IGIHE

Kigali: Hatangiye amahugurwa ku ikoranabuhanga ryifashishwa mu nganda

0 6-05-2022 - saa 16:45, IGIHE

Mu bihugu bitandukanye ku isi, hatangiye amahugurwa arimo guhabwa abarimu n’abanyeshuli muri za kaminuza, mu mushinga wo gukwirakwiza ubuhanga bwo gukoresha ikoranabuhanga rya Fusion360.

Ni ikoranabuhanga rifite ubushobozi buhambaye mu gukora inyigo z’ibikoresho byifashishwa ahantu hatandukanye, cyane cyane mu gukora imashini n’ibindi bikoresho byo mu nganda.

Ni igikorwa cyatangijwe n’ikigo cy’abanyamerika kabuhariwe mu gukora ikoranabuhanga rya mudasobwa, ryifashishwa mu gukora inyigo z’imishinga iri mu bikorwa remezo byose, ubwubatsi, inganda, gukora za filime n’ibindi bitandukanye, kizwi nka Autodesk.

Iki kigo gifatwa nk’ikinini ku isi yose mu gukora bene ubu buryo bw’ikoranabuhanga, mu Rwanda gihagarariwe n’ikigo nyarwanda gitanga amahugurwa ahanitse kuri iryo koranabuhanga kikanaricuruza, Nziza Training Academy.

Nk’uko byashyizweho na Autodesk, ayo mahugurwa agomba kuzenguruka ibihugu byose by’isi bifite aho bigeze hafatika mu guteza imbere ibikorerwa mu nganda za buri gihugu.

Nziza Training Academy ihagarariye Autodesk mu Rwanda, ivugako aya mahugurwa ari gutangwa ku buntu mu rwego rwo kwirinda ko hari abagira ibibazo by’ubushobozi kandi gahunda ari ukugira ngo byorohere igihugu gutangira gukoresha ubu buhanga.

Babonye icyiza ari uguhera mu makaminuza.

Aya mahugurwa azamara amezi abiri higishwa abarimu n’abanyeshuli bose biga mu mashami yo gukora ibikoresho byo munganda, ibizwi nka Industrial production and manufacturing.

Aya mahugurwa azamara amezi abiri, yatangiye kuri uyu wa 6 Gicurasi 2022 akaba ari kubera mu Ishuli rikuru ry’imyuga n’ubumenyingiro rya IPRC Kigali.

Nziza Training Academy izatanga iri koranabuhanga rya Fusion360 ndetse n’amahugurwa, byose ntakiguzi.

Aya mahugurwa agamije kongerera ubumenyi abanyeshuri n'abarimu bo muri kaminuza ku ikoranabuhanga ryifashishwa mu nganda
Abazahugurwa nta kiguzi bazasabwa
Aya mahugurwa ari gutangwa na Nziza Training Academy
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza