IGIHE

Mukabalisa yaganiriye na mugenzi we wa Tanzania ku bufatanye mu mishinga ibihugu byombi bisangiye

0 10-06-2019 - saa 22:31, IGIHE

Mu ruzinduko Perezida w’Inteko Ishinga amategeko y’u Rwanda, Donatille Mukabalisa, yagiriye muri Tanzania guhera kuri iki Cyumweru, yagiranye ibiganiro na mugenzi we uyobora Inteko Ishinga amategeko ya Tanzania, Job Ndugai, byibanze ku gukomeza guteza imbere umubano w’Inteko Zishinga Amategeko z’ibihugu byombi.

Perezida w’Umutwe w’Abadepite Mukabalisa ari kumwe n’itsinda ry’Abadepite rigizwe na Depite Ngabitsinze Jean Chrysostome na Depite Rubagumya Furaha Emma.

Nk’uko Inteko Ishinga amategeko y’u Rwanda yabitangaje, Mukabalisa yakiriwe i Dodoma ku Kibuga cy’Ingoro Ishinga Amategeko ya Tanzania na Perezida w’Umutwe w’Abadepite, Job Ndugai ari na Visi Perezida Dr Tulia Ackson n’itsinda ry’abandi badepite.

Mukabalisa yarangije Abadepite bo muri Tanzania uburyo u Rwanda rwageze ku mubare mwiza w’abagore bari mu Nteko Ishinga Amategeko ndetse n’uruhare rwabo mu guharanira imibereho y’abaturage n’iterambere ry’igihugu.

Itangazo ryashyizwe ahagaragara rikomeza riti “baganiriye kandi ku bufatanye by’Inteko Zishinga Amategeko zombi mu mishinga ibihugu byombi byiyemeje mu bijyanye n’umutekano, ubuzima, uburezi, kubaka ubushobozi, ubucuruzi n’ibikorwa by’umwihariko kubaka inzira ya Gare ya Moshi Isaka-Kigali no mu by’ingufu.”

“Aba bayobozi b’Inteko zishinga Amategeko bakomoje ku biganiro by’ubufatanye bw’ibihugu mu iterambere ry’Akarere byaranze mu bihe bitandukanye ingendo z’Abakuru b’ibihugu byombi; Perezida John Pombe Mugufuli wa Tanzania na Paul Kagame w’u Rwanda.”

Muri uru ruzinduko rw’iminsi itatu, Perezida w’Umutwe w’Abadepite Nyakubahwa Donatille Mukabalisa biteganyijwe ko azabonana n’abagize Komite Nshingwabikorwa y’Ihuriro ry’Abagore bari mu Nteko Ishinga Amategeko ya Tanzania.

Azahura kandi na bamwe mu bayobozi bakuru b’igihugu barimo Minisitiri w’Intebe Kassim Majaliwa na Minisitiri w’Ububanyi n’Amahanga, Ubutwererane n’Umuryango w’Afurika y’Iburasirazuba bo muri Tanzania, Palamagamba Kabudi.

Perezida w'Umutwe w'Abadepite, Donatille Mukabalisa yakiriwe na Perezida w'Umutwe w'Abadepite muri Tanzania, Job Ndugai
Perezida w'Umutwe w'Abadepite, Donatille Mukabalisa n'itsinda ry'abadepite ayoboye bari mu ruzinduko muri Tanzania baganiriye na bagenzi babo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza