IGIHE

Umubano wihariye na Karegeya n’intandaro y’urunuka Wrong afitiye u Rwanda

0 31-07-2022 - saa 07:35, Musangwa Arthur

Kimwe mu bintu bikibazwaho kugeza n’ubu ni icyo Umwongerezakazi Michela Wrong yapfuye n’u Rwanda, ku buryo ahorana mu kanwa imvugo ziruvuga nabi, ndetse akaba ku ruhembe rw’abakwirakwiza ibitekerezo bigaragaza ko rukwiye gufatirwa ingamba zikomeye n’ibihugu by’ibihangage.

Michela Wrong ni umwe mu barwanyije bikomeye icyemezo cy’u Bwongereza cyo kohereza mu Rwanda abimukira binjiye muri icyo gihugu binyuranyije n’amategeko.

Yanijujutiye ibyemezo byinshi birimo itabwa muri yombi rya Rusesabagina wahamijwe ibyaha by’iterabwoba, ndetse ubu ari mu batiza umurindi imvugo z’uko u Rwanda arirwo rushyigikiye umutwe wa M23 muri Repubulika Iharanira Demokarasi ya Congo.

Abantu benshi batangiye kwibaza kuri uyu mugore mu 2021, ubwo yasohoraga igitabo yise ’Do Not Disturb: The Story of a Political Murder and an African Regime Gone Bad", kubera imvugo zo kwibasira u Rwanda n’Abanyarwanda zikirimo.

Kimwe mu bitangaje mu ntangiriro z’icyo gitabo, ni uburyo Michela Wrong ashyira Abanyarwanda bose mu gatebo kamwe, ko ari "ababeshyi" batagomba kwizerwa.

Ni nacyo ashingiraho avuga ko iby’u Rwanda ruvuga ku batavuga rumwe narwo atari byo, akongera akavuga ko muri kamere yabo, Abanyarwanda ari "abicanyi".

Imyitwarire y’uyu mugore itungura benshi, kuko mu busanzwe nta kintu gifatika apfa n’u Rwanda cyangwa abayobozi bacyo kigaragara.

Abanzi b’u Rwanda akenshi uzabasanga mu byiciro bine. Icya mbere ni icy’abasize bagize uruhare muri Jenoside yakorewe Abatutsi n’ababakomokaho bakomeje kugendera mu murongo wabo kubera ukutamenya ukuri, cyangwa se umutima winangiye.

Icya kabiri ni icy’abantu bari muri Leta yagize uruhare mu guhagarika Jenoside yakorewe Abatutsi ariko nyuma bakaza kunanirwa gukorana na yo, kubera impamvu zitandukanye.

Icyiciro cya gatatu ni icy’abanyamahanga bashyigikiye abantu bari mu byiciro bibiri twagarutseho hejuru kubera impamvu za politike cyangwa kutamenya ukuri ku mateka y’u Rwanda.

Icyiciro cya kane ni icy’abahisemo inzira yo kurwanya u Rwanda no kuruvuga nabi kuko babyishyurirwa, bityo bakabifata nk’akazi kabo ka buri munsi.

Biragoye gushyira Michela Wrong mu cyiciro cya gatatu kuko nta mpamvu ya politike igaragara aharanira, kuko ibyo akora bisa n’ikibazo bwite afitanye n’u Rwanda.

Michela Wrong avuka ku mubyeyi umwe w’Umutaliyani n’undi w’Umwongereza. Yakuriye i Londres mu Bwongereza.

Yize ibijyanye na ’Philosophy and Social Sciences’ muri Cambridge, ndetse afite impamyabumenyi mu by’itangazamakuru yakuye muri Kaminuza ya Cardiff.

Ahagana mu myaka ya 1980 nibwo yatangiye gukorera Ibiro Ntaramakuru by’Abongereza, Reuters, mu bihugu nk’u Butaliyani, u Bufaransa na Côte d’Ivoire.

Nyuma yaje guhitamo gukora nka nyakabyizi (Freelancer) ari nabwo buryo yabashije gutara amakuru kuri Jenoside yakorewe Abatutsi n’ibihe bya nyuma by’ubutegetsi bwa Perezida Mobutu wayoboraga Zaire. Muri icyo gihe yakoranaga na BBC ndetse na Reuters.

Ushingiye kuri ubu bunararibonye, Wrong si umuntu wahitamo kuvuga u Rwanda kubera ubujiji cyangwa kutamenya amateka, cyane ko hari n’ibindi bitabo yagiye yandika kuri politike y’akarere.

Abiterwa n’urupfu rw’inshuti ye Karegeya?

Nta gushidikanya ko Patrick Karegeya na Michela Wrong bashobora kuba baragiranye umubano urenze akazi.

Kimwe mu byatangaje abantu mu gitabo ’Do Not Disturb’ ni uburyo Michela Wrong avugamo uwo mugabo wahoze akuriye ubutasi mu Ngabo z’u Rwanda, wiciwe muri Afurika y’Epfo mu 2013.

Wrong avuga ko yamenyanye bwa mbere na Karegeya yamuhawe nk’umuntu ushobora kumufasha muri gahunda y’akazi yari afite mu Rwanda.

Gusa birashoboka ko yagiranye na Karegeya umubano udasanzwe kuko hari aho avuga ko bwa mbere abona uyu mugabo "byari bigoranye kwemera ko ari umusirikare kubera ukuntu yahoranaga inseko ku maso, ndetse akamenya kuganiriza neza igitsinagore."

Wrong yakomeje avuga ko "Karegeya yari umugabo ufite imiterere yatuma umugore wese agorwa no kumuva mu nzara".

Uyu mugore avuga ko ari mu ba mbere Karegeya yabwiye ko atangiye kugirana ibibazo na Leta y’u Rwanda, ku buryo hari n’igihe yageze i Kigali babiganiraho, ariko abona hafi y’aho baganirira hari abantu basa na ba maneko.

Na nyuma yo guhunga, Wrong avuga ko umubano we na Karegeya wakomeje kuko hari igihe yamusangaga muri Afurika y’Epfo.

Na nyuma y’urupfu rwe, Wrong avuga ko yasuye imva ye agashengurwa no kwibonera n’amaso ko Karegeya wari waramunyuze atakibarizwa mu bazima.

Yagiraga akarimi kareshya abagore

Mu kiganiro IGIHE yagiranye na Tito Rutaremera uyobora Urwego rw’Igihugu Ngishwanama rw’Inararibonye, yagarutse ku mpamvu zishobora kuba zitera Michela Wrong kwanga u Rwanda.

Yavuze ko n’umubano wihariye ashobora kuba yaragiranye na Karegeya, uri mu bibitera.

Rutaremara yavuze ko Karegeya yari umugabo ufite imvugo yo kuryoshya abagore ku buryo na Michela Wrong ashobora kuba yaraguye muri uwo mutego.

Ati "Nawe ni umugore (Michela Wrong) wabonye uko yandikaga ati ‘mvuganye na Karegeya rwose umukobwa wese umurebye ahava yumva yatwawe’ ubwo rero na we yaraje aratwarwa."

"Karegeya ntabwo yari umuhungu mubi, yari afite akarimi ko kubwira neza abakobwa, ubwo n’uwo muzungu wenda wari uvuye iwabo nta wundi abonana na we, bashobora kuba ubwo bucuti barabugiranye."

Rutaremara yavuze ko nyuma yo kujya muri Afurika y’Epfo kwa Karegeya, yatangiye kuvuga u Rwanda nabi, Wrong yisanga agomba kumushyigikira kubera umubano bari bafitanye.

Ati "Biza kugera igihe Karegeya noneho agira amakosa ye yatumye agenda nubwo ntacyo yahunze, kuko mbere hari amakosa yagize arafungwa ndetse biza kugera igihe baramubabarira."

"Uwo mugore (Michela Wrong) yagize ubucuti yari afitanye na Karegeya nyuma aza kugira amanyanga aragenda, atangira kuvuga u Rwanda nabi, akabimushyigikiramo noneho na nyuma y’urupfu rwe atangira kubitugerekaho."

Mu kiganiro Perezida Paul Kagame yagiranye na RBA ku wa 5 Nzeri 2021, nawe yagarutse kuri iyi myitwarire ya Michela Wrong, agaragaza ko koko yaba ifite aho ihuriye n’umubano we na Karegeya.

Perezida Kagame yavuze ko abiterwa no kuba yarafashe ibibazo by’u Rwanda mu buryo bwite.

Ati "Hari ibintu bigirwa ibibazo hagati y’abantu cyane kugeza n’aho ndetse n’uwanditse icyo gitabo yari inshuti magara n’umuntu yubakiyeho icyo gitabo, umugabo wapfiriye muri Afurika y’Epfo bari inshuti cyane kandi ndatekereza ko yafashe ikibazo mu buryo bwite hagati y’umuntu yakundaga n’igihugu ubundi ajya ku ruhande rw’umuntu."

"Birumvikana yari ashyigikiwe, wabibonera mu byo yanditse n’ibyo akomeje kuvuga mu itangazamakuru bifite ababishyigikiye kugeza n’aho ibi bitangazamakuru anyuzamo ibyo ashaka kuvuga nta na kimwe cyigeze kivuguruza uko abona ibintu cyangwa ibiri kuvugwa."

Uretse kuba urupfu rwa Karegeya rwarakoze kuri uyu mugore agatangira kwishyiramo u Rwanda, Rutaremara yagaragaje ko ashobora no kuba n’ubundi yarabitewe n’umurongo ibitangazamakuru mpuzamahanga biba bifite ku Rwanda na Afurika muri rusange.

Yavuze ko mu mashuri y’itangazamakuru no mu bitangazamakuru bitandukanye, abanyamakuru b’i Burayi na Amerika bigishwa ko muri Afurika nta kintu kizima kihava, ku buryo bagomba kuhakora inkuru zihavuga nabi gusa.

Patrick Karegeya wari ukuriye ubutasi bw'u Rwanda avugwaho kuba yaragiranye umubano wihariye na Muichela Wrong
Michela Wrong ni umwe mu bantu bakunze kumvikana mu mvugo zisebya u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza