Umwarimu w’Umufaransa yanditse igitabo kiva imuzi amateka ya Jenoside yakorewe Abatutsi

10 14-09-2018 - saa 10:28, Ferdinand Maniraguha

Umwarimu ukomoka mu Bufaransa akaba n’Umushakashatsi, Florent Piton, yasohoye igitabo ‘Le Génocide des Tutsi du Rwanda’ gisobanura byimbitse amateka ya Jenoside yakorewe Abatutsi mu 1994.

Ni igitabo yamuritse ku mugoroba wo kuri uyu wa Kane tariki 13 Nzeri 2018 ku biro bya Komisiyo y’Igihugu ishinzwe kurwanya Jenoside (CNLG).

Piton agaragazamo umuzi w’ivanguramoko wabibwe mu myaka ya 1890, wuhirwa n’abakoloni usigasirwa na Repubulika ya Mbere n’iya Kabiri kugeza Jenoside nyir’izina ibaye.

Ni igitabo yanditse mu myaka itanu, gifite paji 248. Gikubiyemo amateka y’u Rwanda, uko Jenoside yateguwe igashyirwa mu bikorwa n’ingaruka yateye kugeza mu 2018.

Piton avuga ko akurikije ivanguramoko ryabaye mbere ya Jenoside, nk’umushakashatsi, ntaho bihuriye n’abavuga ko Jenoside yatewe n’ihanurwa ry’indege yari itwaye Perezida Juvenal Habyarimana.

Avuga ko iki gitabo kije gukuraho urujijo benshi mu banyaburayi bafite, aho bashaka guhuza Jenoside yakorewe Abatutsi n’intambara y’amoko mu gihe yakozwe na Leta, igisirikare na bamwe mu baturage b’abahutu.

Yavuze kandi ko intego yari ukurimbura umututsi aho ari hose ku Isi. Agaragazamo uruhare rw’Abarundi bari barahungiye mu Rwanda ndetse n’amagambo ya bamwe mu banyapilitiki b’icyo gihe yashimangiraga urwango ku batutsi.

Piton usanzwe ari umwarimu muri Kaminuza ya Paris Diderot, yerekana n’uruhare rw’u Bufaransa muri Jenoside ndetse no gutsindwa gukomeye k’Umuryango Mpuzamahanga.

Yanditse iki gitabo agamije kurwanya abahakana bakanapfobya Jenoside yakorewe abatutsi no gufasha benshi bakiri mu rujijo ku mateka y’u Rwanda.

Ati “Mu Bufaransa hari ihakana n’ipfobya bikomeye mu bakoze Jenoside bahahungiye. Hari kandi n’ubujiji ku bijyanye na Jenoside yakorewe Abatutsi. Ni iby’agaciro nk’umwanditsi w’Umufaransa kwandika igitabo nk’iki mu gifaransa. Nizeye ko kizakirwa neza.”

Umunyamabanga Mukuru wa CNLG, Dr Bizimana Jean Damascène, yavuze ko ari umusanzu ukomeye kuba igitabo kivuga amateka ya Jenoside yakorewe Abatutsi cyanditwe n’umunyamahanga ukiri muto.

Piton mu gitabo cye avuga mo ubwicanyi ndengakamere bwakozwe muri Jenoside n’uko bwakozwe ndetse n’ababukoze, igice cya nyuma kikagaruka ku ngaruka za Jenoside, ubutabera, kwibuka n’imibereho y’abarokotse.

Igitabo ‘Le Génocide des Tutsi du Rwanda’ mu Rwanda kiboneka muri Librairie Ikirezi, aho kigura amayero 18 (asaga gato 18000 Frw).

Piton yizeye ko igitabo cye ari umusanzu ku batazi amateka y'u Rwanda
Senateri Antoine Mugesera atanga igitekerezo ubwo Piton yamurikaga igitabo cye
Iki gitabo kiraboneka mu Rwanda muri Librairie Ikirezi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Nkusi 2018-09-15 05:34:27

Iki gitabo baba byiza cyane gishyizwe no mu kinyarwanda ni cyongerrza

2
Olivier Munezero 2018-09-14 12:55:16

Nishimiye ubu butwari bw’uyu mu Faransa Piton mukwandi igitabo kivuga neza kuri genoside yakorewe abatutsi. Nibazaga niba icyo gitabo kiri mururimi rwi gifaransa gusa? Niba aribyo nifuzagako mwadufasha kigashirwa muzindi ndimi nk’ikinyarwanda hamwe n’icyongereza kuko ayamateka akenewe kumenywa n’urubyiruko cyane cyane kandi imbogamizi nuko benshi muri rwo batumva neza ururimi rw’igifaransa. Ikindi nibazaga nibahari soft zacyo, niba ntazo nabisabaga nabyo bakabyigaho bigakorwa.

Murakoze.

3
Habineza 2018-09-14 09:17:16

Ku byerekeye genocide ibyo Damasene bizimana n’abandi benshi yatugejejeho birahagije iyo hiyongeyeho ibyo buli muyarwanda yiyiziye.Nali ngiye kuvuga ngo iyo azana ku bitabo byo muli kaminuza yigishamo bigoranye kuboneka kubera amikoro nabwo ntacyo byamara mu rwanda igifransa cyataye agaciro.Igitabo cye rero nagisubizeyo isoko bararimutanze.

4
Habineza 2018-09-14 09:17:13

Ku byerekeye genocide ibyo Damasene bizimana n’abandi benshi yatugejejeho birahagije iyo hiyongeyeho ibyo buli muyarwanda yiyiziye.Nali ngiye kuvuga ngo iyo azana ku bitabo byo muli kaminuza yigishamo bigoranye kuboneka kubera amikoro nabwo ntacyo byamara mu rwanda igifransa cyataye agaciro.Igitabo cye rero nagisubizeyo isoko bararimutanze.

5
@Twahirwa 2018-09-14 07:06:07

Ni byiza kumenyekanisha ukuri Ku mateka.

6
Nadine 2018-09-14 07:04:54

kirimo iki se uretse politiki gusa. Jenoside yo mu Rwanda se ahubwo ayiziho ki. U Rwanda se aruzi guhera ryari ngo abone uko yandika kuri jenoside yahabereye. Cyeretse niba yanditsemo ko nawe ari mubayiteguye byo byakumvikana. naho ubundi ibyo byose ni "brabra"

7
@Twahirwa 2018-09-14 06:49:56

Ni byiza cyane kumenyekanisha ukuri.

8
Emile HAGENIMANA 2018-09-14 06:23:00

Kuba iki gitabo cyanditswe n’ umufaransa biratuma ubutegetsi bw ’ ubufaransa bwumva uruhare bwabwo muri génocide ya korewe abatutsi babyemejwe na bene wabo bigacogoza babandi bintagondwa

9
didi 2018-09-14 04:47:47

muzagerageze nokugishyira my kinyarwanda kizaba mufashije Ben ci knd muzaba mukoze

10
nzirabatinyijohn cyizamichel 2018-09-14 03:49:30

Ndumva noneho aje kuducuruzamo, amateka yacu turayazi nabanze akangurire abafaransa gusaba imbabazi naho kudusahura amafaranga nukudusonga. Ubonye iyo azana ibitabo avuga ngo haribyo nageneye abanyeshuri ba kaminuza na secondaire ibisigaye bigurwe naho yabishakiye aho bigurirwa? Ubukoroni we murecyere aho kudusonga mwa bavandimwe mwe muri Kristo.

Kwamamaza