IGIHE

Madamu Jeannette Kagame yakiriye Madamu Denise Tshisekedi, amwizeza ubufatanye mu iterambere ry’umuryango yatangije

5 10-06-2019 - saa 11:43, Ishimwe Israel

Madamu Jeannette Kagame yakiriye ku meza Madamu Denise Nyakeru Tshisekedi, umugore wa Perezida wa Repubulika Iharanira Demokarasi ya Congo, uri mu Rwanda mu ruzinduko rw’iminsi ibiri.

Iri sangira ryabereye muri Kigali Marriott Hotel ku mugoroba wo ku Cyumweru tariki 9 Kamena 2019, rikaba ryitabiriwe n’abayobozi bakuru mu nzego za Guverinoma n’izabikorera biganjemo abagore bari mu nzego z’ubuyobozi.

Madamu Denise Tshisekedi yageze i Kigali ku Cyumweru ari hamwe n’abamuherekeje, batambagizwa ibice by’umujyi, bahabwa ikaze mu rwa Gasabo.

Madamu Jeannette Kagame mu ijambo ry’ikaze, yababwiye ko amarembo agana u Rwanda azahora akinguye igihe cyose.

Yagize ati “Turenze ibibazo byagaragaye mu mateka duhuriyeho, haracyari ibyo dusangiye, bitewe n’urujya n’uruza rw’abantu mu bihugu byacu bihana imbibi.’’

Yavuze ko imikoranire ihuriweho izakomeza kwimakazwa birambye. Ati “Nubwo hajemo agatotsi gato, aya magambo ni ay’agaciro ku mibanire y’ibihugu byombi. Ni umubano umaze igihe, dukeneye kongeramo imbaraga ngo umubano wacu usubirane agaciro kawo.’’

Madamu Tshisekedi yagiriye uruzinduko mu Rwanda nyuma y’iminsi amenyekanisha ibikorwa by’umuryango mushya ‘Fondation Denise Nyakeru Tshisekedi’ mu Ntara ya Kivu y’Amajyaruguru n’iy’Amajyepfo.

Yagize ati “Sinari gusubira i Kinshasa ntabasuhuje. Naje hano kureba, kungurana ibitekerezo no gusangira ubunararibonye bw’igihugu cyanyu mu iterambere ry’umugore.’’

Ku wa 7 Kamena 2019, yaganiriye n’abanyeshuri bo muri Collège Alfajiri y’i Bukavu muri gahunda ye yise ‘Plus Fortes’ igamije guha ubushobozi abakobwa n’abagore nk’abanyembaraga bahambaye.

Yatangiwemo ubutumwa ku ngaruka z’itabi, kwirinda inda zitateguwe, SIDA n’indwara y’amaraso yanduye (drépanocytose) mu kubaka urubyiruko bitarenze 2030.

Ni umuryango ufite inshingano zo kwita ku mibereho myiza y’abaturage mu cyerekezo cy’uwa Imbuto Foundation imaze imyaka 18 itangijwe.

Imbuto Foundation iteza imbere uburezi bw’umwana w’umukobwa, kurihirira amashuri abana b’abahanga batishoboye, gufasha imiryango itandukanye, kwirinda icyorezo cya SIDA, kurwanya ihohoterwa rishingiye ku gitsina, guhashya malariya n’ibindi.

Madamu Jeannette Kagame yavuze ko “Mu bucuti bwacu, imiryango ya Imbuto Foundation irabafunguriye, mu kungurana ibitekerezo ndetse n’ubunararibonye mu nzego zitandukanye.’’

Madamu Denise Nyakeru Tshisekedi yatangije Fondation ye ku wa 16 Gicurasi 2019. Yubakiye ku nkingi enye zirimo uburezi, ubuzima, kwirinda ihohoterwa rishingiye ku gitsina no kubaka ubushobozi bw’umukobwa mu iterambere rya RDC na Afurika.

Madamu Tshisekedi yashimye umuhate wa Madamu Jeannette Kagame muri urwo rugendo, avuga ko Afurika ikeneye abantu nkawe.

Ati “Amateka yanyu ndayakunda cyane, nishimira ibyemezo mwafashe mu myaka yahise, nk’ibijyanye no kwirinda Sida, no kwita ku bibazo by’abatishoboye mu gihugu cyanyu by’umwihariko abapfakazi n’imfubyi.’’

Mu butumwa bwa Madamu Tshisekedi yakomeje gushimangira uruhare rw’abagore, avuga ko bakomeye ndetse ko iyo bahurije hamwe, bagira imbaraga, bakagera kuri byinshi.

Yakomeje avuga “Natangije umuryango wanjye kandi ndizera gukorana na Imbuto Foundation mu gukomeza guhesha agaciro umugore n’umuryango Nyafurika muri rusange. Mu gihe abagore bishyize hamwe, bazaba bafite icyerekezo kizima kuri Afurika.’’

Abitabiriye ibi birori basangizanyije umwihariko w’umuco wa buri gihugu binyuze mu myambarire, indirimbo n’ibindi. Benshi mu bayobozi b’u Rwanda baserutse bambaye imishanana.

Uyu muhango wabanjirijwe no kureba film yiswe ‘We call it love’ yakinwe n’abahanzi Karemera Carole n’umunyarwenya Sengazi Michael babarizwa muri Ishyo Arts Center, igaragaza iminsi 100 y’icuraburindi rya Jenoside yakorewe Abatutsi mu 1994.

Uyu mukino werekanwe muri RDC no mu Bufaransa, wakozwe hashingiwe ku bushakashatsi mu byegeranyo n’ibiganiro ku burenganzira bwa muntu.

Carole Karemera na Denis Mpunga bawanditse ngo batange ubutumwa bw’urugendo rw’ubumwe n’ubwiyunge no kwiyubaka k’u Rwanda nyuma ya Jenoside.

Uru ruzinduko rwaje nyuma y’izahuje, Perezida Kagame na mugenzi we Tshisekedi. Baheruka guhura mu muhango wo kunamira, Étienne Tshisekedi wigeze kuba Minisitiri w’Intebe wa RDC wasezeweho bwa nyuma ku wa 31 Gicurasi 2019.

Muri Mata 2019 kandi nibwo Sosiyete y’u Rwanda y’Ubwikorezi bwo mu Kirere ya RwandAir yatangiye ingendo zigana mu Mujyi wa Kinshasa.

Muri manda ye y’imyaka itanu, Tshisekedi yitezweho kuzahura umubano w’igihugu cye n’u Rwanda no kongera imbaraga zo kwambura intwaro abarwanyi barimo ab’umutwe uzwi nka P5 wisuganyiriza mu mashyamba ya RDC ngo uhungabanye umutekano w’u Rwanda.

Madamu Jeannette Kagame yakiriye ku meza Madamu Denise Nyakeru Tshisekedi
Abanyeshuri bize umuziki ku Nyundo ni bo basusurukije abitabiriye iri sangira ryahuje Madamu Jeannette Kagame na mugenzi we Madamu Denise Tshisekedi
Karemera Carole n'umunyarwenya Michael Sengazi (inyuma) ni bo bakinnye umukino 'We call it love'
Madamu Jeannette Kagame yijeje Madamu Denise Tshisekedi ubufatanye mu iterambere ry’umuryango yatangije ugamije guteza imbere umugore muri Repubulika Iharanira Demokarasi ya Congo
Madamu Denise Nyakeru Tshisekedi yafashijwe n'indirimbo zaririmbwe, arahaguruka afatanya n'abandi kubyina
'We call it love' ni umukino ugaragaza urugendo rw'ubwiyunge bw'Abanyarwanda nyuma ya Jenoside yakorewe Abatutsi mu 1994
Byari ibyishimo ku bayobozi b'impande zombi mbere yo gutangira umusangiro wabereye muri Kigali Marriott Hotel
Madamu Jeannette Kagame yakiriye Madamu Denise Tshisekedi, banagirana ibiganiro byihariye
Madamu Jeannette Kagame na Madamu Denise Tshisekedi bari bafite akanyamuneza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Babu 2019-06-10 23:03:22

Njye Jeannette Kagame antera ishema. Ntubigire ho ikibazo ntunzi , kandi ntanubwo wamenya ariko ndamukunda ni umugore ubereye kuba mu rugwiro. Yesu azaguhe iherezo ryiza.

2
Dumbuli 2019-06-10 13:11:39

umubano wú Rwana na DRC si uwanone amahanga yose azi kutubana neza

3
Veteran 2019-06-10 12:03:38

Ntireba se, abibuka ka kabyino k’impala ....
’’ Umubano u Rwanda na Zaire amahoro nasagambe eeee ’’ , byari kurushaho kuba byiza iyo mu Burundi naho bigenze bitya. Aliko ho sinzi, abazairois nta nzika bagira. Byonyine kumva ko bakomoka mu gihugu gikize kdi kinini muli Africa ubona ko bibahagije.

4
Tina 2019-06-10 08:04:58

Mana nkunda ukuntu Jeanette Kagame agira urugwiro. Mubyeyi Imana ijye iguha umugisha buri gitondo n’icyigoroba

5
K.J 2019-06-10 06:33:58

BABYEYI BEZA IMANA IBAHE UMUGISHA KANDI MWARAKOZE KURANGWA N’IMBABAZI , UBUPFURA MURI MAGUFI MURANGWA N’UBUMUNTU.

Kwamamaza