IGIHE

U Rwanda rwakiriye impano y’imashini 100 zifasha abarwayi guhumeka rwahawe na Amerika

0 30-07-2020 - saa 13:09, Iradukunda Serge

U Rwanda rwashyikirijwe impano y’imashini ijana zifasha abarwayi barimo aba COVID-19 guhumeka (Ventilators) yari iherutse kwemererwa na Leta Zunze Ubumwe za Amerika ngo zizayifashe gukomeza guhangana n’iyi ndwara no kwita ku barwayi b’iki cyorezo

Iyi mpano y’ibikoresho ni imwe mu musaruro w’ibiganiro Perezida Kagame yagiranye na mugenzi we wa Leta Zunze Ubumwe za Amerika Donald Trump mu ntangiriro z’uyu mwaka.

Ubwo yashyikirizaga Leta y’u Rwanda izi mashini kuri uyu wa 30 Nyakanga, Ambasaderi wa Leta Zunze Ubumwe za Amerika mu Rwanda, Peter Hendrick Vrooman yavuze ko Leta ye yazitanze kugira ngo zifashe u Rwanda guhangana na COVID-19 ndetse anizeza ko ubufatanye bw’ibihugu byombi buzakomeza.

Yagize ati “Ibi byuma byakorewe muri Amerika bizafasha u Rwanda mu kurwanya icyorezo cya COVID-19 [...] Leta ya Amerika yifatanyije kandi izakomeza no gufatanya na Leta y’ u Rwanda mu kurwanya Coronavirus no kurengera ubuzima bw’abanyarwanda kuko ubuzima bwanyu ni ubuzima bwacu, ubuzima bwacu ni ubuzima bwanyu.”

Ambasaderi Vrooman yavuze ko bazakomeza gukorana na Minisiteri y’Ubuzima mu kongerera abaganga b’abanyarwanda ubumenyi kugira ngo bazabashe gukoresha izi mashini neza no kuzibungabunga.

Minisitiri w’Ubuzima, Dr Daniel Ngamije, wakiriye iyi mpano mu izina rya guverinoma yavuze ko ije ari umusanzu ukomeye uzunganira u Rwanda mu kuvura COVID-19 n’izindi ndwara, dore ko rwari rusanganywe izigera kuri 87 gusa.

Ati “Ibi byuma twakiye bije bisanga ibyo guverinoma yari yaraguze 87 byakoraga mu bigo bitandukanye mu kwita ku barwayi ba COVID-19 kandi n’abandi barwayi bafite ibibazo byo guhumeka bashobora kwifashisha ibi byuma kugira ngo bibunganire mu guhumeka, ni umutungo tugiye kwifashisha muri ibi bihe bikomeye bya COVID-19 ariko na nyuma y’aho bizashyirwa ahafashirizwa abarwayi b’indembe kugira ngo barusheho gufatwa neza.”
Dr Ngamije yakomeje avuga ko abaganga b’u Rwanda bazafata iminsi mike yo kumenyera gukoresha izi mashini nshya kuko mu busanzwe bari bafite ubumenyi bw’ibanze mu bijyanye n’uko zikoreshwa.

Ati “Ubushobozi bwo gukoresha ibi byuma abakozi bacu bo kwa muganga bari basanzwe babufite, iyo haje ibyuma bishya birumvikana hari akantu aka n’aka kaba kakosowe cyangwa kanogejwe, ni amahugurwa y’umunsi umwe kugira ngo umuntu gusa amenyere icyo gikoresho gishya ariko ubundi ibikomeye mu kumenya igituma umuntu akoresha icyo cyuma n’uburyo agikoresha baba babizi kuko barabyize”

N’ubwo u Rwanda rutaragira umubare munini w’abarwayi ba COVID-19 bagera ku rwego rwo gukenera izi mashini ngo zibafashe guhumeka, Dr Ngamije avuga ko izi mashini zizafasha u Rwanda mu guhora rwiteguye cyane ko abarwayi b’indembe badateguza.

Izi mashini uko ari ijana zizakwirakwizwa mu bitaro 10 byo hirya no hino mu gihugu ndetse no mu bigo bine bisanzwe byita ku barwayi ba Covid-19.

Ambasaderi Peter Vrooman yavuze ko igihugu cye kizakomeza gufutanya n'u Rwanda mu guhangana na COVID-19
Dr Ngamije Daniel aganira na Amabasaderi Peter Vrooman
Iyi mpano y'izi mashini yavuye mu biganiro abakuru b'ibihugu byombi bagiranye mu ntangiriro z'uyu mwaka
Ambasaderi Peter Vrooman yashyikirije Guverinoma y'u Rwanda imashini 100 zifasha abarwayi guhumeka

Amafoto: Niyonzima Moïse

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza