IGIHE

Rwamagana: Abangavu bakanguriwe kudakingira ikibaba ababateye inda

0 25-12-2021 - saa 12:55, Hakizimana Jean Paul

Abakobwa bari munsi y’imyaka 18 babyaye bo mu Karere ka Rwamagana, basabwe kudahishira ababateye inda kuko bituma badakurikiranwa bityo bigakomeza gutiza umurindi iki cyaha.

Uko imyaka ishira indi igataha mu turere dutandukanye tw’igihugu humvikana umubare munini w’abangavu babyaye, mu ngaruka bibagiraho hakaba harimo kuva mu ishuri utaretse ubuzima bubi bahura na bwo kimwe n’abo babyaye.

Mu Karere ka Rwamagana abangavu 172 ni bo batewe inda muri uyu mwaka wa 2021.

Mu biganiro biherutse guhabwa abangavu batewe inda bari hamwe n’ababyeyi babo muri aka karere, bigamije kubakangurira guharanira uburenganzira bwabo no gufata neza abo babyaye, bamwe muri bo byagaragaye ko bataratinyuka kuvuga ababateye inda.

Ubwo babazwaga abamaze kugana ubutabera batanga ibirego ku babateye inda, mu bakobwa 50 ababyemeje ni batatu mu gihe abandi bavuze ko badashaka kubafungisha.

Umwe muri bo watewe inda afite imyaka 17 yavuze ko zimwe mu mpamvu zituma atifuza ko uwabimukoreye afungwa harimo kuba ari we umufasha mu buzima bwe bwa buri munsi ngo aho amutangira ubwisungane mu kwivuza n’ibindi nkenerwa byose.

Undi wabajijwe yavuze ko yatewe inda aba kwa mukuru we aramufasha ariko amaze kubyara baramwirukana kuri ubu akaba yibana akanimenyera byose akeneye.

Nubwo bimeze bityo na we ntashishikajwe no gutanga ikirego ngo umusore wamuteye inda akurikiranwe.

Ati “Ntabwo mbishaka kuko bavuga ko bahita bamufunga.”

Umuyobozi w’umuryango witwa Mfura Foundation, Mfurayabo Marie Clarisse, wateguye ibi biganiro, yavuze ko guhugura abangavu n’ababyeyi babo bituma ihungabana bahuye na ryo rigabanuka icyizere kikagaruka.

Ati “Tubahugura kugira ngo bumve ko bakunzwe mu muryango nyarwanda, abenshi usanga bavuga bati ‘n’ubundi narabyaye byararangiye ubuzima bwanjye bwarangiritse’. N’impamvu ubona batitabira kuvuga ababateye inda ni uko bataratinyuka neza.”

Umuyobozi w’Akarere ka Rwamagana wungirije ushinzwe imibereho myiza y’abaturage, Mutoni Jeanne, yavuze ko bagiye gukomeza ibiganiro n’aba bangavu babyaye kugira ngo bumve neza ibyiza byo kuvuga uwabahohotewe akabihanirwa.

Yagize ati “Mu bana dufite hano batatu ni bo babashije kwemera ko bavuga ababateye inda kugira ngo bakurikiranwe kuko ni abana bato bari munsi y’imyaka 18. Iyi gahunda ihoraho dukunda kubabaza kenshi ndetse tuzanashyiraho uburyo bwo kuganiriza umwe umwe ku buryo ushaka kumuvuga yamuvuga.”

Ubuyobozi bw’Akarere ka Rwamagana buvuga ko bugikomeje gufasha aba bangavu kugira ngo basubire mu ishuri.

Abangavu babyaye basabwe kureka guhishira ababateye inda kuko bituma badahanwa bigatiza umurindi iki cyaha
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza