IGIHE

Munyejabo yatangije ikigo kizajya cyakira abageze mu zabukuru mu Rwanda

0 30-11-2021 - saa 14:50, Karirima A. Ngarambe

Munyejabo Steven, umusore w’Umunyarwanda w’imyaka 37 y’amavuko, yatangije ikigo kizajya cyita ku bageze mu zabukuru mu Rwanda, yise Iwacu “Dignity Home Care”.

Munyejabo uvuka mu Rwintare mu karere ka Gasabo, yatangije iki kigo nyuma y’imyaka itatu atuye muri Canada mu mujyi wa Moncton, aho akora akazi k’Ubuforomo.

Mu rwego rwo kumenyekanisha ibikorwa n’abanyarwanda batuye mu Mahanga (Diaspora), IGIHE yegereye Munyejabo tugirana ikiganiro ku mushinga yatangije mu Rwanda nyuma y’imyaka itatu gusa agiye gutura muri Canada.

Munyejabo yavuze ko atagiye muri Canada kuko hari icyo yari yabuze mu Rwanda ahubwo ngo byari uburyo bwo gukomeza gushaka icyarushaho kumuteza imbere.

Ati “Nashakaga gukomeza gushaka uko nakora ibindi binteza imbere kurushaho, niyo mpamvu nicaye ntekereza kuri uyu mushinga Iwacu Dignity Home Care. Ntabwo byangoye cyane kuko aribyo nkoramo ni aha ntuye muri Canada.”

Yavuze ko Iwacu Dignity Home Care” ari ikigo kizajya cyakira abageze mu zabukuru, barimo abageze mu gihe cyo kujya mu biruhuko by’akazi (retraite). Bakira kandi abandi bageze mu zabukuru nk’abatangiye kugira indwara yo kwibagirwa, abafite ubumuga n’abandi.

Ati "Iki kigo Iwacu “Iwacu Dgnity Home Care” nagifunguranye ishyaka kuko bijyanye n’umwuga wanjye nigiye akaba ari nawo nkora hano muri Canada, n’imyaka 8 nabikozemo mu Rwanda mu bitaro bya Leta, nanakoze kandi mu Bitaro byigenga, njyeze aha rero muri Canada nakomeje gukora mu mazu ajyanye no kwita ku Basaza."

“Ibyo byose nibyo byatumye ngira umutima wo gutekereza ku musaza cyangwa umukecuru wo mu Rwanda uko yifata ageze mu za bukuru, natekereza ku batuye hano mu mahanga, mu Burayi, Amerika n’ahandi, bifuza kuzasazira mu Rwanda igihugu kavukire kandi gifite ibihe byiza.”

Yakomeje agira ati “Nasanze nkurikije ibyo nkoramo hano kandi mbona umunsi ku wundi, abagera mu zabukuru bakajya kuba muri ibi bigo bibakira, usanga babayeho neza kandi bitabwaho n’abanyamwuga babitojwe, babihugukiwe, ku buryo usanga umuntu afite abantu bagiye batandukanye mu bumenyi runaka amasaha atandukanye hagendewe kuri serivisi akeneye. Ibi nibyo byatumye nanjye nifuza gushinga iki kigo kugira ngo umunyarwanda agire amasaziro meza.”

Ibigo byakira abageze mu zabukuru ntabwo bisanzwe mu Rwanda. Munyejabo yabajijwe uburyo bazakoresha ngo babyumvishe Abanyarwanda, bumve akamaro kabyo.

Ati “Umubyeyi twakira, Tumugenera ibyo acyeneye bitewe n’icyiciro agezemo na serivisi akeneye muri rusange. Kubera iyo mpamvu twateganyije itsinda rigizwe n’abaganga, abize ibijyanye n’imitekerereze ku ndwara zo mu mutwe (psychologie Clinique), abize ubuforomo ikiciro cya kabiri cya Kaminuza, abo bantu bose baduha amakuru afatika kugira ngo tube twamenya icyo uje yifuza kuba muri “Iwacu Dignity Home Care” azakenera nk’ubufasha.”

Yongeyeho ati “Iri tsinda iyo rimaze gusuzuma neza uje gutura muri Iwacu Dignity Home Care, rimushyikiriza itsinda ry’abakozi bashinzwe kumwakira no kumwitaho, kandi nabo twahisemo abantu bafite ubushobozi n’ubunararibonye bakoze kwa Muganga, bafite impamyabushobozi mu Buforomo.”

Munyejabo yavuze ko kugeza ubu ikigo ntawe kirakira . Biteganyijwe ko bazatangirana n’ukwezi k’Ukuboza kandi aba mbere bamaze kwiyandikisha.

Yavuze ko ubu ikiri gukorwa ari ugutegura ibyangombwa byose kugira ngo abazaba muri Iwacu Dignity Home Care bazahagirire ubuzima bwiza.

Ati “Ubu turimo turita ku bikoresho bazajya bakoresha batembera, urumuri rujyanye n’abari muri iyo myaka, aho bazajya basomera, baganirira, barara n’ibindi byose bizajya bifasha umunyarwanda wese uzaza muri IDHC akabaho neza nkuko bigenda hano muri Canada cyangwa mu bindi bihugu byateye imbere cyane.”

Umuntu uzakirwa muri Iwacu Dignity Home Care agomba kuba afite ubwishingizi, kugira ngo mu gihe yahura n’ikibazo runaka nk’impanuka, yitabweho uko bikwiriye.

Ati “Dufitanye amasezerano y’ubufatanye n’Ibitaro byigenga igihe cyose bakaba batabara bibaye ngombwa na Ambulance y’imodoka yamugeraho byihuse, ariko byumvikane neza ntabwo muri IDHC ari ahakorewa ubuvuzi, ahubwo ni ahantu ho gucumbika, ho gutura nko mu rugo iwawe.”

Munyejabo yavuze ko bidakwiriye ko ababyeyi bakoze ibishoboka byose ngo bite ku bana babo, bo batereranwa mu gihe bakeneye ubitaho.

Ati “Icyifuzo cyanjye ni uko bariya babyeyi batureze bakadukuza, bakatwishyurira amashuri, bagakora ibishoboka byose ngo tubeho neza, ni iki twe dushobora kubitura uyu munsi? Bageze mu myaka yo kwitabwaho kuko barakoze.”

Munyejabo yavuze ko ibiciro bishingira ku isuzuma ryakozwe n’inzobere bitewe n’ibyo uje gutura myri IDHC azakenera. Mu bindi birebwaho harimo ubushobozi bw’uje kuhatura.

Abazakora muri urwo rugo rw’abakuze, bamaze guhugurwa ku buryo nta mpungenge kuri serivisi zizahatangirwa.

Ati “Dufite umuntu wize aha ngaha muri Canada wagiye guha amahugurwa abazakora bose muri IDHC n’ubwo bari babimenyereye nk’abaforomo ariko noneho bazita ku bageze cyane mu zabukuru, bakamenya uko bamuvugisha, bamwakira ibi bikaba bitandukanye n’uko bakira umurwayi kwa Muganga uje kwivuza.”

Munyejabo yavuze ko nta kigero cy’imyaka ku bazajya bakirwa muri IDHC, kuko bifuza ko haba ahagendwa na bose.

Ati “Hari nk’umuntu ushobora guturuka kure ariko ashaka kuzajya kwivuza mu Burayi, agaturuka aho atuye mu kandi karere kamwe k’u Rwanda akaza akaba ategerereje Iwacu. Umubyeyi cyangwa undi muntu ashobora kuba afite rendez vous na Muganga muri Kigali ariko aturutse kure, ashobora kuza na we tukamwakira igihe gito cyangwa ase aragarutse avuye mu mahanga akaba yabanza akaruhukira muri IDHC.”

Munyejambo akomeza agira ati “Serivisi yacu ni ukwita ku bantu cyane bari mu kigero cy’izabukuru ariko n’abandi bafite ibibazo byihariye bikeneye ubufasha mu buzima. Haba hari abavukanye ubumuga cyangwa n’ababana n’ubumuga, ibyo nabyo ni ibyiciro bayo tuzajya twakira.”

Uretse kwita ku batuye muri IDHC, Munyejabo yavuze ko n’abazajya bakenera serivisi z’icyo kigo bari mu ngo zabo, biteguye kubafasha.

Iwavu Dignity Home Care izajya ikorera mu nyubako igizwe n’ahantu hazajya hakirirwa abantu b’ibyiciro bine. Hari ahazakirirwa abageze mu za bukuru bakeneye gusa kuba bari aho biruhukira, ahagenewe gufasha abafite ubumuga, aho kwakirira undi ufite ikibazo cy’ubuzima, akeneye cyane ubufasha bwo kumuba hafi mu miti afata n’ibindi bisaba ubunyamwuga.

“Iwavu Dignity Home Care” ikorera mu Mujyi wa Kigali mu Karere ka Gasabo mu murenge wa Jabana. Ukeneye ibisobanuro byimbitse wahamagara kuri +250 791 434 761 cyangwa ugasura urubuga www.iwacuhome.care.rw .

Steven Munyejabo washinze « Iwacu Dignity Home care »
Inyubako « Iwacu Dignity Home care » ikoreramo
Iwavu Dignity Home Care” ikorera mu Mujyi wa Kigali mu Karere ka Gasabo mu murenge wa Jabana.
Iwacu Dignity Home care ni urugo ruzajya ruha umutuzo abarujemo ari nacyo abarushinze bashyize imbere

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza