IGIHE

UR yasabwe kugana Umuvunyi kuri miliyoni 70 Frw bikekwa ko zanyerejwe n’abakozi bayo bakayagabana

3 11-09-2019 - saa 16:23, Ferdinand Maniraguha

Kaminuza y’u Rwanda yagiriwe inama yo kugana urwego rw’Umuvunyi kugira ngo irenganurwe ku rubanza yarezemo abakozi bayo bakekwaho kunyereza miliyoni zisaga 70 Frw, bajyanwa mu nkiko bakagirwa abere.

Mu 2014 muri Kaminuza y’u Rwanda, Ishami ry’Uburezi rikorera i Rukara hatanzwe isoko ryo gukora inyigo no kubaka uruzitiro rw’iryo shami.

Isoko ryatanzwe kuri miliyoni 404 Frw, ritsindirwa na sosiyete Good Supply Company ya Ndangizi John.

Hashize iminsi, akanama gashinzwe amasoko muri iryo shami kayobowe na Nsabimana Jean Marie Vianney wari ushinzwe imitangire y’amasoko kahinduye ibyari mu nyandiko z’ipiganwa, amafaranga yagombaga kwishyurwa rwiyemezamirimo arongerwa aba miliyoni 471 Frw.

Raporo y’Umugenzuzi w’Imari ya Leta yo mu 2017/2018 igaragaza ko habayemo amakosa kuko hatagaragazwa icyatumye ayo mafaranga yongerwa, bikaba byarateje Leta igihombo.

Ubwo ubuyobozi bwa Kaminuza y’u Rwanda bwitabaga Komisiyo ishinzwe imikoreshereze y’umutungo wa Leta mu Nteko Ishinga Amategeko, (PAC) kuri uyu wa Gatatu, bwavuze ko Kaminuza yareze ababigizemo uruhare ariko inkiko zibagira abere.

Umuyobozi ushinzwe ibikorwa mu ishami rya Kaminuza y’u Rwanda i Rukara, Nkuranga Jean Pierre yavuze ko inzira zose bashoboraga gukoresha ngo amafaranga ya Leta agaruzwe bwarangiye.

Ati “Bigaragara ko bafatanyije ndetse mu bimenyetso byagaragajwe n’ubushinjacyaha bigaragara ko ariya mafaranga bayagabanye. Bimaze kugaragara abo bantu barakurikiranywe mu nkiko. Ku rwego rwa mbere icyaha cyarabahamye ndetse bategekwa ko ayo mafaranga bagomba kuyishyura, rwiyemezamirimo we yahise yishyuramo miliyoni zigera kuri 20 Frw.”

Yongeyeho ati “Habayeho kujurira, uwajuriye bwa mbere ni uwari ukuriye gutanga amasoko, urukiko rumugira umwere. Ruvuga ko ibimenyetso bya mbere urukiko rwashingiyeho bitamuhama ndetse ko n’amafaranga yagombaga kwishyura atagomba kuyishyura, na rwiyemezamirimo bituma ajurira agirwa umwere ndetse ruvuga ko ibyo urukiko rwa mbere rwemeje bikuweho.”

Nyuma yo gutsinda mu bujurire, Kaminuza y’u Rwanda ivuga ko nta yandi mahitamo bafite ndetse n’ubushinjacyaha bwagaragaje ko ntako butagize bugatsindwa kandi ibimenyetso bihari.

Depite Uwineza Beline yavuze ko bidashoboka ko abantu barya amafaranga ya Leta ngo bigarukire aho kandi ibimenyetso bihari.

Ati “Ntabwo wakora guhindura inyandiko ngo bigarukire aho ngaho. Abantu baricara bagahindura inyandiko z’ipiganwa? Abantu baratinyuka bakariha amafaranga arenze ayagombaga kurihwa agera kuri miliyoni 70 avuye ku mutungo wa Leta atari ayo ku mifuka yabo ?”

Depite Uwimanimpaye Jeanne d’Arc, yagiriye inama Kaminuza y’u Rwanda ko yagana urwego rw’Umuvunyi, rugasuzuma niba hari akarengane kabaye mu rubanza, rwasanga aribyo rugasubirwamo.

Ati “Ndabagira inama ko bajya no ku Muvunyi. Twatoye itegeko dusaba ko mu gihe umuntu yumva ko hari akarengane kari mu rubanza nubwo inkiko zaba zabirangije ufite ibindi bimenyetso Umuvunyi asaba urukiko rw’ikirenga bakabisubiramo. Numva ibi bintu muzi ko bagabanye mwabihereza n’Umuvunyi.”

Itegeko No 30/2018 ryo kuwa 2/6/2018 rigena ububasha bw’inkiko ryaje rihindura inzira zifashishwaga n’abaturage mu kujuririra Umuvunyi ku manza batsinzwe.

Ubusanzwe umuntu wifuza gusubirishamo urubanza ku mpamvu z’akarengane, yandikira Perezida w’Urukiko rwisumbuye ku rwaciye urwo rubanza.Ibyo bikorwa mu gihe kitarenze iminsi 30 urubanza ruciwe.

Mu gihe Perezida w’urukiko rwisumbuye asanze urubanza rugomba gusubirwamo, yandikira Perezida w’Urukiko rw’Ikirenga asaba ko rusubirwamo, igisubizo kikaboneka bitarenze amezi atatu.

Nyuma yo gusubizwa na Perezida w’Urukiko, nibwo umuntu aba yemerewe kwandikira Umuvunyi asaba gusubirishamo urubanza nabwo akabikora bitarenze iminsi 30 ahawe igisubizo na Perezida w’Urukiko.

Abadepite bagize PAC bagiriye inama UR yo kugana Urwego rw'Umuvunyi
Bamwe mu bayobozi ba UR bari bitabye PAC
Amafaranga bivugwa ko yanyerejwe ku isoko ryo kubaka uruzitiro rw'ishami rya Rukara
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
sewabo 2019-09-11 13:19:02

Ariko murasetsa cyane: ntimujya mwumva Umuyobozi wa Transparency Rwanda avuga ko ruswa itazacika igihe ikigaragara mu bacamanza?? None se ko aribo batanga ubutabera kandi bakaba bitwa "Lords"(bivuga "Nyagasani" mu Kinyarwanda), murabona tuzakira dute kandi abo bantu ari abacancuro ( abarya-ruswa)??
Ndabona nabwo bukwiye kwitwa "ubucamanza" aho kuba "ubutabera"rwose!! Kandi barahemuka cyaneee rwose

2
Biziraguteba Kayibanda 2019-09-11 11:13:47

Sinumva ukuntu icyaha kitahamye abo Bantu ??? Ubundi guhindura ibyari bigize igitabo cy ipiganwa ntabwo byemewe ahubwo hakorwa inyandiko yinyongera isobanura ibyahindutse mu masezerano cyangwa ibyari biteganyijwe gukorwa mbere , ibyo byemerwa gusa iyo agaciro Kabyo katarenga 20% y igiciro cy isoko , ndahamya ko ntakanama gashinzwe amasoko katazi ibyo. Ikibazo gishobora kuba kiri mukuzamura ayo frw hatagaragara impamvu, icyo gihe bagombaga gushaka umugenagaciro akabara akareba niba ayo frw ajyanye nibyakozwe, mbere yo kwemeza ko batanze isoko bidaciye mumucyo

3
che 2019-09-11 10:11:41

Hari ibyo usoma ukibaza niba uriho urarota! Mumbwire ukuntu ruswa izacika mu gihe case nkiyi yivugira ubwayo inanirana abayanyereje bakagirwa abere? Ibi byerekana ko iyo unyereje menshi urushaho kuba umwere, tugira inzego zirwanya ruswa ariko so far ziracyatinya ibifi binini, cyanke ugasaga nabo byaraguze!

Kwamamaza