IGIHE

Maj Pierre Claver Karangwa ukekwaho uruhare muri Jenoside yafatiwe mu Buholandi

0 13-05-2022 - saa 16:06, Akayezu Jean de Dieu

Ubushinjacyaha bwa Leta y’u Buholandi bwatangaje ko bwataye muri yombi Maj Pierre Claver Karangwa, wahoze mu Ngabo za Leta yateguye ikanashyira mu bikorwa Jenoside yakorewe Abatutsi akaba akekwaho kuyigiramo uruhare.

Maj Karangwa w’imyaka 65 wari wihishe muri icyo gihugu kuva mu 1998, yafashwe na Polisi y’Igihugu cy’u Buholandi ku wa Gatatu tariki 11 Gicurasi 2022, aho yasanzwe ahitwa Ermelo.

U Rwanda rwari yaramushyiriyeho impapuro zo kumuta muri yombi aho akekwaho uruhare muri Jenoside binyuze mu bitero karundura byo kurimbura Abatutsi b’ahitwa mu Bibugo bya Muiinga ndetse no muri Paruwasi ya Mugina mu Karere ka Kamonyi.

Mu 1994, Maj Karangwa yari umusirikare mukuru [ofisiye] muri Gendarmerie, bikaba bivugwa ko uretse i Mugina yanagize uruhare mu iyicwa ry’Abatutsi muri Kigali.

Ibyo twamenye ku ruhare rwa Maj Karangwa muri Jenoside

Amakuru IGIHE yamenye avuga ko uyu mugabo yavukiye mu yahoze ari Segiteri ya Mugina, ubu ni mu Karere ka Kamonyi.

Mu myaka ya 1992-1993 yari mu rwego rw’ubutasi rwa EX-FAR. Mu Ukuboza 1993 yari umukozi w’ubutumwa bw’amahoro bwa Loni [UNAMIR].

Uyu mugabo yaje kujya mu ishami rya Gendarmerie [Polisi] ari naryo yabarizwagamo mu 1994, igihe Jenoside yakorewe Abatutsi yabaga.

Nk’umuntu wari umusirikare mukuru, yakoranaga bya hafi n’ubuyobozi mu itegurwa n’ishyirwa mu bikorwa ry’ubwicanyi bwakorewe muri Paruwasi ya Mugina, akaba kandi ngo yaragemuriraga intwaro, Interahamwe zicaga Abatutsi.

Bivugwa ko Maj Karangwa yagiye anayobora inama zategurirwagamo ibitero byo kwica Abatutsi ndetse ngo yagize uruhare mu iyicwa ry’uwari Burugumesitiri wa Mugina utari ushyigikiye Jenoside.

Paruwasi ya Mugina iherereye mu Kagari ka Mbati, Umurenge wa Mugina, Akarere ka Kamonyi.

Muri Jenoside Paruwasi ya Mugina yahungiyeho Abatutsi baturutse imihanda yose barimo abaturutse mu Bugesera, Kigali y’Umujyi, Kigali Ngari no mu Makomini yari aturanye na Komine Mugina.

Hari Abatutsi benshi ku buryo bari baziko bazirwanaho nta kibazo bazagira, ariko biza kurangira abicanyi bazanye intwaro zirimo imbunda na za gerenade.

Amaze imyaka irenga 20 yidegembya mu Buholandi

Maj Pierre Claver Karangwa, yahawe icyemezo cy’ubuhunzi bw’u Buholandi mu 1999, ndetse mu 2002 yaje kubona ubwenegihugu.

Nyuma yo kumenyekana ko akekwaho uruhare muri Jenoside yakorewe Abatutsi, Urwego rushinzwe Abinjira n’Abasohoka, mu 2013, nibwo rwafashe icyemezo cyo kumwambura ubwenegihugu.

Icyemezo cyo kumwambura ubwenegihugu yaje kukijuririra mu rukiko ndetse ruza gutesha agaciro ubujurire bwe, bityo ku wa 11 Gicurasi 2022, ahita atabwa muri yombi.

Biteganyijwe ko uyu mugabo ahita ashyikirizwa Urwego rw’Umuryango w’Abibumbye, Rwashyiriweho Gukora Imirimo yasizwe n’Inkiko Mpanabyaha ari narwo ruzanzura aho azaburanishirizwa.

Karangwa ni umwe mu basirikare bari bakomeye mu gihe cya Jenoside yakorewe Abatutsi wanayigizemo uruhare
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza