IGIHE

Madamu Jeannette Kagame yitabiriye itangwa ry’impamyabumenyi ku barangije muri UGHE

3 12-08-2019 - saa 08:57, Ferdinand Maniraguha

Madamu Jeannette Kagame yitabiriye umuhango wo gutanga impamyabumenyi z’icyiciro cya gatatu cya Kaminuza mu bijyanye n’ubuvuzi rusange muri Kaminuza Mpuzamahanga y’Ubuvuzi (University of Global Health Equity, UGHE) iherereye i Butaro mu Karere ka Burera.

Uyu muhango wabaye kuri iki Cyumweru ku cyicaro cy’iyo kaminuza, ahatanzwe impamyabumenyi ku banyeshuri 46 mu bijyanye n’ubumenyi mu buvuzi rusange, baturuka mu bihugu 11 byo hirya no hino ku Isi.

Ni ubwa mbere uyu muhango ubereye mu nyubako bwite z’iyi Kaminuza zatashywe na Perezida Paul Kagame muri Mutarama uyu mwaka mu Karere ka Burera.

Intego z’iyi kaminuza ni uguhugura abanyeshuri bakajya guteza imbere imitangire y’ubuvuzi rusange mu bice by’icyaro.

Minisitiri w’Ubuzima, Dr Diane Gashumba, yavuze ko ari iby’ingenzi kuba iyo kaminuza yahaye impamyabumenyi abanyeshuri ku nshuro ya gatatu, ashimangira ko bigaragaza iterambere imaze kugeraho.

Yasabye abahawe impamyabumenyi kwita ku ntego z’ishuri aho bagiye mu buzima busanzwe, baharanira gutanga serivisi z’ubuvuzi bunoze ku batishoboye n’abari ahatari ubuvuzi buteye imbere.

Ati “Ibi ni intangiriro nshya mu mwuga wanyu aho mugiye kwita ku batagira kivurira kandi mukaba inkwakuzi mu gutanga ubuvuzi rusange bushingiye ku bimenyetso. Mwabaye bamwe mu muryango w’abarajwe ishinga n’ubuzima bwiza bw’abaturage. Ni mwe twitezweho guhangana n’ibibazo bikomeye byibasiye ubuvuzi rusange muri iki gihe, ni mwe dutezeho impinduka.”

Yasabye abo banyeshuri kutihanganira ibibazo byugarije urwego rw’ubuvuzi ahubwo bagakora ku buryo babishakira ibisubizo.

Yavuze ko Guverinoma y’u Rwanda izakomeza kubaba hafi, hagamijwe iterambere rusange.

Ati “Nizeye ko nidukorera hamwe tugakora neza bizagirira akamaro abaturage benshi, bikanagirira akamaro igihugu cyacu kandi nizeye ko bishoboka. Guverinoma izakora igishoboka cyose ngo tugire abaganga beza hirya no hino mu gihugu.”

Umuyobozi Mukuru w’Umuryango Partners in Health wagize uruhare mu iyubakwa ry’iyi kaminuza, Dr Paul Farmer, yavuze ko gukora ibigirira benshi akamaro atari ngombwa ngo ube uri mu mwanya ukomeye, ko uwo ari wo wose wawukoramo igikwiriye.

Farmer yibukije abanyeshuri bahawe impamyabumenyi ko badakwiriye kwitwaza amikoro make ngo bananirwe gutanga umusaruro, kuko urwitwazo nk’urwo rutuma hari byinshi bitagerwaho kandi bishoboka.

Ati “Uzumva abantu benshi bavuga ngo nta bushobozi dufite, ubwo ni uburyo bwo kwikumira kuko kuva muntu yabaho ibyo niko bimeze. Nureka ibyo bigakomeza kugenda gutyo uzaba uri guha urwaho kwa kwihangana ndetse binakubuze kumenya niba ikintu cyabyazwa umusaruro cyangwa cyitawubyara.”

Umwe mu banyeshuri basoje amasomo, Nicole Jabo, yabwiye IGIHE ko ubumenyi yavanye muri UGHE agiye kubwifashisha akemura bimwe mu bibazo bibangamiye urwego rw’ubuvuzi mu Rwanda.

Jabo wize by’umwihariko iby’ubuzima bukomatanyije (One Health) ni ukuvuga ishami rikubira hamwe ubuzima bwa muntu, ubw’inyamaswa n’ibidukikije, yavuze ko hari umusanzu yatanga mu kwirinda ko Ebola yinjira mu Rwanda.

Yagize ati “Ebola ni ikibazo gifite aho gihuriye n’ibyo bintu byose. Ndashaka ko nk’u Rwanda tuzabasha kwikingira bihagije kandi tugaharanira ko ibibazo nk’ibyo bitazagaragara hano mu Rwanda ku bufatanye na Guverinoma.”

Dusabe Leila ukomoka mu Burundi yashimangiye ko ubumenyi bahawe na UGHE bufite akamaro kanini mu guteza imbere ubuvuzi mu bihugu bya Afurika bikunze guhura n’imitangire ya serivisi z’ubuvuzi ziri hasi.

Umuyobozi wa Kaminuza ya UGHE, Dr Agnes Binagwaho, yavuze ko bizeye impinduka mu mitangire ya serivisi z’ubuvuzi ku batishoboye nyuma y’abanyeshuri bashya bahawe impamyabumenyi.

Yavuze ko byinshi mu byo bigishijwe harimo imicungire y’ibitaro, gufata neza abakozi n’imitangire ya serivisi bizeye ko bizakemura bimwe mu bibazo byajyaga bigaragara.

Ati “Murabizi abaganga bakora neza iyo bari kuvura ariko nibo dufata bakajya kuyobora ibitaro kandi batabizi. Ni nko gufata umuntu wize ibintu runaka ukamusaba ibirenzeho, kandi kuyobora ibitaro ni ikintu gikomeye. Ibitaro ni urwego aho amafaranga n’ingengo y’imari bigira ijambo rinini , aho ugomba kwita ku bakozi nyamara ntabwo (ababikora) babizi.”

Mu banyeshuri 46 barangije muri UGHE, 26 ni abanyarwanda. Binagwaho yavuze ko bazabanza gukorera Leta imyaka itanu mbere yo kujya mu bindi.

Iyi Kaminuza yatangiye mu Rwanda mu mwaka wa 2015.

Uhereye ibumoso: Dr Abebe Bekele; Umuyobozi Mukuru wungirije w’iyi Kaminuza, Dr Agnes Binagwabo; Madamu Jeannette Kagame; Minisitiri w’Ubuzima, Dr Diane Gashumba, Umuyobozi Mukuru w’Umuryango Partners in Health, Dr Paul Farmer na Dr Jim Yong Kim
Madamu Jeannette Kagame aha ishimwe Christina Renee Gallagher nk'umwe mu banyeshuri batsinze neza mu barangije muri iyi kaminuza
Madamu Jeannette Kagame yambika umudali Claire Kimilu nawe uri mu banyeshuri batsindiye ku manota yo hejuru
Uwahoze ari Perezida wa Banki y'Isi, Dr Jim Yong Kim, ageza ijambo ku barangije amasomo
Byari ibyishimo ku banyeshuri babonye impamyabushobozi zabo
Madamu Jeannette Kagame hamwe n'abayobozi b'iri shuri mu ifoto y'urwibutso n'abarangije amasomo
Iyi Kaminuza iherereye mu Karere ka Burera mu Ntara y'Amajyaruguru
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Dieudonne Hakizayezu 2019-08-13 00:53:15

Hagomba kuba higa umugabo hagasiba undi!

2
emerence mudahogora 2019-08-12 23:27:37

Ariko jyewe ndibariza impamvu uyu Asimwe Christina yemerewe kurangiza kandi yarafashwe akopera ikizamini akirukanwa. Niba aribyo naba nyarwanda birukanwe babagarure !

3
John 2019-08-12 08:20:42

Ese nta muntarwanda watsinze neza ko ntawe murweretse, nyabuneka!

Kwamamaza