IGIHE

Umuyobozi wa BK Plc yavuze ibanga u Rwanda rukoresha mu kureshya abashoramari

0 12-07-2019 - saa 08:17, Iradukunda Serge

Umuyobozi wa Banki ya Kigali Plc, Dr Diane Karusisi, yavuze ko u Rwanda rwakoze byinshi mu korohereza ishoramari birimo gufasha abashoramari, gushyiraho amategeko aborohereza no kwirinda impinduka za hato na hato.

Yabigarutseho mu kiganiro yagiranye na televiziyo ya CNBC Africa, nyuma y’inama y’iminsi ibiri y’Inteko rusange y’abanyamigabane ba Africa50, Ikigega Nyafurika gitera inkunga imishinga y’ibikorwa remezo, u Rwanda narwo rubereye umunyamigabane.

Raporo ya Banki y’Isi ya ‘2019 World Bank Doing Business’, yashyize u Rwanda ku mwanya wa 29 ku Isi, mu gihe muri Afurika rwaje ku mwanya wa kabiri mu bihugu byorohereza ishoramari no ku mwanya wa mbere mu karere.

Dr Karusisi yabwiye CNBC Africa ko u Rwanda rwakoze byinshi kugira ngo rushyireho uburyo bubereye abashoramari kugira ngo bakore ubucuruzi bisanzuye.

Ati “Ndakeka RDB yavuze ibijyanye n’ukudahindagurika, ubufasha itanga ku bashoramari, ibijyanye n’amategeko ndetse n’ibijyanye no kuba umuntu yamenya icyerekezo ibintu biganamo, iki ni ikintu cy’ingenzi iyo ukora ubucuruzi kuko ntuba ushaka ko ibintu bihinduka bigutunguye”.

Yakomeje agira ati “Ndakeka igihugu cyacu ibi cyarabashije kubikora neza, nkaba nkeka ko ariyo mpamvu kibasha gukurura abashoramari ku rwego biriho uyu munsi”.

Amavugurura u Rwanda rwakoze arimo ivugurura mu mategeko y’ubucuruzi, mu bijyanye n’imisoro hakaba haraje ikoranabuhanga rigezweho nko gukoresha imashini ya EBM, kwihutisha imitangire y’ibyangombwa byo kubaka no gutanga inguzanyo mu buryo bwihuse.

U Rwanda nicyo gihugu cyonyine mu bikiri mu nzira y’amajyambere cyaje mu bihugu 30 bya mbere ku Isi mu koroshya ishoramari, kuko hafi ya 75% y’ibihugu 30 bya mbere ku Isi mu koroshya ishoramari usanga amafaranga nibura buri muturage yinjiza abarirwa mu bihumbi 12 by’amadorali ya Amerika, ni ukuvuga arenga miliyoni 10 mu mafaranga y’u Rwanda.

Ni mu gihe kandi imibare igaragaza ko umunyarwanda yinjiza nibura amadorali ya Amerika 720 ku mwaka.

Dr Karusisi yabwiye kandi abitabiriye iyi nama ko ibikorwa remezo ari umusingi mu guhuza abantu, uku guhuza abantu nabyo bikihutisha iterambere ry’ikoranabuhanga n’ubukungu.

Muri Nyakanga umwaka ushize nibwo u Rwanda rwasinye amasezerano arwinjiza mu banyamigabane ba ‘Africa50’, mu nama y’Inteko rusange yabereye i Nairobi.

Ikigega cya Africa50 kigizwe n’ibihugu 27 bya Afurika, Banki Nyafurika Itsura Amajyambere, Banki Nkuru y’ibihugu bya Afurika y’Iburengerazuba (BCEAO) na Bank Al-Maghrib, aho gifite imari shingiro irenga miliyoni $870.

Africa50 yashinzwe mu 2012 nk’inzira yo kwishakira ibisubizo kw’Abanyafurika mu bikorwa by’iterambere. Icyicaro cy’iki kigega kiba i Casablanca muri Maroc.

Umuyobozi wa BK Plc, Dr Diane Karusisi, yavuze ko hari byinshi u Rwanda rwakoze mu koroshya ishoramari
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza