IGIHE

Kurwana si ukwigana, wiganye wabigwamo - Gen Kabarebe abwira abahunze bashaka guhungabanya igihugu

0 26-07-2020 - saa 10:17, Iradukunda Serge

Umujyanama wa Perezida Kagame mu bijyanye n’Umutekano, Gen James Kabarebe, yabwiye abahunze igihugu bagera hanze bagashinga imitwe yitwara gisirikare, ko badakwiye kurwana kuko babonye abandi babikora, abibutsa ko kurwana bitiganwa ndetse ko ubigerageje abigwamo.

Ibi Gen Kabarebe yabigarutse mu kiganiro ku Kwibohora ku nshuro ya 26 aho yaganirizaga abanyarwanda biganjemo urubyiruko rutuye ku mugabane wa Amerika.

Iki kiganiro cyarimo abandi bayobozi nka Minisitiri w’Ububanyi n’Amahanga, Vincent Biruta; Umunyamabanga wa leta muri Minisiteri y’Umuco, Bamporiki Edouard n’Umuyobozi wa Irembo Faith Keza cyagarutse cyane ku gusobanurira aba banyarwanda baba muri Amerika ibijyanye n’ukwibohora k’u Rwanda n’icyo basabwa nk’abanyarwanda baba muri Diaspora.

Umwe mu bari muri iki kiganiro ni Rutsobe Nsengiyumva, Umunyarwanda ukora mu ishami ryihariye ritegura ibikoresho byifashishwa mu cyumba cy’ibagiro cyo mu bitaro bya “ Memorial Hosptal (South Bend) Indiana. Yabajije Gen Kabarebe icyo atekereza ku barwanya ubutegetsi basigaye bitwikira imbuga nkoranyambaga n’icyakorwa mu kubahashya.

Gen Kabarebe mu kumusubiza, yavuze ko aba barwanya u Rwanda barimo ibice bibiri nk’icy’abantu bananiwe kuzuza indangagaciro zikenewe mu rugendo rwo gukomeza kubaka u Rwanda.

Yavuze ko bamwe imico yabo mibi yabananiye, bituma bumva bashaka kujyana urugamba mu zindi nzira “batangira guhimba ibyo bakoresha mu kurwanya igihugu”. Ikindi ni igice cy’abakoze Jenoside mu 1994 bumva ko iyo mitekerereze yabaranze ikwiriye gukomeza.

Ati “Icyo bakora ni uguhimba ibinyoma, bagashakisha ibintu byose ngo barwanye igihugu. Abo kubarwanya ni ibintu byoroshye. Niba hari urugamba rworoshye ruhari, ni urugamba rwo kurwanya abanyabinyoma bari hanze bitwa ko barwanya igihugu. Umuntu urwanira kongera gukora jenoside cyangwa ingengabitekerezo ariyo ashyize imbere, kumurwanya biroroshye, aho yagejeje u Rwanda rurahazi.”

Gen Kabarebe yavuze ko umuntu waranzwe n’imyitwarire mibi agahunga igihugu yagera hanze akavuga ko akirwanya, na we adateye ikibazo gikomeye ku mutekano wacyo.

Ati “Icyo bahuriyeho ni uko bose bagera aho bakigana no kurwana, kurwana ntabwo babyigana, kurwana ni siyansi. Ukumva ngo nabo bari mu mashyamba ngo bari hehe, ngo barigana kurwana. Wakwigana kurwana ukabishobora? Wakwigana Rutikanga gutera amakofi ukabishobora? Wajya muri “ring” bakakwica. Abo bose barahimba bakigana. Baravuga demokarasi, ntibazi n’igisobanuro cya demokarasi.”

Gen Kabarebe yatanze urugero ku bari mu gisirikare baranzwe n’imyitwarire mibi, nyuma indangagaciro zikabananira bagahitamo kuva mu gihugu.

Ati “Uri Jenerali, uri Majoro, ukambura umwenda wa gisirikare, ukambura amapeti ukagenda uri jenerali ntugire n’umusoda n’umwe ugukurikira ukambuka imipaka ukagenda n’imbunda wazitaye, ukagenda ukavuga ngo uratangira urugamba, ngo urarwana, warwana utagira umuntu n’umwe wagukurikiye?”

Yavuze ko uwo muntu atabona n’ibyo asubiza abamukurikira ku mbuga nkoranyambaga aba akoresha. Avuga ko bene uwo muntu aba akwiriye kubazwa ukuntu yahunze nta muntu n’umwe umukurikiye, none akaba ari kubwira abantu ko bakwiriye kumukurikira.

Gen James Kabarebe yibukije ko kubohorwa k’u Rwanda bivuze kubohorwa kwa buri munyarwanda harimo n’aba bahunze igihugu, ababwira ko babishaka bagaruka cyane ko igihugu ari icyabo.

Yakomeje agira ati “Kurwana si ukwigana, wiganye wabigwamo. Ni yo mpamvu ujya ubona hano kuri Televiziyo, ukabona umurongo w’abantu ngo barafashwe. Ibihumbi n’ibihumbi. Abandi ngo bavaga ku mipaka yo mu Majyepfo za Minembwe, baragenda ibilometero bingahe, bagafatirwa mu nzira. Ubu inkiko ziruzuye. Urwo rwiganwa rero, nk’urwa ya mbeba, ntaho ruzabageza.”

Gen Kabarebe yavuze ko urubyiruko u Rwanda rufite ubu rufite icyerekezo nk’uko igihugu cyarwo gifite, bitandukanye n’abarwanya igihugu.

Gen James Kabarebe yabwiye abashaka gushoza intambara k'u Rwanda ko bitakorwa bigana
Rutsobe Nsengiyumva, Umunyarwanda ukora mu ishami ryihariye ritegura ibikoresho byifashishwa mu cyumba cy’ibagiro cyo mu bitaro bya “ Memorial Hosptal (South Bend) Indiana yabajije Gen Kabarebe icyo atekereza ku barwanya ubutegetsi basigaye bitwikira imbuga nkoranyambaga n’icyakorwa mu kubahashya
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza