IGIHE

Nyamagabe: Ibibazo byahawe umurongo na Perezida Kagame bigeze he bikemurwa?

0 12-07-2019 - saa 08:55, Prudence Kwizera

Ubuyobozi bw’Akarere ka Nyamagabe butangaza ko ibibazo abaturage babajije Perezida wa Repubulika, Paul Kagame, ubwo aheruka kubasura bigeze kure bisubizwa.

Ubwo Perezida Kagame yasuraga Akarere ka Nyamagabe ku wa 26 Gashyantare 2019 yagejejweho ibibazo bitandukanye birimo iby’abambuwe, akarengane, serivisi itanoze n’ibindi.

Bimwe yarabisubije ibindi asaba ko ubuyobozi bw’inzego z’ibanze bufasha abaturage kubikemura bidatinze.

Umuyobozi w’Akarere ka Nyamagabe, Uwamahoro Bonaventure, yabigarutseho kuri uyu wa Gatatu ubwo basurwaga n’Umuvunyi Mukuru, Murekezi Anastase.

Umuvunyi Mukuru yabasuye muri gahunda yo kumva no kwakira ibibazo by’abaturage ndetse no kubikemura.

Kimwe mu bibazo Umukuru w’Igihugu yagejejweho ni icy’abaturage 15 bangirijwe imitungo ubwo hatunganywaga igishanga cya Cyogo muri 2013.

Uwitwa Mugambira Apollinaire wari uhagarariye bagenzi ni we wakibajije.

Icyo gihe Perezida Kagame yamubwiye ko cyumvikanye kandi ubuyobozi bw’Akarere ka Nyamagabe buzagikemura bidatinze.

Umuyobozi w’Akarere ka Nyamagabe, Uwamahoro Bonaventure, yavuze ko amafaranga yabo bangirijwe imitungo barimo na amaugambira bazayahabwa muri Nzeri 2019.

Yagize ati “Mu ngengo y’imari y’uyu mwaka twatangiye ejobundi ku ya 1 Nyakanga, harimo n’amafaranga yo kwishyura abaturage bagaragajwe na Komisiyo y’Inama Njyanama yari yashyizweho. Uko ari 15 bazayahabwa bitareze muri Nzeri uyu mwaka.”

Abo baturage bose uko ari 15 bazishyurwa amafaranga y’u Rwanda Miliyoni 14 n’ibihumbi 240.

Umuyobozi w’Akarere ka Nyamagabe, Uwamahoro Bonaventure, yavuze ko n’ibindi bibazo Perezida Kagame yagejejweho bageze kure babikemura.

Harimo icya Uwimana Liberée wari wavuze ko igice cy’ubutaka bwabo cyubatsweho Ibiro by’Umurenge wa Tare (ahahoze Komini Mudasomwa) ariko batishyuwe. Ubu ngo bamaze kwishyurwa.

Ikindi ni icya Nyirankundineza Yozefa wo mu Murenge wa Gatare wari wagaragaje ko yatwawe inka 14; yavuze ko bamaze kumufasha kugaruza umunani.

Hari kandi n’icya Mukeshimana Charlotte wo mu Murenge wa Gasaka wavuze ko imodoka yamugongeye umwana arapfa ariko ntiyahabwa indishyi. Ngo baragikurikiranye basanga yarishyuwe; kuri ubu bari kumuganiriza kugira ngo abashe kubyumva.

Yavuze kandi ko bageze kure bakemura ibibazo bibangamira imibereho myiza y’abaturage birimo umwanda n’imirire mibi.

Yavuze no ku kibazo cy’uwitwa Ntawushiragahinda Sẻlaphine wo mu Murenge wa Buruhukiro wari wabwiye Umukuru w’Igihugu ko yatwawe ubutaka avuga ko bakigikurikirana.

Yavuze kandi ko Ntawushiragahinda yari yabajije n’icyumutungo we wangijwe hakorwa umuhanda, avuga ko yamaze kubarirwa ari hafi kwishyurwa.

Yasobanuye ko ibibazo byose basigiwe na Perezida Kagame bari kubikurikirana ku buryo bwihariye kandi bagenda babitangira raporo.

Kuva mu Ntangiriro za Werurwe 2019 Guverineri w’Intara y’Amajyepfo, CG Gasana Emmanuel, yimuriye by’agateganyo ibiro mu Karere ka Nyamagabe mu rwego rwo kwita ku bibazo bihari by’umwihariko.

Yavuze ko ajyanywe no gufasha gukemura ibibazo birimo n’ibyabajijwe Umukuru w’Igihugu.

Bamwe mu baturage bo mu Karere ka Nyamagabe baje kugeza ibibazo byabo ku Muvunyi Mukuru
Mugambira Apollinaire yongeye kubaza aho ubwishyu bwabo bugeze ubwo Umuvunyi Mukuru yabasuraga kuri uyu wa gatatu
Umuvunyi Mukuru, Murekezi Anastase, aganira n'abaturage bo mu Karere ka Nyamagabe
Umuyobozi w’Akarere ka Nyamagabe, Uwamahoro Bonaventure, yavuze ko ibibazo byahawe umurongo n'Umukuru w'Igihugu bageze kure babikemura

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza