IGIHE

Kayonza: RIB yafashe umugabo wari umaze iminsi ashakishwa ukekwaho kwica umugore we

1 17-10-2020 - saa 19:47, Ferdinand Maniraguha

Umugabo witwa Nshimiyimana Emmanuel wari umaze iminsi ashakishwa n’inzego z’umutekano akekwaho kwica umugore we yafatiwe mu karere ka Kayonza.

Urwego rw’ubugenzacyaha (RIB) rwatangaje ko Nshimiyimana yafashwe ku gicamunsi cyo kuri uyu wa Gatandatu.

Mu butumwa RIB yanyujije kuri Twitter, yavuze ko yafashwe ku bufatanye n’abaturage.

Yagize iti “RIB irabamenyesha ko Nshimiyimana Emmanuel washakishwaga n’Ubugenzacyaha kubera icyaha akekwaho cyo kwica umugore we agahita atoroka yafashwe ku gicamunsi cy’uyu munsi.

Yafatiwe aho yihishahishaga mu Karere ka Kayonza, Umurenge wa Ndego, Akagari k’Isangano, Umudugudu wa Kanyinya.RIB irashimira abaturage batanze amakuru yatumye ukekwa afatwa.”

Nshimiyimana uturuka mu karere ka Ngoma, akekwaho kuba mu ijoro rishyira tariki 3 Ukwakira yarishe umugore we amutemesheje umuhoro agahita atoroka.

Umunyamabanga Nshingwabikorwa w’Umurenge wa Rukumberi, Mbarushimana Ildephonse icyo gihe yabwiye IGIHE ko uyu mugore yari uw’isezerano kuri uyu mugabo akaba yabaga mu Karere ka Kirehe aho yari yaramusize akaza gushaka undi mugore i Rukumberi. Ngo yari yaje kumureba kugira ngo amuhe amafaranga yo gutangira mituweli abana.

Ati “ Yari yarashatse undi mugore inaha Rukumberi undi yaramutaye i Kirehe, aho Kirehe uyu mugore yamurereraga abana uyu mugabo yari yarabyaye hanze we ntibigeze babyarana. Yaje inaha rero aje kumwaka amafaranga y’ubwisungane mu kwivuza bw’abo bana be. Yari yacumbitse ku baturanyi kugira ngo aze kuvugana n’uyu mugabo mugitondo undi aza kubimenya aramurarira.”

Yakomeje agira ati “ Mu ijoro rero umudamu yasohotse agiye kwihagarika undi ahita amubona amwirukankaho abaturanyi barahurura uwatabaye bwa mbere yahise amutema ukuboko afata wa mugore amutemesha umuhoro aramwica, umugabo yahise ahunga ubu turi kumushakisha.”

Uwafashwe ubu afungiwe kuri RIB Sitasiyo ya Kibungo aho ategereje gushyikirizwa Ubushinjacyaha.

Uyu mugabo yari amaze iminsi ashakishwa akekwaho kwica umugore we
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza