IGIHE

Perezida Kagame yatuwe ikibazo cy’ikoranabuhanga ry’inkiko rigicungwa n’abanyamahanga

1 5-11-2019 - saa 21:59, IGIHE

Perezida w’Urukiko rw’Ikirenga Prof Sam Rugege, yabwiye Perezida Kagame ko ikoranabuhanga rifasha mu gukurikirana ikirego mu nkiko izwi nka Electronic Case Management System (IECMS), kugeza magingo aya rikoreshwa n’abanyamahanga, bityo hakenewe ko hashyirwaho itsinda ry’Abanyarwanda ryafata izo nshingano.

Kuri uyu wa Kabiri nibwo hatangijwe umwaka w’ubucamanza wa 2019/2020, hanagarukwa ku bikorwa byabaye mu mwaka ushize ndetse n’ibishyizwe imbere mu mwaka uri imbere.

Prof Rugege yavuze ko ikoranabuhanga ari ingenzi mu mikorere y’inkiko, ariko mu buryo bwifashishwa n’inkiko harimo ikibazo.

Ati "Ikoranabuhanga naryo riracyafite utubazo, ubu turishimira ibyo tumaze kugeraho mu mikoreshereze y’ikoranabuhanga cyane cyane Integrated Electronic Case Management System, nyamara mu kabazo kose igize cyangwa iyo dushatse kugira icyo duhindura cyangwa twongera mu mikorere yayo, biba ngombwa ko twiyambaza abayihanze b’abanyamahanga.”

Ni ikibazo cyagaragaye mu gihe urwego rw’ubucamanza rwifuza kongera muri IECMS izindi nzego nk’Ikigo gishinzwe Indangamuntu (NIDA), Ikigo cy’Igihugu cy’Imisoro n’amahoro, Ikigo cy’igihugu gishinzwe ubutaka, Ikigo cy’igihugu gishinzwe iterambere n’ibindi.

Ni ukugira ngo nko mu gihe hari uhamijwe ibyaha, bizajye byoroha kurangiza urubanza, niba ari imitungo igurishwa cyangwa ifatirwa, ibashe kuboneka.

Prof Rugege yakomeje ati “Ibyo byagakemuwe no gushyiraho kandi mu buryo bwihuse, abakozi bihariye b’abanyarwanda bahuguriwe ibyayo kugira ngo bajye bayihuza n’ibyifuzo by’abayikoresha kimwe n’ihinduka ry’amategeko.”

Ku wa 31 Ukuboza 2015 nibwo Ministeri y’Ubutabera yashyize ahagaragara ikoranabuhanga rihuza amakuru y’inzego zose z’ubutabera, kuva ku Bugenzacyaha, Ubushinjacyaha, Inkiko, Minisiteri y’Ubutabera kugeza ku Rwego rushinzwe imfungwa n’abagororwa, RCS.

Ikoranabuhanga rya IECMS ryubatswe n’Ikigo ‘Synergy International Systems’ cyo muri Armenie, ritwara amafaranga asaga miliyari imwe na miliyoni 253.

Gusa iyo hari ikintu Minisiteri y’Ubutabera ishatse guhinduraho cyangwa kongeraho, bisaba ko abubatse iri koranabuhanga ari bo babikora, bakabikorera mu Rwanda cyangwa iwabo. Ni ibintu bitera imbogamizi ku buryo hari ubwo imanza zisubikwa kubera iri koranabuhanga riba ryanze gukora.

Ubu harimo gutekerezwa uburyo iri koranabuhanga ryatangira gucungwa n’abanyarwanda, gusa imbogamizi ikaba ko byasaba ko buri kigo kirikoresha, cyatanga umukozi umwe wacyo ngo ahugurwe mu miterere y’iri koranabuhanga, akaba yakwimurwa agakorera ahandi nko muri Minisiteri y’ubutabera.

Ni icyemezo gitegereje uburenganzira mbere yo gushyirwa mu bikorwa, nyuma y’ubusabe bwashyikirijwe Perezida Kagame.

Abayobozi bahaye icyubahiro Indirimbo y'Igihugu
Perezida w'Urukiko rw'Ikirenga Prof Sam Rugege yashimye intambwe urwego rw'ubucamanza rumaze gutera nubwo hari ibikeneye kunozwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Anastase 2019-11-07 03:04:00

Muraho neza nangirango mbangezeho akarengane nangiriwe murubwobucamanza nkokuba urengana bosebabireba ukaburana mukwezikwangatandatu nanubu urubanzarukaba rutarasomwa ?kandibazinezako ikiburanwa kirangiraza itarikizogukoreshwa ubwose nubutabera?

Kwamamaza