IGIHE

Rwamagana: Abakobwa bakanguriwe kurushaho kwitabira amasomo ya siyansi

1 12-02-2019 - saa 19:41, Hakizimana Jean Paul

Abana b’abakobwa biga mu bigo bitandukanye byo mu Karere ka Rwamagana beretswe amahirwe bafite mu kwiga Siyansi, basabwa kutitinya kuko atari amasomo akomerera abakobwa mu buryo bw’umwihariko.

Ni mu gikorwa cyabaye ku Cyumweru ku munsi mpuzamahanga w’abagore n’abakobwa biga siyansi. Mu karere ka Rwamagana hahurijwe abakobwa bahagarariye abandi ku bigo by’amashuri yisumbuye na kaminuza muri ako karere, hagamijwe kubakangurira kwiga Siyansi.

Iki gikorwa cyateguwe n’Ishuri Nyafurika ry’Ubumenyi bushingiye ku mibare, AIMS [African Institute for Mathematical Sciences]. Cyitabiriwe n’abakobwa n’abagore biteje imbere babikesha ubumenyi, batanga ubuhamya bugamije gutinyura abakiri bato.

Minisiteri y’Uburezi ivuga ko abanyeshuri bari mu masomo ya siyansi ari 44%, ab’igitsina gore bakaba 16%. Guverinoma ifite gahunda ko mu 2024 abakobwa biga siyansi bazaba ari 30%.

Benimana Henriette wiga ubwubatsi muri Kaminuza y’u Rwanda, yavuze ko abakobwa bakiri bake muri siyansi kubera impamvu zirimo kwitinya no kudashyigikirwa n’imiryango.

Ati “Nk’ubu mu ishuri ryacu twiga turi 7o ariko abakobwa ni barindwi gusa. Ibyo rero biri mu bituma n’abakiri inyuma yacu babona ko kwiga siyansi bikomeye cyane nyamara kuri twe tuyiga tubona ari ibisanzwe.”

Murekatete Claire wiga ubuganga nawe muri Kaminuza y’u Rwanda, asanga imyumvire y’abakobwa no gutinya biri mu bituma batiga siyansi.

Ati “Twe nk’abakobwa tuzi ko siyansi ari ibintu bikomeye, bisaba umwanya munini mu kubyiga kandi abenshi muri twe bikundira ibintu byoroshye, ariko iyo utinyutse ukayiga usanga ari ibisanzwe.”

Yavuze ko uko abana b’abakobwa barushaho kwegerwa ari nako umubare wabatinyuka kwiga siyansi wiyongera, agasaba leta kongeramo imbaraga no kubashyigikira cyane.

Dr. Karekezi Claire, umugore w’inzobere mu kuvura indwara zo mu mutwe, yasabye abana b’abakobwa kudapfukirana ibyo bifuza kwiga kuko bashyigikiwe na leta.

Ati “Kuri ubu mufite amahirwe menshi yo kwiga ibyo mushaka kandi mukagera no ku ntego zanyu kuko mushyigikiwe na leta n’indi miryango inyuranye. Ikindi kwiga siyansi ntabwo bikomerera umukobwa kurusha umuhungu, mwese biborohera kimwe bikanabakomerera kimwe.”

Yasabye abana b’abakobwa kwiga bafite intego kandi bagaharanira kuziteza imbere banateza imbere igihugu.

Byukusenge Olive wiga mu rwunge rw’amashuri rwa Gishari yavuze ko byamushimishije kubona abagore bize siyansi bafite aho bigejeje, bikaba byanamuteye imbaraga mu kwiga kwe, aho nawe yifuza kuzaba umunyamibare wo ku rwego rwo hejuru.

Abakobwa bahagarariye abandi mu bigo byose byo mu Karere ka Rwamagana bitabiriye iki gikorwa
Habaye ibiganiro bitandukanye bigamije gukangurira abakobwa kwiga siyansi
Dr. Claire Karekezi, inzobere mu kuvura indwara zo mu mutwe, yasabye abana b'abakobwa gutinyuka bakiga siyansi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
nunu 2019-02-12 13:45:23

Nonese bariga science batagira Laboratwari koko ibi ni ibiki???????

Kwamamaza