Sonia Rolland yagizwe Ambasaderi wa Onomo Hotel Kigali

0 9-11-2018 - saa 15:04, Ishimwe Israel

Uwitonze Sonia Rolland wabaye Nyampinga w’u Bufaransa mu 2000 yagizwe Ambasaderi wa Onomo Hotel Kigali.

Uyu Munyarwandakazi w’imyaka 37 yari mu bashyitsi b’icyubahiro bitabiriye ifungurwa ku mugaragaro rya Onomo Hotel ku wa 8 Ugushyingo 2018.

Sonia yagizwe Ambasaderi wa Onomo Hotel abisabwe na Visi Perezida wayo, Olivier Thery bahuriye i Dakar.

Sonia yashimye icyerekezo cyayo cyo kwita ku muco Nyarwanda, ashimangira ko bimuteye ishema.

Yagize ati “Kumenyekanisha Onomo Hotel mu Rwanda no ku Isi ni iby’agaciro. Ni ubwa mbere mbaye Ambasaderi wa Hotel mu Rwanda. Nashimye gahunda yo gukorana n’ab’imbere mu gihugu no gutaka inkuta za hoteli bifashishije imigongo.”

“Ngenda muri hotel nyinshi ku Isi ariko iyi ifite umwihariko kuko iha abayigana serivisi zihebuje.”

Sonia yavuze ko azakorana n’abafatanyabikorwa, akanavuga u Rwanda mu mahanga.

Ati “Bashobora kuba barampisemo kuko mfitanye isano n’u Rwanda. Nza hano inshuro eshatu cyangwa enye ku mwaka. Icyo nifuza ni ukuzana inshuti zanjye z’Abafaransa, kureba ibitatse igihugu.”

Kuri we ni igihe cyiza cy’imikoranire hagati y’ibihugu byombi.

Ati “Turavuga ku Muryango w’Ibihugu bivuga Igifaransa na dipolomasi ishingiye ku muco. Ni ngenzi kuri njye kuko nari nk’umwana hagati y’abantu babiri batandukanye mu bijyanye na politiki. Nagorwaga no kubona inkunga yo gushyigikira imishinga yanjye mu myaka 20 ishize. Ni byiza ko ibiganiro biri kugaruka mu mujyo.”

Mu ntangiriro za 2018, Sonia Rolland washinze Umuryango Maisha Africa yashyize hanze film mbarankuru yise ‘Femmes du Rwanda’. Yahawe igihembo cya Bronze mu iserukiramuco mpuzamahanga rya Cannes Film Festival.

Iyi film y’iminota 52, isobanura iterambere ry’umugore n’uruhare agira mu kuzamura ubukungu bw’u Rwanda.

Sonia ufite imishinga myinshi mu gihugu, yari mu itsinda ry’akanama nkemurampaka katanze amanota mu gutora Nyampinga w’u Rwanda 2018. Ikamba ryahawe Iradukunda Liliane.

Onomo Hotel Kigali ahagarariye ni iy’inyenyeri eshatu; yubakishijwe imirimbo ijyanye na gakondo y’u Rwanda mu mitako y’imigongo, ibiseke n’ibishushanyo by’ubugeni bikoreshejwe amase avanze n’ibyondo biri mu mabara yizihiye ijisho. Ifite ibyumba 109, birimo 10 icumi bifite n’ibikoni. Yuzuye itwaye miliyoni $20.

Inkuru bifitanye isano: Onomo Hotel yafunguwe ku mugaragaro (Amafoto)

Rolland yashimye icyizere yagiriwe
Sonia Rolland yabaye Nyampinga w'u Bufaransa mu 2000
Sonia Rolland yafashe ifoto y'urwibutso n'abitabiriye uyu muhango barimo Umunyarwenya Ntarindwa Diogène uzwi cyane nka Atome mu mikino y'ikinamico
Sonia Rolland yagizwe Ambasaderi wa Onomo Hotel Kigali
Yahawe indabo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza