IGIHE

U Rwanda rwateye intambwe ifungurira RwandAir amarembo i New York

0 24-11-2022 - saa 11:38, Philbert Girinema

Urwego rwa Leta Zunze Ubumwe za Amerika rushinzwe iby’ingendo, rwemeje ko u Rwanda rwujuje amabwiriza ngenderwaho yo kurengera umutekano w’abantu n’ibintu mu ngendo zo mu kirere, ruza mu cyiciro cya mbere mu kubahiriza amahame mpuzamahanga ashyirwaho n’Ishami rya Loni rishinzwe iby’Ingendo z’Ingede za Gisivile, ICAO.

Ayo mahame agena ibintu bitandukanye bijyanye n’umutekano w’indege mu kirere. Ubusanzwe, buri segonda hari indege ihaguruka n’indi igwa mu bice bitandukanye by’Isi dutuye.

Ushobora kwibaza uburyo izo ndege zibisikana mu kirere nta nkomyi, uko zibasha kwambukiranya ibihugu, uko abazikoresha bumvikana mu ndimi zitandukanye n’ibindi. Wakwibaza kandi uko abapilote baba badahuje imico, bashobora gukorana nta nkomyi.

Ni imikorere iri ku rwego rwo hejuru isaba kwitwararika ikintu cyose. Kugira ngo bibashe kugerwaho, ni uko habaho uburyo buhuriweho ibintu bikorwa ariyo mategeko agenga ibijyanye n’ingendo zo mu kirere, akoreshwa ku Isi hose.

Ni amategeko areba ingeri zirimo ibikoresho, imikorere, abakozi, impuzankano bambara n’ibindi biba bisabwa mu kubahiriza inshingano zabo mu kazi ku buryo umutekano w’abantu mu ndege ndetse no kubahiriza igihe mu bijyanye n’ingendo mpuzamahanga byubahirizwa.

Ishami rya Amerika rishinzwe ingendo zo mu kirere muri Amerika ryasanze u Rwanda rwujuje ibisabwa mu kubahiriza ayo mabwiriza, birushyira mu cyiciro cya mbere mu kuyubahiriza.

Icyiciro cya mbere u Rwanda rwashyizwemo bivuze ko cyubahiriza amabwiriza ya ICAO. Ibyo bihesha RwandAir kuba yahabwa uburenganzira buyihesha gukorera ingendo muri Leta Zunze Ubumwe za Amerika cyangwa se bigahesha u Rwanda kugirana amasezerano y’imikoranire n’izindi sosiyete zo muri Amerika arimo no kuba zajya zihererekanya abagenzi nk’uko u RwandAir iherutse kuyasinyana na Qatar.

Kugira ngo RwandAir yemererwe gukorera ingendo muri Amerika ni uko iba yujuje ibisabwa na ICAO. Ubu bivuze ko ishobora kubisaba ikabyemererwa cyangwa ikagirana amasezerano y’imikoranire n’izindi sosiyete zo muri Amerika.

Kuba u Rwanda rwujuje aya mahame ashyirwaho na ICAO, ni indi ntambwe ikomeye mu ntego zarwo. Rurashaka no kuba igicumbi cy’ingendo zo mu kirere muri Afurika. Iyi ni intego yatangiye gutegurwa mu myaka myinshi ishize ubwo Guverinoma yatangiraga gushyira amafaranga umwaka ku wundi muri RwandAir.

Ubu RwandAir ifite indege 12 zirimo imwe ya A330-200 n’indi ya A330-300. Izi zombi ziyiha amahirwe yo gukora ingendo ndende zahuza Afurika na Amerika cyangwa se na Aziya.

Byitezwe ko mu gihe RwandAir izaba itangiye kujya i New York ku Kibuga cy’Indege cya JFK, ubu bwoko bw’indege ari bwo buzajya bukoreshwa.

Mu ntangiriro za 2021, RwandAir yandikiye Urwego rwa Leta Zunze Ubumwe za Amerika rushinzwe ingendo, isaba uburenganzira bwo gukora ingendo zigana i New York.

Icyo gihe intumbero yari ihari ni uko izo ngendo zatangirana n’Ukuboza 2021. Muri Gashyantare, RwandAir yabonye uburenganzira bugena ko mu gihe yaba itangiye izo ngendo yajya inyura muri Ghana ikahafata abagenzi.

Ifite kandi izindi ndege esheshatu za Boeing 737 harimo ebyiri za 737-700 n’enye za 737-800. Ifite kandi izo mu bwoko bwa Bombardier CRJ harimo ebyiri za CRJ900ER n’izo mu bwoko bwa DHC Dash 8. Izi zo ni ebyiri za DHC-8-Q400.

Mu minsi mike iri imbere, byitezwe ko RwandAir izatangaza ko yamaze kugurisha imigabane yayo ingana na 49% muri Qatar Airways, bizatuma yongera umubare w’indege zayo kuko hari izo Qatar Airways izayiha.

Qatar inafite kandi imigabane ingana na 60% mu mushinga w’Ikibuga cy’Indege cya Bugesera. Bivugwa ko yishyuye miliyoni 780$ kugira ngo cyubakwe, ku buryo nicyuzura neza kizaba cyakira abagenzi miliyoni 14 ku mwaka.

Umuyobozi Mukuru wa Kenya Airways, Michael Joseph, aherutse gutangaza ko uko bigaragara, igicumbi cy’ingendo zo muri Afurika kizaba muri Kigali.

Ati “Uko ni ukuri, ni cyo cyerekezo biri kuganamo. Ubu turi kubibona tukavuga ngo biratangaje ariko mu myaka itanu nitutareba neza tuzabyuka dusange abagenzi bose bari i Kigali.”

Muri Werurwe, Michael yavuze ko hari amakuru yumvise ko Qatar Airways igiye guha indege RwandAir, avuga ko niba ntacyo Kenya ikoze, igicumbi cya Afurika mu ngendo kitazaba kikibaye Nairobi ahubwo kizaba i Kigali.

Yatanze urugero kuri Dubai, agaragaza ko iyo bitaba Emirates ifite ingendo zijya hirya no hino, uyu mujyi utaba ugendwa cyane nk’uko bimeze ubu.

Mu 2017, abagenzi bakiriwe ku Kibuga cy’Indege cya Kigali bari 771.415; mu mwaka wakurikiyeho barazamuka baba 1.041.220; mu 2019 bagera kuri 1.059.612 gusa kubera icyorezo cya Covid-19 cyahagaritse ingendo mu 2020 bari barenze gato ibihumbi 300.

RwandAir yitezweho gufasha u Rwanda kuba igicumbi mu ngendo zo mu kirere
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza