IGIHE

Major. Gen Kazura yibukije abasirikare kubahisha umuco wabo mu butumwa bw’amahoro

1 12-01-2019 - saa 12:36, N.Kubwimana Janvière

Umuyobozi w’ishuri rikuru rya Gisirikare riherereye mu Karere ka Musanze, Gen. Major Jean Bosco Kazura, yibukije abasirikare biga muri iri shuri kujya bamenyekanisha bakanubahisha umuco wabo mu butumwa bw’amahoro baba bagiyemo hirya no hino ku Isi.

Ni ubutumwa bahawe kuri uyu wa Gatanu mu muhango wo kumurika imico itandukanye ya buri gihugu, hagamijwe gufasha no gusobanurira aba basirikare imico itandukanye ngo bizabafashe kunoza akazi kabo mu butumwa bw’amahoro bajyamo.

Uyu muhango wabaye ku nshuro ya kane wahuje abiga muri iri shuri baturuka mu bihugu 10 byo muri Afurika.

Gen. Major Kazura ari na we muyobozi w’ishuri rikuru rya Gisirikare yibukije aba basirikare ko bagomba kubahisha umuco wabo bakanubaha uw’abandi

Yagize ati “Abanyeshuri biga muri iri shuri baturuka mu bihugu 10 byo muri Afurika, bafite imico itandukanye ariko bakora akazi kamwe, ni byiza ko bamenyana mu mico yabo itandukanye kuko bishoboka ko bazajya ahantu hatandukanye mu kazi. Ikindi tubibutsa ni ukujya bamenyekanisha umuco wabo aho bari bakanawubahisha, ariko bakanubaha uw’abandi”.

Bamwe mu bari bitabiriye iri serukira muco bavuga ko ari irindi somo ryiyongera kuyo bize ribafasha kunoza akazi bakora mu butumwa bw’amahoro bajyamo hirya no hino ku Isi.

Major John Mbale uturuka mu gihugu cya Zambia yagize ati “Tugira amasomo atandukanye duhabwa mu bya gisirikare, ubu buryo bwo gusangizanya ubunararibonye mu muco w’ibihugu bitandukanye, nabyo tubifata nk’isomo ry’ingenzi ryiyongera mu yandi, ubu uyu munsi ndi mu Rwanda ariko ejo nshobora kujya ahandi, kujyayo nzi umuco waho, nzi uko bambara, barya, imbyino n’ibindi bikamfasha kurushaho kwegerana nabo no kunoza akazi mba nagiyemo”.

Umukuru w’Intara y’Amajyaruguru Gatabazi Jean Marie Vianney, avuga ko ingabo zirangwa no gufatanya ndetse no gutabarana bifitanye isano ya hafi mu kumenyana mu muco.

Yagize ati “Ubundi ingabo zirangwa no gufatanya no gutabarana, kugira ngo ibi bigende neza ni ngombwa ko baba baziranye bihagije bifitanye isano ya hafi no kumenyana mu mico itandukanye, tunashimira ingabo z’u Rwanda uburyo zisangiza abandi ubunararibonye bafite mu kazi kabo, bakanarahura ubw’ahandi byose bidufasha kubaka ubumwe bw’abanyarwanda n’Afurika muri rusange”.

Ishuri rikuru rya Gisirikare rihereye mu Karere ka Musanze, ubu ryigamo abasirikare bakuru 48 barimo 33 b’abanyarwanda. Bose baturuka mu bihugu 10 by’Afurika aribyo: u Rwanda, Kenya, Ghana, Nigeria, Malawi, Senegal, Zambia, Tanzania, Uganda na Ethiopia.

Abagaragaje umuco w'imbyino bari kumwe n'abayobozi
Bamwe mu banyeshuri biga mu ishuri rikuru rya gisirikare bari kumwe n abayobozi batandukanye
Guverineri Gatabazi yizihiwe afatanya n'abamurikaga umuco wo kubyina
Hanagaragajwe imico itandukanye mu biribwa
Hagaragajwe imico itandukanye mu mbyino
Umuyobozi w'ishuri rya gisirikare Gen. Maj Jean Bosco Kazura yasabye abasirikare kubahisha umuco wabo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Steven 2019-01-12 14:51:31

Murakoze kurayo makuru ariko mwakosoraho gato abanyeshuri bahiga ni 48 ahokuba 47 mwanditse. Murakoze.

Kwamamaza