IGIHE

Emir wa Qatar na Mswati III bahageze: Uko Abakuru b’Ibihugu bageze i Kigali muri #CHOGM2022 (Amafoto)

0 23-06-2022 - saa 09:11, Iradukunda Serge

Mu gihe habura umunsi umwe ngo Abakuru b’Ibihugu na za Guverinoma zo mu Muryango wa Commonwealth bahurire mu nama ya CHOGM, abahagarariye ibihugu bitandukanye bakomeje kugera i Kigali aho izabera.

Iyi nama y’Abakuru b’Ibihugu na za Guverinoma iteganyijwe ku wa Gatanu tariki 24 Kamena 2022, igiye kuba nyuma y’izindi z’amahuriro atandukanye agize Commonwealth zimaze iminsi ziba.

Imirimo ya CHOGM yanzitse ku Cyumweru tariki ya 19 Kamena 2022, ibimburirwa n’inama y’ihuriro rya mbere ari ryo ry’urubyiruko rugize uyu muryango.

Ku munsi wakurikiyeho hatangijwe ku mugaragaro ihuriro ry’abagore ryanitabiriwe na Madamu Jeannette Kagame ndetse n’Umunyamabanga Mukuru wa Commonwealth, Patricia Scotland n’abandi batandukanye bahagarariye imiryango mpuzamahanga n’ibihugu byabo.

Mu zindi nama z’amahuriro zabaye harimo iy’iry’Ubucuruzi ry’abagize Commonwealth ryatangijwe kuwa Kabiri tariki 21 Kamena 2022 muri Kigali Conference and Exhibition Village (KCEV) ndetse n’ihuriro rigamije kwiga ku iterambere ry’abaturage ryabereye muri M Hotel.

Biteganyijwe ko ayo mahuriro yose yabaye agomba gufata imyanzuro itandukanye bikazagezwa ku nama y’Abakuru b’Ibihugu izatangira kuri uyu wa 25 Kamena 2022.

Mu gihe habura amasaha make ngo iyi nama itangire, abanyacyubahiro batandukanye bamaze kugera mu Rwanda.

Umwami Mswati III yahasesekaye mu myambaro gakondo

Umwami wa eSwatini, Mswati III yatunguye benshi ubwo yageraga i Kigali mu ijoro ryo kuri uyu wa Kane yambaye imyambaro gakondo yo mu gihugu cye.

Uyu Mwami wari urikumwe n’umwe mu bagore be yageze ku kibuga cy’indege aherekejwe n’itsinda rinini ry’abantu baturukanye muri eSwatini. Akihagera we n’abamuherekejwe bahise bashyirwa mu modoka igomba kubajyana aho bari bucumbikirwe.

Ubwami bwa eSwatini bwinjiye mu Muryango w’Ibihugu bikoresha ururimi rw’icyongereza mu 1968.

Perezida Kenyatta yahasesekaye

Mu ijoro ryo kuri uyu wa Kane nibwo indege itwaye Perezida wa Kenya, Uhuru Kenyatta yageze ku Kibuga cy’Indege Mpuzamahanga cya Kigali.

Perezida Kenyatta witabiriye Inama y’Abakuru b’Ibihugu na za Guverinoma zigize Commonwealth, yakiriwe na Minisitiri w’Ubutabera mu Rwanda.

Kenya yinjiye muri uyu muryango mu 1963.

Perezida Kenyatta yatangiye kuyobora Kenya mu 2013, biteganyijwe ko iyi ariyo CHOGM ya nyuma yitabiriye nka Perezida wa Kenya kuko ari kugana ku musozo wa manda yemererwa n’Itegeko Nshinga ry’iki gihugu.

Emir wa Qatar yageze i Kigali

Umuyobozi w’Ikirenga (Emir) wa Qatar, Igikomangoma Sheikh Tamim bin Hamad Al Thani, yageze ku Kibuga Mpuzamahanga cya Kigali.

Sheikh Tamim bin Hamad Al Thani uri mu banyacyubahiro bitabiriye Inama ya CHOGM yakiriwe na Minisitiri w’Ububanyi n’Amahanga w’u Rwanda, Dr Vincent Biruta.

Nubwo Qatar itari mu Muryango w’Ibihugu bikoresha Icyongereza, Commonwealth, Sheikh Tamim bin Hamad Al Thani yitabiriye iyi nama nk’umutumirwa ndetse n’umufatanyabikorwa w’ibihugu bigize uyu muryango.

Sheikh Tamim bin Hamad Al Thani yageze ku Kibuga cy'Indege cya Kigali mu mugoroba wo kuri uyu wa Kane
Sheikh Tamim bin Hamad Al Thani asuhuzanya na Minisitiri w'Ububanyi n'Amahanga, Dr Vincent Biruta wagiye kumwakira
Sheikh Tamim bin Hamad Al Thani na Biruta babanje kugirana ibiganiro mbere yo kuva ku Kibuganda cy'indege cya Kigali
Iyi modoka niyo yatwaye Sheikh Tamim bin Hamad Al Thani

Julius Maada wa Sierra Leone

Ku mugoroba wo kuri uyu wa Kane, Perezida wa Sierra Leone, Julius Maada nawe yageze mu Mujyi wa Kigali, yiyongera kuri bagenzi be bamaze kugera mu Rwanda, aho bitabiriye Inama ya CHOGM.

Iki gihugu cyinjiye mu Muryango w’Ibikoresha Icyongereza, Commonwealth mu 1961 nyuma y’uko kibonye ubwigenge kuko cyakolonizwaga n’u Bwongereza.

Julius Maada ni Perezida wa Sierra Leone kuva mu 2018.

Australia irahagarariwe

Minisitiri w’Intebe Wungirije wa Australia, Richard Marles nawe yamaze kugera mu Rwanda, asanga abandi bayobozi bakuru b’ibihugu bahageze bitabiriye Inama ya CHOGM.

Ku Kibuga cy’Indege cya Kigali yakiriwe n’Umujyanama wa Perezida Paul Kagame mu by’Ubukungu, Francis Gatare.

Iki gihugu cyinjiye muri Commonwealth mu 1931, umwaka wasize ibindi bihugu nka Canada, New Zealand na Afurika y’Epfo nabyo byinjiye muri uyu muryango.

Mu 2011 iki gihugu cyahawe kwakira Inama ya CHOGM.

Perezida wa Maldives yageze i Kigali

Perezida wa Maldives, Ibrahim Mohamed Solih ni umwe mu bandi Bakuru b’Ibihugu bamaze kugera i Kigali, aho bitabiriye Inama ya CHOGM.

Perezida Ibrahim Mohamed Solih yageze ku Kibuga cy’Indege cya Kigali ku gicamunsi cyo kuri uyu wa Kane tariki 23 Kamena 2022. Yakiriwe na Minisitiri w’Ubutegetsi bw’Igihugu, Gatabazi Jean Marie Vianney.

Maldives ni kimwe mu bihugu bigize Umuryango wa Commonwealth kuko yawugezemo mu 1982. Mu 2016 iki gihugu cyasabye kuva muri uyu muryango ndetse kirabyemererwa.

Nyuma y’igihe, Maldives yisubiyeho kuri iki cyemezo, mu 2020 yaje kongera kwakirwa muri uyu muryango.

Kugira ngo uyu mwanzuro ufatwe byasabye Perezida Ibrahim Mohamed Solih kwandikira Umunyamabanga Mukuru wa Commonwealth agaragaza ko igihugu cye gifite ubushake bwo gusubira muri uyu muryango.

Maldives ni ikirwa giherereye mu Majyepfo ya Aziya mu Nyanja y’u Buhinde. Gituranye na Sri Lank n’u Buhinde.

Perezida Ibrahim Mohamed Solih yatorewe kuyobora iki gihugu mu 2018.

Perezida wa Maldives, Ibrahim Mohamed Solih yageze i Kigali ari mu ndege ya RwandAir
Ku Kibuga cy'Indege cya Kigali yakiriwe na Minisitiri w'Ubutegetsi bw'Igihugu, Gatabazi Jean Marie Vianney
Perezida Ibrahim Mohamed Solih na Minisitiri Gatabazi baganira
Perezida wa Maldives, Ibrahim Mohamed Solih n'itsinda ryamuherekeje bakiriwe mu Rwanda
Mbere yo kuva ku kibuga cy'indege, bombi babanje kugirana ibiganiro
Minisitiri Gatabazi asezera kuri Perezida Ibrahim Mohamed Solih ubwo yari agiye kuva ku Kibuga cy'Indege cya Kigali
Imodoka yatwaye Perezida wa Maldives, Ibrahim Mohamed Solih

Perezida Museveni yinjiriye i Gatuna

Perezida wa Uganda, Yoweri Kaguta Museveni ni umwe mu Bakuru b’Igihugu bamaze gukandagira ku butaka bw’u Rwanda.

Mu gitondo cyo kuri uyu wa Kane nibwo yageze ku Mupaka wa Gatuna uhuza u Rwanda na Uganda, aho arava yerekeza mu Mujyi wa Kigali.

Kuri uyu Mupaka wa Gatuna, Perezida Museveni yakiriwe na Minisitiri w’Ibikorwaremezo mu Rwanda, Dr. Ernest Nsabimana ndetse na Anne Katusiime wungirije Ambasaderi wa Uganda mu Rwanda.

Abinyujije kuri Twitter, mu masaha ya mu gitondo nibwo Perezida Museveni yatangaje ko afashe urugendo rwa kajugujugu rumujyana mu Rwanda.

Uganda yinjiye muri Commonwealth mu 1962 nyuma yo kubona ubwigenge kuko mbere yakolonizwaga n’u Bwongereza. Mu 2007 iki gihugu cyakiriye CHOGM yabaga ku nshuro ya 20.

Perezida Museveni yavuye mu modoka asuhuza abari ku Mupaka wa Gatuna
Nyuma yahise asubira mu modoka akomeza urugendo rugana i Kigali

Boris Johnson yahageze

Minisitiri w’Intebe w’u Bwongereza, Boris Johnson, ni umwe mu banyacyubahiro bamaze kugera mu Rwanda.

Yakiriwe ku Kibuga cy’Indege cya Kigali na Ambasaderi w’u Bwongereza mu Rwanda, Omar Daair n’Umunyamabanga wa Leta muri Minisiteri y’Ububanyi n’Amahanga ushinzwe Umuryango wa Afurika y’Iburasirazuba, Prof Nshuti Manasseh.

Boris Johnson yageze ku Kibuga cy’Indege cya Kigali mu gitondo cyo kuri uyu wa Kane tariki 23 Kamena 2022.

Akigera mu Rwanda, Boris Johnson yavuze ko iyi nama izaba umwanya wo kuganira ku bibazo byugarije Isi birimo inzara n’imihindagurukire y’ibihe ndetse n’amahirwe yo kwagura ubucuruzi u Bwongereza bukorana n’ibihugu byo muri uyu muryango.

Kwitabira iyi nama kwe bivuze byinshi kuko u Bwongereza aribwo bwagize uruhare rukomeye mu ishingwa rya Commonwealth mu 1926 ndetse Umwami wabwo King George VI ayibera umuyobozi wa mbere.

Biteganyijwe ko iyi nama izasiga Boris Johnson ahererekanyije ububasha na Perezida Kagame ku buyobozi bwa Commonwealth.

Boris Johnson ageze mu Rwanda akurikira Igikomangoma cya Wales mu Bwami bw’u Bwongereza, Charles wageze mu Rwanda mu ijoro ryo kuwa Kabiri.

Minisitiri w'Intebe w'u Bwongereza, Boris Johnson yageze i Kigali arikumwe n'umugore we, Carrie Johnson
Boris Johnson yagejejwe i Kigali n'indege yihariye itwara abayobozi b'u Bwongereza
Boris Johnson asuhuza Ambasaderi w'u Bwongereza mu Rwanda, Omar Daair
Boris Johnson na Carrie Johnson ubwo bavaga ku Kibuga cy'Indege cya Kigali

Perezida Buhari wa Nigeria nawe arahari

Perezida wa Nigeria Muhammadu Buhari yageze mu Rwanda mu ijoro ryo kuwa Gatatu.

Ku Kibuga cy’Indege Mpuzamahanga cya Kigali yakiriwe n’abayobozi b’u Rwanda batandukanye bayobowe na Minisitiri w’Ubutabera akaba n’Intumwa Nkuru ya Leta y’u Rwanda, Dr Emmanuel Ugirashebuja.

Nigeria ni kimwe mu bihugu bya Afurika bimaze igihe biri mu muryango wa Commonwealth kuko yayigezemo mu 1960, ndetse mu 2003 ubwo iki gihugu cyayoborwaga na Olusegun Obasanjo cyagiriwe icyizere cyo kwakira inama ya CHOGM.

Perezida wa Nigeria, Muhammadu Buhari ubwo yagera ku Kibuga cy'Indege Mpuzamahanga cya Kigali
Perezida Buhari yakiriwe na Minisitiri w'Ubutabera w'u Rwanda, Dr. Emmanuel Ugirashebuja
Nigeria ni kimwe mu bihugu bya Afurika bimaze igihe biri mu muryango wa Commonwealth
Perezida wa Nigeria yageze mu Rwanda mu ijoro ryo kuwa 22 Kamena 2022

Perezida Nana Akufo-Addo yaharaye

Perezida wa Ghana, Nana Akufo-Addo nawe yaraye ageze mu Mujyi wa Kigali mu ijoro ryo kuwa Gatatu tariki 22 Kamena 2022.

Ku Kibuga cy’indege yakiriwe n’Umujyanama wa Perezida Kagame mu by’Ubukungu, Francis Gatare, ndetse n’Umunyemari Karera Deniss.

Ghana yemerewe kwinjira mu Muryango wa Commonwealth mu 1957.

Perezida wa Ghana, Nana Akufo-Addo ubwo yageraga ku Kibuga cy'Indege cya Kigali
Perezida wa Ghana, Nana Akufo-Addo yakiriwe na Francis Gatare
Perezida Nana Akufo-Addo yabanje kugirana ikiganiro gito na Francis Gatare

Umuyobozi w’Ikirenga wa Brunei nawe ari i Kigali

Umuyobozi w’Ikirenga wa Brunei akaba na Minisitiri w’Intebe w’iki gihugu, Hassanal Bolkiah ibni Omar Ali Saifuddien III nawe yageze i Kigali.

Ku Kibuga cy’Indege yakiriwe na Minisitiri w’Ububanyi n’Amahanga w’u Rwanda, Dr Vincent Biruta.

Brunei ni kimwe mu bihugu byo muri Aziya byahoze biri munsi y’ubuyobozi bw’u Bwongereza. Yabonye ubwigenge mu 1984 ndetse ihita yinjira muri Commonwealth, iba igihugu cya 49 kigeze muri uyu muryango.

Hassanal Bolkiah niwe muyobozi wa 29 w’Ikirenga w’iki gihugu kuva mu 1967.

Umuyobozi w’Ikirenga wa Brunei akaba na Minisitiri w’Intebe w’iki gihugu, Hassanal Bolkiah ibni Omar Ali Saifuddien III nawe yageze i Kigali
Umuyobozi w’Ikirenga wa Brunei akaba na Minisitiri w’Intebe w’iki gihugu, Hassanal Bolkiah yakiriwe na Minisitiri w'Ububanyi n'Amahanga, Dr Vincent Biruta

Singapore nayo irahagarariwe

Minisitiri w’Intebe wa Singapore, Lee Hsien Loong nawe yamaze kugera mu Murwa Mukuru w’u Rwanda, Kigali, ahari kubera Inama y’Abakuru b’Ibihugu na za Guverinoma zigize Commonwealth.

Lee Hsien Loong uri muri uyu mwanya kuva mu 2004 ku kibuga cy’Indege yakiriwe n’Umunyamabanga wa Leta muri Minisiteri y’Ububanyi n’Amahanga ushinzwe Umuryango wa Afurika y’Iburasirazuba, Prof Nshuti Manasseh.

Singapore yinjiye muri Commonwealth mu Ukwakira mu 1965. Iki gihugu gifite umwihariko w’uko aricyo cyakiriye CHOGM ya mbere mu 1971.

Minisitiri w’Intebe w’Ibirwa bya Maurice

Minisitiri w’Intebe w’Ibirwa bya Maurice, Pravind Jugnauth yageze ku Kibuga cy’Indege Mpuzamahanga cya Kigali mu gitondo cyo kuri uyu wa Kane tariki 23 Kamena 2022 yakirwa n’Umunyamabanga wa Leta muri Minisiteri y’Ibikorwaremezo, Eng. Patricia Uwase.

Ibi birwa biherereye mu Nyanja y’Abahinde mu Majyepfo ashyira Uburasirazuba bw’Umugabane wa Afurika byinjiye muri Commonwealth mu 1968.

Ibi birwa nibyo byagombaga kwakira CHOGM yabaye mu 2015 ariko biza kwamburwa aya mahirwe kubera ko bititabiriye inama ya Commonwealth yabereye muri Sri Lanka.

Byatumye hafatwa icyemezo cy’uko iyi nama ibera mu birwa bya Malta.

Pravind Jugnauth ni Minisitiri w’Intebe w’Ibirwa bya Maurice kuva mu 2017.

Johnny Briceño wa Belize na we yahageze

Minisitiri w’Intebe wa Belize, Johnny Briceño ni umwe mu Bakuru ba za Guverinoma zigize Commonwealth bamaze kugera mu Rwanda.

Yageze i Kigali mu gitondo cyo kuri uyu wa Kane, mu ndege ya Sosiyete ya Kenya Airways. Ku kibuga cy’indege yakirwe na Minisitiri w’Ubutegetsi bw’Igihugu, Gatabazi Jean Marie Vianney.

Belize, ni Igihugu giherereye muri Amerika yo hagati, mu burasirazuba gikora ku Nyanja ya Caraïbes, mu majyaruguru kikaba gihana imbibi na Mexique.

Iki gihugu gituwe n’abarenga gato ibihumbi 397 cyahoze munsi y’u Bwami bw’u Bwongereza ariko kiza kubona ubwigenge kuwa 21 Nzeri mu 1981 ari nabwo cyahise cyinjira muri Commonwealth.

Johnny Briceño ni Minisitiri w’Intebe wa Belize kuva mu 2020.

Repubulika y’Aba- Dominicaine irahagarariwe

Minisitiri w’Intebe wa Repubulika y’Aba- Dominicaine, Roosevelt Skerrit nawe ari mu bayobozi bakuru bamaze kugera mu Rwanda mu rwego rwo kwitabira CHOGM.

Yageze mu Kibuga cy’Indege Mpuzamahanga cya Kigali mu gitondo cyo kuri uyu wa Kane. Yakiriwe n’Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Twagirayezu Gaspard.

Iki gihugu cyinjiye muri Commonwealth mu 1978, umwaka n’ubundi cyabonyemo ubwigenge kuko mbere cyagenzurwaga n’u Bwami bw’u Bwongereza.

Repubulika y’Aba- Dominicaine ni kimwe mu bihugu bigize Caraïbes, gituranye Haiti, Cuba na Puerto Rico.

Roosevelt Skerrit ni Minisitiri w’Intebe w’iki gihugu kuva mu 2004.

Perezida Filipe Nyusi yahagarariwe na Minisitiri w’Intebe

Minisitiri w’Intebe wa Mozambique, Adriano Maleiane yamaze kugera mu Rwanda, biteganyijwe ko azahagararira Perezida Filipe Nyusi mu nama ya CHOGM.

Ku Kibuga cy’Indege cya Kigali, Adriano Maleiane yakiriwe na Minisitiri w’Ububanyi n’Amahanga w’u Rwanda, Dr Vincent Biruta.

Nubwo Mozambique yakoronijwe na Portugal yinjiye muri Commonwealth yiganjemo ibihugu bikoresha Icyongereza mu 1995.

Perezida Biya yohereje Minisitiri w’Intebe

Undi mushyitsi w’imena wamaze kugera i Kigali ni Minisitiri w’Intebe wa Cameroon, Joseph Ngute, wakiriwe na Minisitiri w’Ubutabera w’u Rwanda, Dr Emmanuel Ugirashebuja mu ijoro ryo kuwa 22 Kamena 2022.

Biteganyijwe ko Joseph Ngute azaba ahagarariye Perezida w’Igihugu cye, Paul Biya muri iyi nama ya CHOGM.

Cameroon yinjiye muri Commonwealth mu 1995, nyuma y’imyaka itandatu ibisabye.

Iki gihugu kimwe n’u Rwanda bihuriye ku kuba biri mu Muryango w’Ibihugu bikoresha Ururimi rw’Icyongereza ndetse n’uw’Ibihugu bikoresha Ururimi rw’Igifaransa, Francophonie.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza