IGIHE

Ubuhamya bwa Imaniriho wagororewe Iwawa agakurwa mu bubata bw’urumogi

1 6-11-2019 - saa 09:06, Prudence Kwizera

Imaniriho Alexis wavukiye mu Murenge wa Tare mu Karere ka Nyamagabe avuga ko yabaye imbata y’urumogi bituma acikiriza amashuri ariko nyuma yo kugororerwa mu Kigo Ngororamuco cya Iwawa yongera kuba umuntu muzima; kuri ubu akaba ari mu bikorwa byiza bimuteza imbere.

Uwo musore w’imyaka 30 y’amavuko yasangije ubuhamya bwe urubyiruko 1 437 ruri kugororerwa mu Kigo Ngororamuco cya Nyamagabe kubera gufata ibiyobyabwenge birimo urumogi, heroine n’inzoga zitemewe.

Yavuze ko akimara kumenya ubwenge atangiye amashuri abanza, yisanze abana na nyina gusa atangira kumubaza aho Se yagiye ariko ntiyamusubiza.

Ageze mu mwaka wa Mbere w’amashuri yisumbuye ku Rwunge rw’Amashuri rwa Nkumbure ni bwo nyina yamubwiye ko Se umubyara yapfuye afite amezi atandatu y’amavuko.

Iyo nkuru mbi yatumye atangira kwiheba no kwibaza uko ejo he hazamera.

Ati “Ntangira kwiheba ndavuga nti ni byo ndi gukora nta kamaro bizangirira niniga nkagera mu mwaka wa gatatu ntawe uzandihira amashuri.”

Nyuma yaho yatangiye guhura n’abandi bana bataye ishuri na we bamugira inama yo kureka kwiga bamubwira ko ‘kwiga nta cyo bizamumarira’.

Icyo gihe byatumye ku wa Mbere w’icyumweru cyakurikiyeho ajya kwiga ariko ntiyongera gutaha mu rugo.

Ati “Saa sita ntashye nsanga ba bandi bampa ku biyobyabwenge; bari babanje kunyumvisha ko ari byiza. Bampaye isegereti nsomyeho numva ndazungereye barambwira ngo ni uko ari ubwa mbere nzabimenyera.”

Bakomeje kujya basangira itabi n’urumogi babaho mu buzima bwo kuzerera mu Mujyi wa Nyamagabe batunzwe no guhungiza imbabura zo mu tubari bagakomba amagufwa abakiriya basigaje.

Bageze aho we na bagenzi be babiri batangira kujya inama yo kujya i Kigali gushaka akazi.

Umwe muri bo yagiye iwabo yiba amafaranga undi yiba ibigori naho Imaniriho yiba ibitenge bya nyina, bahuriza hamwe ibyo bibye barabigurisha babona impamba izabageza i Kigali.

Ati “Turagenda n’amaguru tugera i Nyanza nijoro tujya gucumbika bucyeye abandi babona akazi ko gukora mu rugo nanjye mbona ako kwahirira inka.”

Ingeso yo kunywa urumogi yaranze yisanga yarongeye kuba inzererezi rimwe na rimwe ntiyongere gutaha aho yakoraga.

Ati “Ya ngeso iranga sinongera gutaha mu rugo, nkajya nza ngiye kwahira gusa. Tumaze guhembwa ukwezi kwa mbere twahise ducika tujya i Kigali mu Kajagari ka Kanombe.”

Uko yafashwe akajyanywa Iwawa:

Imaniriho Alexis akimara kugera i Kigali we na bagenzi be baratatanye arara munsi y’ikiraro bukeye yirirwa azerera yongeye kuharara bwa kabiri afatwa n’inzego z’umutekano.

Bamujyanye ahazwi nko kwa ‘Kabuga’ ahamara amezi atatu agororwa bigeze aho bamujyana mu Kigo Ngororamuco cya Iwawa mu Karere ka Rutsiro.

Avuga ko akimara kugera Iwawa yagorowe bigeze aho yumva atangiye kuba umuntu muzima ahita atangira kwiga umwuga wo kubaza n’amategeko y’umuhanda.

Ati “Ububaji ndabwiga nshyizeho umutima ndabushobora; diregiteri wacu akajya aza kutuganiriza akatugira inama ngo tuzaharanire kuba abagabo.”

Akimara kumenya kubaza neza yasezerewe mu bandi bari barangije kugororwa n’amasomo y’imyuga asubira mu rugo mu Karere ka Nyamagabe.

Akigera mu mudugudu ngo bamuvugirije induru bavuga ngo ‘Cya gisambo cyo kwakanaka cyaje’. Yahisemo gutuza aguma mu rugo afasha nyina imirimo irimo no kwita ku matungo agaragaza ko yahindutse.

Uko yatangiye ibikorwa byiza by’iterambere

Imaniriho amaze ibyumweru bibiri iwabo yaje kumenya amakuru ko hari umuhungu wahoze ari inshuti ye wabaye umuyobozi mu ruganda rw’ububaji mu Murenge wa Gasaka.

Yamusabye ko yamusabira akazi arabikora barakamwemerera ahita agatangira hashize umwaka bamugira umuyobozi wungirije kubera ko yagaragaje ubunyamwuga n’imyitwarire myiza.

Ati “Nahembwe ukwezi kwa mbere ngura imyenda andi nkajya nyabika ndagenda ngura ibibwana bitatu by’ingurube kimwe ngishyira mu rugo ibindi bibiri ndabiragiza.”

Nyuma yaho ingurube ebyiri zarabwaguye agurisha ibibwana yongera ku mafaranga yari yarazigamye aguramo inka ayishyira mu rugo kwa nyina.

Ingurube zongeye kubwagura arazigurisha amafaranga akuyemo ayakoresha mu kuvugurura inzu ya nyina no kumwubakira uruzitiro.

Yongeye gusubiza amaso inyuma yibuka ko yize amategeko y’umuhanda atangira kongera kuyihuguraho kuko yumvaga ashaka kwikorera ku giti cye.

Ati “Ndihugura ndangije njya kwiyandikisha nkorera uruhushya rw’agateganyo rwo gutwara ibinyabiziga ndatsinda. Nshaka andi mafaranga niyandikisha ku kizamini cyo gutwara moto ndakora inshuro ya mbere ndatsindwa.”

Yakomeje kwiga gutwara moto bigeze aho ajya gukorera ikizamini mu Karere ka Huye aratsinda agaruka i Nyamagabe akomeza akazi yakoraga afite intego yo gushaka uko yakwinjira mu mwuga w’ubumotari.

Yasabye koperative y’abamotari ko yakwinjizwamo atanga umugabane w’ubunyamuryango atangira gutwara moto akodesha.

Yagize ati “Nsezeye ku kazi mbwira umuyobozi ko ngiye kwikorera kuko nabonye umuntu ungurira moto nkajya mwishyura buhoro buhoro. Ubu mba mu nzu nikodeshereza nshyuramo na moto nkabona ibyo kurya, nta muntu n’umwe dufitanye ikibazo.”

Imaniriho avuga ko kuri ubu afite intego yo kuziyubakira inzu nziza akazagira aho atuza umuryango we akazaba umugabo uhamye; agashaka n’uruhushya rwo gutwara imodoka.

Yasabye ababyeyi kujya bita ku bana babo babona hari utangiye kujya mu ngeso mbi bagakumira hakiri kare.

Abafite abana bari mu bigo ngororamuco yabasabye kujya babitaho igihe batashye kugira ngo babyaze umusaruro imyuga bahigiye.

Umuyobozi Mukuru wungirije w’Ikigo cy’Igihugu gishinzwe Igororamuco, ACP Gumira Rwampungu Gilbert, yavuze ko abarenga 80% bagororerwa mu Bigo Ngororamuco basubira mu buzima busanzwe barahindutse bazima batangira ibikorwa bibateza imbere.

Iwawa hamaze kuva abarengaho gato ibihumbi 22, naho i Gitagata hamaze kuva abagera ku bihumbi bine; bari hanze mu buzima busanzwe.

Kuri ubu mu Kigo ngororamuco cya Iwawa mu karere ka Rutsiro hari kugororerwa urubyiruko rugera ku 4 500; i Gitagata mu Bugesera hariyo abarenga 700 naho i Gatare mu Karere ka Nyamagabe hari 1 437.

Imaniriho avuga ko yari yarabaye imbata y'urumogi ariko kujyanywa Iwawa byamufashije kurureka yiga imyuga
Umuyobozi Mukuru wungirije w’Ikigo cy’Igihugu gishinzwe Igororamuco, ACP Gumira Rwampungu Gilbert

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
david rwasa 2019-11-08 04:10:02

Nuko nuko!
Nabandi bana bakwigireho.
Ababyeyi namwe nimufahse abana mubabe hafi.
Hari ababyeyi bakura abana babo muribyo bigo ngororamucuhakiri kare bakabahisha mu mazu bakarushaho kumererwa nabi! Muri ya migoroba yababyeyi bajye babivuga bashishikarize ababbyeyi kudahisha abana banwa ibiyobyabwenge! Ikibazo mbona nuko ababyeyi bumva ar’igisebo

Kwamamaza