IGIHE

Perezida Kagame yakiranywe urugwiro i Maputo

0 28-10-2022 - saa 20:29, Iradukunda Serge

Perezida Paul Kagame uri mu ruzinduko rw’akazi muri Mozambique yakiranywe urugwiro n’abaturage bo muri iki gihugu yagiye asanga mu bice yasuye byo mu Murwa Mukuru, Maputo.

Mu gitondo cyo kuri uyu wa Gatanu nibwo Perezida Kagame yageze i Maputo mu ruzinduko rw’umunsi umwe.

Akigera muri iki gihugu yakiriwe na mugenzi we, Filipe Nyusi ndetse bagirana ibiganiro byagarutse ku butwererane bw’ibihugu byombi.

Ni ibiganiro kandi byagaragayemo Minisitiri w’Ububanyi n’Amahanga w’u Rwanda, Dr Vincent Biruta, Umujyanama wa Perezida Kagame mu by’ubukungu, Francis Gatare, Umuyobozi Mukuru wa Polisi y’u Rwanda, Dan Munyuza, Umunyamabanga Mukuru w’Urwego rushinzwe iperereza n’Umutekano, Gen Maj Joseph Nzabamwita.

Minisitiri w’Ububanyi n’Amahanga wa Mozambique, Verónica Macamo yavuze ko ibiganiro by’Abakuru b’ibihugu byombi byibanze ku kureba ibimaze gukorwa n’Ingabo z’u Rwanda n’iza Mozambique mu kurwanya iterabwoba mu Ntara ya Cabo Delgado.

Ati “Abakuru b’ibihugu byombi bashimye ubutwari bw’ingabo za Mozambique n’iz’u Rwanda, aho ku bufatanye n’ingabo za SADC zabashije guhagarika ibikorwa by’iterabwoba mu gihugu cyacu.”

Yakomeje avuga ko indi ngingo yaganiriweho ari ijyanye no kurebera hamwe uburyo RwandAir yatangira guhagurukira muri Mozambique ijya mu byerekezo bitandukanye.

Ati “Bibanze ku kurebera hamwe ibikorwa by’ibigo by’indege by’ibihugu byombi, aho bizafasha ikigo cy’indege cy’u Rwanda gukora ingendo zitandukanye indege zacyo zihagurukiye muri Mozambique.”

Amakuru dukesha Village Urugwiro avuga ko nyuma y’ibi biganiro, Perezida Kagame yagize umwanya wo gutembera ibice bitandukanye bya Maputo birimo n’isoko riherereye ku Nyanja.

Aha Perezida Kagame yagize umwanya wo kuganira n’abaturage yahasanze ndetse bakamwakirana urugwiro.

Mu mwaka ushize nibwo u Rwanda rwohereje muri Mozambique abasirikare n’abapolisi, mu butumwa bwo guhangana n’umutwe w’iterabwoba wa Al Sunnah wa Jama’ah wari wigaruriye ibice bitandukanye by’intara ya Cabo Delgado, mu majyaruguru y’icyo gihugu.

Kuva Ingabo n’abapolisi b’u Rwanda bagera muri Mozambique, abaturage benshi bamaze gusubira mu byabo ndetse basubukuye ibikorwa bitandukanye bibyara inyungu.

Nyuma yo kugarura amahoro mu duce u Rwanda rugenzura muri Cabo Delgado, mu bwumvikane bw’u Rwanda na Mozambique harimo gushyirwa imbaraga mu bijyanye no kongerera ubushobozi inzego z’umutekano z’icyo gihugu binyuze mu myitozo n’amahugurwa, ari nacyo cyiciro gitahiwe.

Perezida Paul Kagame yagize umwanya wo gutembera Maputo
Aba baturage bacuruza amafi bishimiye gusurwa na Perezida Paul Kagame
Byari ibyishimo kuri aba baturage basuwe na Perezida w'u Rwanda, Paul Kagame
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza