IGIHE

Rusesabagina, Sankara na bagenzi babo bitezwe mu rukiko

0 14-01-2022 - saa 14:14, IGIHE

Urukiko rw’Ubujurire rugiye gutangira kuburanisha ubujurire mu rubanza ruregwamo Paul Rusesabagina na bagenzi be 20 baregwa ibyaha by’iterabwoba.

Rusesabagina Paul wayoboraga MRCD/FLN ahuriyemo na Nsabimana Callixte ‘Sankara’ n’abandi 19 bajuriwe n’Ubushinjacyaha nyuma yo gukatirwa. Gusa 13 muri bo hamwe n’abaregera indishyi 77 na bo barajuriye.

Urugereko Rwihariye rw’Urukiko Rukuru ruburanisha Ibyaha Mpuzamahanga n’Ibyambukiranya Imipaka, ku wa 20 Nzeri 2021, nibwo rwari rwabahaye ibihano.

Ku wa Mbere ni bwo mu Rukiko rw’Ubujurire hazatangira kumvwa ubujurire.

Rusesabagina yakatiwe igihano kinini muri bose kuko ari igifungo cy’imyaka 25 mu gihe Nsabimana ‘Sankara’ yakatiwe gufungwa imyaka 20, abandi bagenda bahabwa ibihano bitandukanye.

Mu mpera z’umwaka ushize, Umushinjacyaha Mukuru, Havugiyaremye Aimable, yatangaje ko hatanzwe ubujurire nyuma yo kutishimira ibihano byatanzwe.

Ikindi ni uko Ubushinjacyaha butishimiye icyemezo cy’urukiko cyo kugira Rusesabagina umwere ku cyaha cyo kurema umutwe w’ingabo.

Ati “Mu bindi twajuririye harimo kuba icyaha cyo gutera inkunga iterabwoba gifatwa nka kimwe mu bigize ibikorwa by’iterabwoba, kuko twumvaga icyifuzo cy’Ubushinjacyaha cyari uko cyafatwa nk’icyaha ukwacyo.”

Yakomeje agira ati “Hanyuma tunajuririra n’igihano twumvaga ko ukurikije amategeko, igihano cyatanzwe kitari gikwiriye.”

Rusesabagina ntiyigeze ajuririra igihano cy’imyaka 25 yahawe dore ko yakatiwe yaramaze kwivana mu rubanza, avuga ko atizeye guhabwa ubutabera.

Rusesabagina na bagenzi be bagiye kongera kuburanishwa nyuma y'ubujurire bw'Ubushinjacyaha
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza