IGIHE

Ngoma: Abantu babiri barohamye mu mazi bagerageza koga barapfa

0 21-05-2020 - saa 20:31, Hakizimana Jean Paul

Abaturage babiri bo mu Murenge wa Mutenderi barohamye mu mazi barapfa ubwo bageragezaga kwambuka mu rufunzo rwuzuyemo amazi yaturutse mu Akagera kubera imvura nyinshi.

Urwo rufunzo rwaguyemo abantu babiri ruherereye mu Kagari ka Karwema mu Murenge wa Mutenderi mu Karere ka Ngoma.

Umunyamabanga Nshingwabikorwa w’Umurenge wa Mutenderi, Ngenda Mathias, yabwiye IGIHE ko abo baturage barohamye mu mazi nyuma yo gushaka kwambuka urufunzo rwuzuyemo amazi menshi yaturutse mu Akagera.

Ati “Umwe yapfuye mu ijoro ryakeye, bari abaturage bane babiri bari bavuye mu Murenge wa Jarama, abandi babiri bavuye mu Murenge wa Sake, bahurira mu rufunzo rutugabanya na Sake byari hafi saa Moya, ku gice cya Murenderi Akagera karamennye haruzuye, umwe rero yashatse koga ngo agere hakurya ararohama n’umugabo warugiye kumukuramo biramunanira.”

Yakomeje avuga ko mu gitondo cyo kuri uyu wa Kane ubwo bajyagayo gushakisha umurambo w’uwo musore ngo nabwo hahise haboneka undi mugabo w’imyaka 62 nawe washakaga kwambuka yakandagira mu mazi akarohama.

Ati “Ni ahantu haje amazi magari cyane, abaturage bamubujije aranga ariyambura imyenda ayishyira ku mutwe agikandagira mu mazi ngo yoge yambuke yahise aburirwa irengero niko kwinjiramo nawe dutangira kumushakisha.”

Kuri ubu umurambo umwe w’umugabo witwa Ndaberetse Jean Pierre wabonetse mu gihe undi ugishakishwa.

Ngenda yasabye abaturage kumvira ubuyobozi bakirinda gushaka kwinjira mu mazi ahantu ubuyobozi bwafunze ngo kuko aba afite imbaraga nyinshi.

Ati “Umuturage wifuza kujya mu Murenge wa Mutenderi aturutse Jarama na Sake akwiriye kuzenguruka agaca mu Murenge wa Kazo kuko urwo rufunzo rusa n’urukomeye cyane.’’

Kubera imvura nyinshi imaze iminsi igwa, ibishanga byinshi byegereye amazi y’Akagera byaruzuye ku buryo hari n’imirima yangiritse, abaturage bakaba basabwa kwirinda kuyajyamo bagiye koga.

Urufunzo ruhuza Umurenge wa Mutenderi na Sake rwaruzuye ku buryo abaturage badashobora kuhambuka
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza