IGIHE

Madamu Jeannette Kagame yasabye umwihariko mu kwita ku bibazo by’ubuzima byugarije Isi

0 23-06-2022 - saa 08:46, Ntabareshya Jean de Dieu

Madamu Jeannette Kagame yatanze intabaza ku bibazo by’uburwayi bwo mu mutwe byugarije Isi by’umwihariko urubyiruko, agaragaza ko mu gihe nta gikozwe, abantu bazakomeza kubura ubuzima mu buryo bw’amaherere.

Madamu Jeannette Kagame yabigarutseho ku wa Gatatu, tariki ya 22 Kamena 2022, mu Nama yiga ku "Kongera guhangana n’ibibazo by’ubuzima bwo mu mutwe’’ ishamikiye ku y’Abakuru b’Ibihugu na za Guverinoma zikoresha Ururimi rw’Icyongereza (Commonwealth) izwi nka CHOGM iteraniye i Kigali.

Yagaragaje ko ikibazo cy’ubuzima bwo mu mutwe atari icy’igihugu runaka ahubwo gihuriweho n’Isi yose.

Madamu Jeannette Kagame yasobanuye ko Abanyarwanda bumva neza imiterere y’iki kibazo bitewe n’amateka igihugu cyanyuzemo yakigejeje kuri Jenoside yakorewe Abatutsi mu 1994.

Ati "Amateka yacu asobanurwa n’imbaraga zidasanzwe zo kongera kwiyubaka nyuma y’ibibazo by’ubuzima bushaririye twanyuzemo bwagize ingaruka ku mibiri, imitekerereze n’imbamutima zacu.’’

Yasabye ibihugu bitandukanye, inzego z’ubuzima n’abanyamuryango ba Commonwealth muri rusange guhagurukira rimwe kugira ngo ibi bibazo by’ubuzima bwo mu mutwe birwanywe.

Yagize ati “Ibibazo by’ubuzima bwo mu mutwe bisubiza inyuma umuryango, binyuze mu guhungabanya imibereho, bikangiza iterambere ry’ubukungu. Magingo aya, ibibazo by’uburwayi bwo mu mutwe bihombya ubukungu bw’Isi agera kuri miliyari ibihumbi 2,5$ buri mwaka.”

“Nta terambere ryagerwaho tudafite ubuzima bwiza bwo mu mutwe, nta buzima bwagerwaho hatari ubuzima bwiza bwo mu mutwe, nta mucyo wabona w’ahazaza dusangiye tudafite ubuvuzi bw’ubuzima bwo mu mutwe ndetse nta na Commonwealth yabaho hatabayeho ubuzima bwo mu mutwe.”

Madamu Jeannette Kagame yatanze urugero rw’u Rwanda n’aho rugeze ruhangana n’ikibazo cy’ubuzima bwo mu mutwe binyuze muri Gahunda ya Imbuto Foundation yiswe Baho Neza.

Nko muri Gicurasi uyu mwaka, Imbuto Foundation yatangije umushinga w’imyaka itatu witwa ‘Baho Neza Twite ku Buzima bwo mu Mutwe’ uzita ku bikorwa bigamije gukemura ibibazo bihungabanya ubuzima bwo mu mutwe bikaba byanatera uburwayi.

Madamu Jeannette Kagame yavuze ko igihe ari iki ngo Isi ihaguruke ihangane n’ibibazo by’ubuzima bwo mu mutwe.

Ati "Dukeneye kandi tugomba gushyira imbaraga mu ishoramari rigamije gukora ubushakashatsi ku ndwara zo mu mutwe, kwirinda, gutanga amahugurwa ndetse no mu buvuzi bwazo.’’

Umuyobozi Mukuru w’Ishami ry’Umuryango w’Abibumbye ryita ku Buzima, OMS, Dr Tedros Adhanom Gyebreyesus, yagaragaje ko ibibazo by’ubuzima bwo mu mutwe byibasira cyane abagore n’abana bari mu kigero cy’imyaka 20 na 24 y’amavuko.

Yavuze ko Covid-19 yatumye habaho icyuho ku batuye Isi mu birebana no guhangana n’ikibazo cy’ubuzima bwo mu mutwe nubwo na mbere yacyo ubuvuzi bwo mu mutwe bwari ku rwego rwo hasi mu bihugu bimwe na bimwe.

Dr Tedros yavuze ko ibihugu bimwe byatangiye gukora ibishoboka byose mu gushaka igisubizo no guhangana n’ibibazo by’ubuzima bwo mu mutwe binyuze mu guhanga udushya mu buvuzi, gukoresha ubuvuzi buteye imbere, ikoranabuhanga n’ibindi.

Minisitiri w’Ububanyi n’Amahanga w’u Rwanda, Dr Vincent Biruta, yavuze ko kuba ibibazo by’ubuzima bwo mu mutwe biri kwibasira urubyiruko, Isi ikwiye guhangana na byo no gukora ibishoboka byose kugira ngo ubuzima bwarwo bubungabungwe.

Umunyamabanga Mukuru wa Commonwealth, Patricia Scotland, yagaragaje ko ibihugu bigize uyu muryango bikwiye gushyiraho ingamba zihuriweho mu guhangana n’iki kibazo.

Ubusanzwe ubuzima bwo mu mutwe ni kimwe mu bibazo bihangayikishije u Rwanda n’Isi muri rusange. Bigaragarira mu bushakashatsi bw’Ikigo cy’Igihugu cy’Ubuzima, RBC, bwo mu 2018, bwerekanye ko mu Banyarwanda bose nibura umuntu umwe muri batanu, afite uburwayi bwo mu mutwe, bumwe cyangwa bwinshi.

Igiteye inkeke kuri iki kibazo ni uko urubyiruko ruri hagati y’imyaka 14-18 rwagaragaje ko rufite ibibazo byo mu mutwe ku rwego rwa 10%.

Ku rwego rw’Isi imibare igaragaza ko mu bana n’urubyiruko nibura 20% baba bafite ibibazo by’ubuzima bwo mu mutwe bishobora no kubatera kwiyahura cyane ko kuri ubu bifite umwanya wa kabiri mu guteza impfu ku bafite hagati y’imyaka 15 na 29 y’amavuko.

Ubu bushakashatsi bwagaragaje ko indwara y’agahinda gakabije ikunda kuviramo benshi kwiyambura ubuzima no kwiyanga iri kuri 11,9% mu Banyarwanda bose.

Iyo ndwara igeze mu barokotse Jenoside isya itanzitse kuko imibare yikubye gatatu aho nibura 35% bafite ikibazo cy’agahinda gakabije.

Ihungabana rishingiye ku mateka ryo ryari kuri 3,6% mu Banyarwanda bose aho ryikuba inshuro hafi enye rikagera kuri 27% mu bacitse ku icumu rya Jenoside yakorewe Abatutsi.

Ku rwego mpuzamahanga imibare ya OMS yo mu 2021 igaragaza ko nibura miliyari imwe y’abatuye Isi bafite ikibazo cy’ubuzima bwo mu mutwe kandi mu bihugu by’amikoro make nibura abarenga 75% ntibagira gikurikirana mu gihe buri mwaka abagera kuri miliyoni eshatu bapfa. Ngo nibura buri masegonda 40 hapfa umuntu wiyahuye.

Madamu Jeannette Kagame yasabye umwihariko mu kwita ku bibazo by’ubuzima bwo mu mutwe byugarije Isi
Madamu Jeannette Kagame aganira n'Umunyamabanga Mukuru wa Commonwealth, Patricia Scotland mu gihe Minisitiri w’Ububanyi n’Amahanga w’u Rwanda, Dr Vincent Biruta yaganiraga n'Umuyobozi Mukuru w’Ishami rya Loni ryita ku Buzima, OMS, Dr Tedros Adhanom Gyebreyesus
Iyi nama yiga ku "Kongera guhangana n’ibibazo by’ubuzima bwo mu mutwe’’ ishamikiye ku y’Abakuru b’Ibihugu na za Guverinoma zikoresha Ururimi rw’Icyongereza, CHOGM, iteraniye i Kigali
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza