kwagura ibikorwa by’ubucuruzi bw’ibiyobyabwenge.

Iri tsinda ryatangiriye muri Calabria, nyuma rigenda rikwirakwira mu bice binyuranye ku Isi, ku buryo kugeza ubu Ndrangheta yinjiza asaga miliyari 60$ buri mwaka nk’uko ubushakashatsi bwakozwe n’ikigo Demoskopika research institute muri 2014 bubyerekana.

Ibi bisobanuye ko bafite umusaruro mbumbe uruta uw’ibihugu nka Uruguay, Jordan, Libn,C roatia n’ibindi byinshi.

Imvo n’imvano ya Ndrangheta ntivugwaho rumwe

Inzobere zemeza ko Ndrangheta n’indi mitwe y’aba Mafia ikomoka m’u Butaliyani nka Cosa Nostras na Comorra, yagiye ivuka igamije kurengera abaturage ba rubanda bugufi batotezwaga n’abakire mu gihe ubuyobozi burebera.

Mu myaka ya 1850 intara ya Calabria kimwe n’ibindi bice byo mu magepfo y’u Butaliyani yagiye irangwa n’ubuyobozi bubi bwatereranye rubanda rugufi batozwaga n’abakire, ibi byatumye aba baturajye biganjemo abahinzi bagana udutsiko tw’abantu batinyinyitse muri sosiyete kugira ngo babacungire umutekano.

Utu dutsiko ni two twagiye twaguka haza no kuvamo iyi miryango izwi nka mafia harimo na Ndrangheta.

Ijambo Ndrangheta rikomoka mu Kigereki risobanura Sosiyete y’Abagabo b’Icyubahiro.

Ndrangheta igizwe n’ibice bibiri harimo igice cy’ubuyobozi bukuru cyitwa ‘Mandamenti’ ari nacyo gikuriye andi matsinda akorera mu bice bitandukanye yitwa ‘Ndrina’ aba agizwe n’abanyamuryango basaga 50.

Kugira ngo winjire muri uyu muryango bisaba ko uba ukomoka kuri umwe mu banyamuryango, ugaca no mu muhango wo kurahirira kudahemukira umuryango, aho urahira ufite ifoto y’umutagatifu iri kwaka inuzuyeho amaraso yawe.

Nyuma y’intambara ya kabiri y’Isi abaturage basaga miliyoni bahunze Calabria harimo n’abanyamuryango ba mafia bimukiye mu bice bitandukanye by’u Butaliyani n’ahandi ku Isi cyane muri Amerika maze bituma imitwe y’aba mafia yagukira mu bindi bihugu.

Kugeza ubu Ndrangheta ikorera mu bihugu 31, ikaba ari na wo muryango w’aba-mafia ukorera kuri buri mugabane ugize Isi ibintu ari nabyo biwugira umutwe ukomeye kuruta iyindi yose ikomoko mu Butalayini. Kimwe mu bihugu wiganjemo cyane harimo Canada, by’umwihariko umujyi wa Toronto.

Umwe mu bahoze ari abayobozi b’uyu mutwe, Giuseppe Costa yabwiye The Star ko Canada idafite amategeko ahana imitwe nk’iyi ya mafia nk’ayo mu Butaliyani, ibintu bisiga icyuho cyemerera Ndrangheta gukwira muri Canada nk’uko yabigenje muri Calabria.

Uyu mugabo kandi yanatangaje ko uyu mutwe woroherejwe gukwira mu Burayi bitewe n’icyuho mu mategeko agenga ibi bihugu.

Muri 2007 nibwo bwa mbere Ndrangheta yagaragaye ku ruhando mpuzamahanga ubwo abantu batandatu bo mu kandi gatsiko bahanganye barasiwe imbere y’iduka rya Pizza mu Mujyi wo mu Budage witwa Duisbag.

Muri 2010 Leta y’u Butaliyani yashyize umutwe wa Ndrangheta ku rutonde rw’imiryango ya mafia.

Muri 2020 polisi mpuzamahanga, Interpol yatangije gahunda yiswe International Cooperation Against the’ Ndrangheta (I-CAN) igamije guca intege uyu mutwe ku Isi hose.

Calabria iri mu majyepfo y'u Butaliyani niho Ndrangheta yatangiriye
Bamwe mu banyamuryango ba Ndrangheta batawe muri yombi muri 2021
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza