IGIHE

Uko porogaramu ya telefoni irimo kwifashishwa mu kurwanya Kirabiranya yibasira urutoki

2 4-11-2019 - saa 22:04, Cyprien Niyomwungeri

Guhanga udushya mu ikoranabuhanga no kudukoresha mu gutanga serivisi no gusubiza ibibazo byugarije imibereho ya muntu bikomeje gukataza hirya no hino ku Isi, urwego rw’ubuhinzi nka rumwe mu zitunze benshi rukaba narwo rutarasigaye inyuma.

Ihuriro rigamije guteza imbere ubuhinzi bw’abaturage muri Afurika yo hagati (CIALCA), ryakoze ikoranabuhanga rifasha mu kurwanya indwara yibasira urutoki izwi nka Kirabiranya, aho ririmo kugeragerezwa mu Rwanda.

Iyi porogaramu y’ikoranabuhanga yitwa ICT4BXW-App, ishyirwa muri telefoni zigezweho (Smartphone), ikoreshwa mu gusuzuma no kurwanya indwara ya Kirabiranya izwi mu Cyongereza nka Banana Xanthomonas Wilt (BXW).

Kuri ubu BXW-App iraboneka ku bubiko bwa Google Play, ikaba ibasha kujya muri buri telefoni igezweho ‘Smartphone’. Icyo bisaba ni ukuyimanura (download), ukayifashisha mu gusuzuma indwara ya kirabiranya mu rutoki.

BXW-App irimo kugeragerezwa mu turere umunani tw’u Rwanda turimo; Gatsibo, Kayonza, Muhanga, Gisagara, Rulindo, Burera, Karongi na Rubavu n’abahinzi 69. Gusa buri muhinzi ubyifuza mu gihugu ashobora kuyibona akanayikoresha.

Kantengwa Speciose, ukora mu kigo cy’ubushakashatsi IITA-Rwanda, ushinzwe guhuza abafatanyabikorwa, avuga ko abajyanama 69 bo mu midugudu 69 ikorerwamo iri gerageza bahuguwe kuri iyi porogaramu ifite ibyiciro bine.

Icyiciro cya mbere ni icyo kumenyesha icyo kirabiranya ari cyo, icya kabiri kivuga kuyirwanya no kuyikumira, icya gatatu kigisha gukorera neza urutoki, gutera urutoki neza noneho rukaguha umusaruro ukihaza mu biribwa, icya kane gikoreshwa cyane n’abajyanama b’ubuhinzi mu gutanga amakuru muri RAB.

Kantengwa ati “Iyi porogaramu ifitemo amashusho yerekana uko kirabiranya imeze, uko isa, uko wayirwanya, icyo wakora ngo itazagaruka, niba idahari wakora iki ngo uyikumire. Ni igikoresho umujyanama w’ubuhinzi yanakoresha akigisha abaturage uko barwanya kirabiranya akabereka ayo mashusho atiriwe asoma impapuro”.

Vuguziga Theoneste, Umujyanama w’ubuhinzi mu mudugudu wa Songa, Akagari ka Mbare, Umurenge wa Shyogwe mu Karere ka Muhanga, avuga ko uburyo bw’ikoranabuhanga bwaborohereje mu kumenya ahari kirabiranya no gutanga amakuru vuba.

Ati “Dusura umuhinzi, tugasuzuma, tukabara insina afite, iriya porogaramu ikatubaza ngo ese izi nsina hari kirabiranya ubonye, iyo tuzibonyemo bidusaba n’umubare hari aho dukanda tukemeza ko kirabiranya irimo, hanyuma tugatanga raporo kwa agronome, nawe hari aho yemerewe gukora akanda agatanga amakuru kuri RAB, ikamenya aharwaye, umubare n’ubuso”.

Iyi porogaramu kandi yanaberetse uburyo bushya bwo kurwanya kirabiranya kuko mbere baranduraga igitsinsi cyose none ubu iyo igitsinsi gifite n’imibyare mizina batemera ku butaka gusa imibyare irwaye bagakorogoshoramo bagashyiraho itaka, bagasaba umuhinzi ko asura umurima we.

Umuyobozi w’uyu mushinga muri IITA-Rwanda, Dr. Julius Adewopo, avuga ko iyi ari intambwe ya mbere yo kurwanya kirabiranya kuko abaturage babasha kumenyekanisha no kwirinda ko iyi ndwara yakwirakwira, kandi bakubakirwa ubushobozi bwo kwishyiriraho ingamba.

Uyu mushinga uri muri gahunda yo guteza imbere ikoranabuhanga mu buhinzi, ICT4Rag, ya 2016-2020, ya Minisiteri y’Ubuhinzi n’Ubworozi.

Mu 2020, uyu mushinga uzava mu gihe cy’igerageza ugeze ku bahinzi b’urutoki 5000. Nyuma, abafatanyabikorwa bafite intego yo gukora icyiciro cya kabiri ari nabwo iyi porogaramu izamenyekanishwa ku rwego rwo hejuru mu Rwanda n’ahandi hose mu biyaga bigari.

Porogaramu yo kurwanya kirabiranya ishobora kuzajyanwa no mu bindi bihugu bya Afurika vuba mu gihe igerageza ryayo ryagera ku ntego hano mu Rwanda.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Byamukamaleopord 2019-11-05 13:21:07

Natwe mumurenge, wa ,rusasa mukagari ,kagataba iyo serivisi muzayitugezeho abenshi tumazekwibagirwa ,igitoki kubera kirabiranya munaduhugure .murakoze

2
Kayiranga evode 2019-11-04 22:09:48

Mwiriwe neza mperereye murikamonyi ndumva mwagumya kubishishikariza abantu cyane mukabibigisha bakabyumva murakoze!

Kwamamaza