IGIHE

Minisitiri w’Intebe wa Canada aragera i Kigali mu masaha make

0 22-06-2022 - saa 14:04, IGIHE

Minisitiri w’Intebe wa Canada, Justin Trudeau, ategerejwe mu Mujyi wa Kigali kuri uyu wa Gatatu, tariki ya 22 Kamena 2022, aho yitabiriye Inama y’Abayobozi Bakuru b’Ibihugu na za Guverinoma zo mu Muryango w’Ibihugu bikoresha Icyongereza, CHOGM.

Minisitiri w’Intebe wa Canada Trudeau n’itsinda rigizwe n’abamuherekeje bahagurutse muri Canada mu rukerera rwo kuri uyu munsi.

Inama ya CHOGM yitabiriye, ni imwe mu zo ku rwego rwo hejuru ihuza ibihugu bivuga Icyongereza, muri uyu mwaka yateraniye i Kigali ku wa 20-26 Kamena 2022.

Mbere yo guhaguruka, Trudeau, yateguje iby’urugendo rwe mu Rwagasabo, mu butumwa buri mu Gifaransa n’Icyongereza bwanyujijwe ku rukuta rwe rwa Twitter.

Yagize ati “Mu minota mike, turahaguruka twerekeza mu Rwanda. Nzakorana n’abayobozi mu gushaka ibisubizo by’ibibazo ibihugu byinshi bifite birimo ingaruka zatewe n’intambara y’u Burusiya muri Ukraine, imihindagurikire y’ibihe n’ubuzima burushaho guhenda. Hari byinshi bizava muri #CHOGM2022.’’

Justin Trudeau, agiye gusura u Rwanda mu gihe mu minsi ishize yagiranye ikiganiro na Perezida Paul Kagame, cyibanze ku mubano w’ibihugu byombi n’ingingo zireba isi muri rusange, bifitemo inyungu.

Ni ikiganiro cyabaye kuri telefoni ku wa Kane w’icyumweru gishize, mu gihe abayobozi bombi bitegura guhurira muri CHOGM.

Mu butumwa yanditse kuri Twitter, Perezida Kagame yagize ati "Niteguye kumwakira muri #CHOGM2022 mu cyumweru gitaha hamwe n’abandi bayobozi kandi nizeye kwagura ibiganiro byacu n’ubutwererane."

Abayobozi bombi mu kiganiro cyabo bibanze ku ntego n’inzira zo guteza imbere Commonwealth, hibandwa ku mihindagurikire y’ibihe, guhanga akazi ku rubyiruko no guhanga udushya.

Minisitiri w’Intebe, Justin Trudeau, yanikije ku bihugu byo muri Commonwealth agaragaza ko bikeneye guteza imbere demokarasi no kwimakaza uburenganzira bwa muntu bijyanye n’amahame agenga uyu muryango.

Perezida Kagame na Minisitiri w’Intebe, Justin Trudeau, banaganiriye ku ngaruka Afurika yagizweho n’intambara u Burusiya bwagabye kuri Ukraine yatumye ibiciro bitumbagira by’umwihariko kuri uyu mugabane.

Inama ya CHOGM yitabiriwe n’abantu barenga 5000, bazaturuka mu bihugu 54 bigize uyu muryango wa Commonwealth.

Canada ni kimwe mu bihugu byatangiranye na Commonwealth ubwo yashingwaga mu 1926, mu gihe u Rwanda rwinjiye muri uyu muryango mu 2009. Uyu muryango uhuriza hamwe abaturage miliyari 2,6 bo ku migabane yose y’Isi.

Minisitiri w’Intebe wa Canada, Justin Trudeau, ategerejwe mu Mujyi wa Kigali
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza