IGIHE

Perezida Kagame yagaragaje ‘ukwigirira icyizere’ nk’ishingiro ry’iterambere ry’u Rwanda

6 12-02-2019 - saa 13:41, Ishimwe Israel

Perezida Kagame yatangaje ko abantu bakorera hamwe nta mbogamizi zababuza kugera ku ntego bihaye, anashimangira ko isomo u Rwanda rwakuye mu rugendo rw’iterambere ryarwo rishingiye ku kwizera ko ahazaza ari heza.

Umukuru w’Igihugu yabitangarije i Dubai muri Leta Zunze Ubumwe z’Abarabu (UAE) mu kiganiro yahaye abitabiriye Inama ya Karindwi ya za Guverinoma (World Government Summit) kuri uyu wa 12 Gashyantare 2019.

Iyi nama ngarukamwaka yitabiriwe n’abantu basaga 4000 bo mu bihugu 140 byo ku Isi. Barimo abakuru b’ibihugu na Guverinoma zitandukanye, imiryango mpuzamahanga n’inzobere.

Ifite intego yo kwiga ku mikorere myiza ya za Guverinoma mu gihe kiri imbere, hagamijwe kurebera hamwe uburyo guhanga udushya n’ikoranabuhanga byakwifashishwa mu gukemura ibibazo bibangamiye ikiremwamuntu.

Perezida Kagame yashimye UAE, igihugu yavuze ko kibereye byinshi icyitegererezo birimo n’u Rwanda, kubera urugero cyatanze rwo guha agaciro abantu n’abikorera mu iterambere.

Yagize ati “Mweretse Isi uko icyerekezo, imiyoborere no kwita ku mutungo kamere bihindura ibyari bikomeye mo ubukungu. Mu myaka 25 ishize mu Rwanda twubatse igihugu gishya gishingiye ku ndangagaciro z’ubumwe n’amahirwe ku benegihugu bose.’’

U Rwanda rwitabiriye iyi nama nk’umutumirwa, rwahawe umwanya wo kwerekana iterambere rwagezeho mu buhinzi n’ubukerarugendo.

Umukuru w’Igihugu yavuze ko “Twateye intambwe mu myaka yashize ariko hari ibigikeneye gukorwa. Ibi ntibyari kugerwaho bitubakiye ku musingi uhamye. Hari byinshi twari dukeneye gushyira ku murongo.’’

Iterambere ry’u Rwanda ryubakiye ku kubaka imyumvire ituma abayobozi n’ibigo bikora bigamije guhaza ukwifuza kw’abaturage ndetse na bo bakagira uruhare mu kugena ahazaza bifuza.

Perezida Kagame yakomeje ati “Niba hari isomo ku byo u Rwanda rwanyuzemo ni ukubona ko ibintu byose bishoboka. Niba u Rwanda rushobora kugera kuri iyi ntambwe, bivuze ko nta mbogamizi zitakurwaho mu gihe abantu bakorera hamwe kandi bafite intego bahuriyeho.’’

Igihugu kandi cyanubakiye ku gusubiza uburenganzira bukwiye buri wese, hanibandwa ku bagore umuco Nyarwanda wahezaga, bigatuma batagaragaza uruhare rwabo mu iterambere.

Kagame yasobanuye ko politiki nziza yazanye ubushake n’imbaraga zafashije Abanyarwanda gushaka umuti w’ibibazo by’ingutu bishingiye ku mateka igihugu cyanyuzemo.

Ati “Guverinoma yashyize imbaraga mu guha agaciro abaturage nk’umutungo warwo, inubaka ibikorwa remezo n’ikoranabuhanga riganisha ku bukungu bw’ahazaza. Nubwo ubushobozi buhari budahura neza n’intego zacu, umutungo dufite twagerageje kuwubyaza umusaruro, tunashaka ubundi buryo bwo kuziba ibyuho bihari.’’

“Imiyoborere myiza no kuzuza inshingano biri mu mutima w’ibyo dukora. Mu Rwanda turaharanira gurandura ruswa n’ivangura muri sosiyete yacu, byari bigiye kurindimura igihugu.’’

U Rwanda kandi ruri muri gahunda yo kubaka ubukungu bushingiye ku bumenyi bujyana no guhanga udushya no kwihangira imirimo.

Igihugu cyanateye indi ntambwe igaragaza uko cyiteguye kwihuza n’ibindi byo muri Afurika, umugabane uzaba utuwe n’abaturage miliyari 2,5 mu 2050.

Ni icyerekezo kizafasha kubaka ubukungu bw’u Rwanda, rwamaze no kwemeza burundu amasezerano ashyiraho Isoko rusange rya Afurika (AfCFTA), azatangira gushyirwa mu bikorwa mu 2019.

Iri soko rihuriraho miliyari 1.2 z’abaturage, ryitezweho koroshya ubuhahirane hagati y’ibihugu bya Afurika, rifite umusaruro mbumbe wa tiriyali 2.19 z’amadolari ya Amerika.

Rwanagaragaje ubushake muri gahunda yo guhuza ikirere mu bijyanye n’Ubwikorezi bw’Indege (Single African Air Transport Market).

Perezida Kagame yashimangiye ko “Dushaka ko urubyiruko rw’Abanyarwanda na bagenzi barwo bakorana. Dufite inshingano zo guharanira ko urubyiruko rwa Afurika rugira uruhare mu iterambere ry’umugabane warwo. Ni inshingano zacu kurwubakamo ubushobozi burufasha guhangana no gutsinda ku rwego mpuzamahanga. Tugomba kubyitaho kandi birashoboka.’’

Perezida Kagame yavuze ko abantu bakorera hamwe nta mbogamizi zababuza kugera ku ntego bihaye
Yabereye i Dubai muri Leta Zunze Ubumwe z’Abarabu (UAE)
Iyi nama ngarukamwaka yitabiriwe n’abantu basaga 4000 bo mu bihugu 140
Uhereye ibumoso ni Sheikh Mohammed bin Rashid Al Maktoum, Visi Perezida akaba na Minisitiri w'Intebe wa UAE, Perezida Kagame (hagati) n'uwimye ingoma ya UAE, Sheikh Mohammed bin Zayed bin Sultan Al-Nahyan
Perezida Kagame na Sheikh Mohammed bin Zayed bin Sultan Al-Nahyan,
Perezida Kagame na Visi Perezida wa Costa Rica, Epsy Campbell Barr

Amafoto: Village Urugwiro

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Elisa 2019-02-13 07:33:15

Nkunda ko perezida kagame uturemamo ikizere nkabanyarwanda uko bwije nuko bukeye

2
Elisa 2019-02-13 07:33:15

Nkunda ko perezida kagame uturemamo ikizere nkabanyarwanda uko bwije nuko bukeye

3
Elisa 2019-02-13 07:33:14

Nkunda ko perezida kagame uturemamo ikizere nkabanyarwanda uko bwije nuko bukeye

4
Elisa 2019-02-13 07:33:14

Nkunda ko perezida kagame uturemamo ikizere nkabanyarwanda uko bwije nuko bukeye

5
Elisa 2019-02-13 07:33:14

Nkunda ko perezida kagame uturemamo ikizere nkabanyarwanda uko bwije nuko bukeye

6
NDACYAYISENGA Jean de Dieu 2019-02-13 01:02:26

Ibyo perezida kagame
yavuze ntawabihakana
kereste utazi aho urwanda rwavuye ubwo
ninawe utazi aho ruri
ubuyobozi bwiza bugira
igihugu kiza perezida
kagame urwanda rwamubonye rumukeneye
niwe byose tubikesha.

Kwamamaza