IGIHE

Opération Umoja Wetu, urugamba rw’iminsi 35 Ingabo z’u Rwanda zihashya FDLR muri Congo

1 18-11-2020 - saa 14:34, Philbert Girinema

Imyaka 11 irashize Ingabo z’u Rwanda zigiye muri Repubulika Iharanira Demokarasi ya Congo mu bikorwa bya gisirikare, byari bigamije gutsinsura umutwe wa FDLR wari uri kwisuganya mu bikorwa bigamije guhungabanya umutekano w’u Rwanda no kongera gukora Jenoside mu gihugu.

Ni operasiyo (opération) yamaze iminsi, 35 isiga bamwe mu barwanyi b’uyu mutwe bishwe, abandi bamanitse amaboko.

Tariki ya 5 Ukuboza 2008, abari Abaminisitiri b’Ububanyi n’Amahanga ba Congo n’u Rwanda, Alexis Thambwe Mwamba na Rosemary Museminali bahuriye i Goma, basinya itangazo rivuga ko hagiye gushyirwaho ibikorwa bya gisirikare byiswe Umoja Wetu, bihuriweho n’ibihugu byombi, hagamijwe kurwanya FDLR.

Nyuma y’iminsi 25 gusa bemeje ibyo bikorwa bya gisirikare, uwari Minisitiri w’Ingabo za RDC, Charles Mwando na Gen Marcel Gatsinzi wari Minisitiri w’Ingabo w’u Rwanda, bahuriye i Rubavu banoza umugambi n’uburyo icyo gikorwa kizagendamo.

Hashize iminsi mike tariki ya 8 Mutarama 2009, Uwari Umugaba Mukuru w’Ingabo z’u Rwanda, Gen James Kabarebe yagiye i Kinshasa, abonana n’uwari mugenzi we wa RDC, Gen Didier Etumba, anabonana na Perezida Joseph Kabila mu rwego rwo kuganira ku bijyanye n’ubufatanye mu by’umutekano hagati y’ibihugu byombi.

Bwarakeye Lt Gen John Numbi Banza Tambo wari Umuyobozi w’ibikorwa bya gisirikare mu Burasirazuba bwa Congo na Gen James Kabarebe, bashyira umukono ku masezerano agena imiterere y’ubufatanye hagati y’Ingabo za Congo n’u Rwanda mu guhashya FDLR no gucyura mu Rwanda abari bayigize n’abo yagize ingwate.

Ayo masezerano yasobanuraga mu buryo butomoye ko Interahamwe zahungiye muri Congo zimaze gukora Jenoside, abahoze muri EX-FAR ndetse n’abagize umutwe wa FDLR bose hamwe bari hagati ya 7000 na 8000, bari bahuriye ku mugambi wo kugaruka mu Rwanda bakongera bagakora Jenoside, ariko ku ikubitiro bagakuraho ubuyobozi bwagize uruhare mu kuyihagarika.

Nubwo bari barahunze ariko, icyo gihe aba barwanyi bari bafite ibikoresho bya gisirikare bikomeye ndetse bahabwaga n’inkunga iturutse mu mahanga, mu banyarwanda babashyigikiye.

Icyo gihe aba basirikare bakuru ku ruhande rw’ibihugu byombi bari bafite amakuru agaragaza ko FDLR yiganje muri Kivu y’Amajyaruguru, Amajyepfo na Ituri. By’umwihariko abarwanyi bayo bari bari mu mashyamba ya Walikale, Mwenda na Shabunda.

Ahandi ni mu bice bya Walikale-Masisi by’umwihariko ahitwa Nyabiondo, Katoyi na Kibua, mu bice bya Kanyabayonga muri zone za Lubero na Rutshuru; mu bice bya Hombo muri Zone ya Shange.

Nubwo u Rwanda na RDC byisuganyaga ngo birwanyirize uyu mwanzi hamwe, ku rundi ruhande na we ntiyari yicaye ubusa kuko tariki ya 5 Mutarama 2009, FDLR yakoze inama yahuje abayobozi bayo bakuru yabereye ahitwa Kibua muri Kivu y’Amajyaruguru.

Yafatiwemo icyemezo ko batazahangana n’ingabo za “Umoja Wetu”, ko ahubwo abarwanyi bayo bagomba gutatana mu matsinda mato bakihisha Ingabo za FARDC na RDF, ubundi bakajya gusa bazigabaho udutero shuma.

Igikorwa nyirizina cyarabaye, kimara iminsi 35 uhereye tariki 20 Mutarama kugera ku ya – 27 Gashyantare 2009, gisiga uyu mutwe utatanyijwe ndetse agace wabarizwamo gahumetseho gato.

Kuri iyo tariki nibwo Ingabo z’u Rwanda zavuye muri RDC. Gusa ingabo z’ibihugu byombi zakomeje imikoranire irimo guhanahana amakuru no gufasha abashaka gutahuka mu Rwanda, kugeza mu 2012.

Tariki ya 25 Gashyantare 2012 nibwo igikorwa cyo gusoza imirimo ya Umoja Wetu, cyabereye i Goma, kiyoborwa na ba Minisitiri b’Ingabo za Congo n’u Rwanda, hari na ba Minisitiri b’Ububanyi n’Amahanga b’ibihugu byombi, uwari Umukuru wa Monusco, Alan Doss na ba Ambasaderi bahagarariye ibihugu biri mu Nama y’Umuryango w’Abibumbye ishinzwe Amahoro ku Isi.

Hishwe abarwanyi 153 ba FDLR

Lt Gen John Numbi Banza Tambo ni we wari uyoboye ibikorwa bya Umoja Wetu. Muri iyo minsi 35 gusa, iyi operasiyo yiciwemo abarwanyi 153 ba FDLR, hakomereka 13, hafatwa 37, naho 103 bava mu birindiro byabo bataha mu Rwanda ku bushake banyuze muri Monusco.

Ku ruhande rw’abasirikare ba Umoja Wetu, hapfuye umunani naho 12 barakomereka, gusa nta musivile n’umwe wapfuye kubera imirwano, uretse 32 bishwe na FDLR.

Mu barwanyi ba FDLR bafashwe cyangwa bakicwa muri Umoja Wetu, harimo bamwe mu bayobozi bakuru ba gisirikare nka komanda wungirije wa Brigade ya Mbere yari i Kibua i Masisi, Lt Col Anaclet Hitimana wari uzwi nka Gasasira Kabuyoya, wishwe tariki ya 28 Mutarama 2009. Mu ntangiriro za Gashyantare 2012, Umuvugizi wa FDLR, Lt Col Edmond Ngarambe na we yarafashwe azanwa mu Rwanda.

Iki gikorwa kimaze kurangira, Monusco yatangaje ko hagati y’itariki ya 1 Mutarama 2009 na 26 Gashyantare 2012, yakiriye abarwanyi 512 ba FDLR n’abantu 805 bo mu miryango yabo.

Muri icyo gihe kandi, Ishami ry’Umuryango w’Abibumbye ryita ku mpunzi ryatangaje ko ryaherekeje Abanyarwanda 3689 b’abasivile bagataha mu Rwanda; aho umubare wose w’abanyarwanda batahutse wari ugeze ku 5006 kuva mu ntangiriro za 2009 kugeza Umoja Wetu isojwe.

Iyi operasiyo yasize ubushobozi bwa FDLR bwo guhohotera abanye-Congo no kubuza abanyarwanda gutaha bugabanyijwe, abarwanyi batishwe cyangwa ngo batahe bakwira imishwaro.

Impamvu ni uko nyuma y’icyumweru kimwe gusa “Umoja Wetu” itangiye, FDLR yari imaze kwirukanwa mu Ntara za Rutshuru na Masisi, benshi mu barwanyi bayo bahungiye muri Pariki ya Virunga, abandi bakomeje mu Ntara za Maniema na Province Orientale.

Ni opération yahuye n’ibizazane

Mu mbogamizi zagaragajwe iyi operation yahuye nazo, harimo ko bamwe mu bari mu buyobozi bukuru bwa RDC batumvaga kimwe ubufatanye hagati y’Ingabo z’u Rwanda n’iza Congo.

Raporo yakozwe n’Inteko Ishinga Amategeko y’u Rwanda mu 2013 ku karengane gakorerwa u Rwanda hashingiwe ku mutekano muke mu Burasirazuba bwa RDC, igaragaza ko urwango bamwe mu bayobozi ba RDC bafitiye u Rwanda narwo rwagaragaye mu gihe cy’iyi operasiyo.

Iti “Muri Congo harimo ikintu cyo kutiyumvamo u Rwanda (Anti-Rwanda sentiment) ku buryo umunyapolitiki wese ushaka amajwi abizamura kugira ngo abone abayoboke. Iki kibazo nacyo cyaragaragaye muri Umoja Wetu”.

Nka Vital Kamerhe wari Perezida w’Inteko Ishinga Amategeko, icyo gihe yatangaje ko atemera ubufatanye hagati ya Congo n’u Rwanda, bituma iba imwe mu mpamvu zo gusezera ku mwanya we tariki ya 21 Mutarama 2009.

Hari kandi n’ingorane zaturutse ku Muryango w’Abibumbye by’umwihariko ingabo ziri mu butumwa bwawo muri RDC, Monusco, zitigeze zishyigikira ubufatanye bw’u Rwanda na RDC.

Iyo raporo yakozwe n’abarimo Dr Bizimana Jean Damascène wari Umusenateri, hari aho igira iti “Monusco yagaragaje ubushake buke mu gushyigikira ubu bufatanye bw’ibihugu byombi. Monusco yakomeje ahubwo gushaka ibirego, ntiyumvaga ko hari ikintu cyiza u Rwanda rwahuriraho na Congo.”

Ubwo Ingabo z'u Rwanda zari zikubutse muri 'Operation Umoja Wetu'
Ubwo Ingabo za RDF zari mu bikorwa byo kurwanya umutwe wa FDLR
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza