IGIHE

Umuryango AEE Rwanda wahaye abana 2,337 ibikoresho n’amafaranga y’ishuri

5 12-01-2019 - saa 08:45, Akayezu Jean de Dieu

Umuryango Nyafurika w’Ivugabutumwa ukorera mu Rwanda (African Evangelic Enterprise- Kigali), wakoresheje miliyoni 170 Frw mu guha abana bagera ku 2337, biga mu mashuri abanza n’ayisumbuye ibikoresho by’ishuri n’amafaranga y’ishuri.

Ibikorwa byo gutanga ibi bikoresho biri gukorwa mu mirenge 10 yo mu Karere ka Gasabo, binyuze mu mushinga ugamije kwita ku bana b’abakobwa bari hagati y’imyaka 10 na 24, ‘Ubaka Ejo Dreams’ ugamije kurinda abangavu n’abagore bakiri bato kwandura virusi itera Sida.

Kuri uyu wa Gatanu mu Murenge wa Jabana mu Karere ka Gasabo nibwo abanyeshuri bahawe ibikoresho birimo amakaye, amakaramu n’ibindi bifasha mu myigire ndetse n’ibikoresho by’isuku umukobwa ugeze mu gihe cy’ubwangavu akenera.

Umuyobozi wa AEE ku rwego rw’Umujyi wa Kigali, Ev. Mabasi Albert yabwiye IGIHE ko AEE ari umuryango ukora ivugabutumwa mu magambo no mu bikorwa binyuzwa mu mishinga itandukanye.

Yavuze ko impamvu y’uyu mushinga uzamara imyaka itatu ugamije gufasha abana b’abakobwa kwirinda icyatuma bagwa mu bishuko byatuma batwara inda zitateganyijwe, cyangwa bagakurizamo ubwandu bushya bwa Sida.

Yakomeje agira ati “Turashaka kugira ngo umwana w’umukobwa tumurinde inzira zose zishobora kumujyana mu bishuko. Turanashimira umufatanyabikorwa wacu, USAID kuko ahanini ni we ugira uruhare muri ibi bikorwa.”

Ev. Mabasi akomeza avuga ko Ikigega cya Leta Zunze Ubumwe za Amerika gishinzwe iterambere mpuzamahanga (USAID), gikomeza kubaba hafi muri uru rugamba rwo kubaka umuryango Nyarwanda.

Umukozi w’Akarere ka Gasabo ushinzwe guhuza no gukurikirana ibikorwa by’abafatanyabikorwa, DJAF, Ntakabanoza Domina, yabwiye ababyeyi b’abana bafashijwe na AEE ko bakwiye kujya babashishikariza kwirinda ibishuko kandi bakabaganiriza ku mihindagurikire y’umubiri wabo.

Yashimiye abafatanyabikorwa bakomeje gutanga umusanzu mu kubaka umuryango Nyarwanda.

Yagize ati “Kubera ubuzima umwana w’umukobwa anyuramo ashobora kugwa mu bishuko bakamushukisha ibyo yabuze harimo ibikoresho by’ishuri n’utundi twamufasha. Icyo gihe rero iyo habayeho kubona umuntu nka AEE imuha ibyo bikoresho, tuba dufite icyizere ko uwo mwana w’umukobwa adashobora kugwa mu bishuko.”

Nyiranzanywahimana Francine wo mu Mudugudu wa Nyacyonga, Akagari ka Kamatamu mu Murenge wa Jabana, afite umwana ugiye mu mwaka wa gatandatu w’amashuri abanza.

Uyu mwana we amaze umwaka afashwa na AEE Rwanda.

Yavuze ko afite abana batatu barimo abakobwa babiri bimugora kubona ibikoresho nkenerwa uko bikwiye ariko kuri ubu yishimira ko umwe muri bo agiye kujya ahabwa ibikoresho by’ishuri.

Yagize ati “Mbikuye ku mutima wanjye Ndanezerewe! Nabonaga umwana ageze aho kwiga bihagarara, ariko ubu kuva batangira kumufasha ibikoresho arabibona, nta kibazo yiga neza, ntawe umusohora mu ishuri. Mbese mu myigire ye afite icyerekezo.”

Aba banyeshuri bafashijwe na AEE, ni 2,337 barimo abo mu mashuri abanza n’uburezi bw’ibanze bw’imyaka 12, bagera kuri 2407 na 70 bo mu biga mu bigo bicumbikira abanyeshuri.

Ubuyobozi bw’uyu Muryango bwatangaje ko hakoreshejwe asaga miliyoni 70.5Frw mu kugura ibikoresho by’aba banyeshuri ndetse na miliyoni 98.4Frw mu kwishyura amafaranga y’ishuri ku biga mu yisumbuye.

AEE Rwanda yatanze ibikoresho by'ishuri n'iby'isuku ku bana b'abakobwa bari mu mashuri abanza n'ayisumbuye
Ev. Mabasi Albert ashyigikiriza abana ibikoresho bagenewe na AEE
Ibikoresho by'isuku bikenerwa n'abakobwa bageze mu bwangavu
Umuryango AEE washyikirije abana bo mu Murenge wa Jabana, ibikoresho by'ishuri n'iby'isuku
Umushinga Dreams niwo wanyujijwemo iki gikorwa cyo gufasha abana b'abakobwa bari hagati y'imyaka 10 na 24
Umuyobozi wa AEE ku rwego rw’Umujyi wa Kigali, Ev. Mabasi Albert yasabye ababyeyi gufatanya n'uyu muryango mu gukumira ibishuko byakwibasira abana babo
Uyu mwana yashimye ubufasha bahabwa na AEE
Umukozi ushinzwe DJAF muri Gasabo, Ntakabanoza Domina yasabye ababyeyi kujya baganiriza abana babo babakangurira kwirinda ibishuko
Ababyeyi bari baje baherekeje abana babo
Ab'ingeri zose bari baje muri iki gikorwa cyo kwakira ibikoresho bagenewe na AEE
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Iteriteka christa 2019-01-25 14:12:51

Nang mumfash munshyire mu mushing wa AEE ntuy kabuga

2
Iteriteka christa 2019-01-25 14:12:51

Nang mumfash munshyire mu mushing wa AEE ntuy kabuga

3
mwaza 2019-01-12 09:56:09

murabeshya Cyane ayo mafranga NTABWO yagura utuntu nkutwo.nubwo mwavuze ngo haarimo school fees ariko wapi

4
Gasore 2019-01-12 06:44:33

Ntureba ahubwo! Amakuru nk’aya niyo aba akenewe AEE ibana ibahe umugisha. Ubundi ONG nk’izi nizo dukeneye kbs!

5
Serge 2019-01-12 01:35:40

Gasabo yonyine se kicukiro niryari

Kwamamaza