IGIHE

Kayonza: Aborozi bambuwe miliyoni 45 Frw na ba rwiyemezamirimo babaguriraga amata

0 20-05-2019 - saa 16:20, Hakizimana Jean Paul

Aborozi bo mu Karere ka Kayonza batuye Minisitiri w’ubuhinzi n’ubworozi, ibibazo birimo kubura isoko ry’amata yabo ndetse no kwamburwa na ba rwiyemezamirimo miliyoni zigera kuri 45 Frw.

Ibi bibazo babimubwiye mu cyumweru gishize ubwo Minisitiri w’ubuhinzi n’ubworozi, Dr Mukeshimana Geraldine, yagiranaga inama n’abafite aho bahuriye n’ubworozi mu turere twa Kayonza, Gatsibo na Nyagatare.

Iyi nama ikaba yarigamije kurebera hamwe bimwe mu bibazo bigaragara mu bworozi ndetse n’uburyo byakemuka umusaruro ukarushaho kuba mwiza.

Sebudandi Steven waturutse mu Murenge wa Murundi mu Karere ka Kayonza, yavuze ko bafite ibibazo birimo kwamburwa no kutagira isoko rihoraho, bigatuma amata yabo yangirika.

Ati “Ikibazo cya mbere dufite, nta soko ryizewe rihoraho ry’amata dufite, dufite amakusanyirizo atandatu ariko yose agurirwa na ba rwiyemezamirimo bakayambura, ubu batwambuye miliyoni 45 Frw.”

Sebudandi yakomeje avuga ko bafite n’ikibazo cy’abamamyi baza bakagura amata bakayajyana ku Inyange Industries ariko ntibishyure abaturage, asaba ko niba bishoboka Inyange Industries yabegera nabo ikajya ibagurira amata yabo.

Mugabusengamungu uhagarariye ikusanyirizo rya Ndego yabwiye IGIHE ko ba rwiyemezamirimo bazaga bakabanza kubishyura neza nyuma bakabahemukira.

Ati “Babanzaga kutwishyura neza nyuma bakabona kutwambura. Urugero hari nk’udufitiye miliyoni zirenga 14 Frw, aho yatwambuye amafaranga y’amata akanatwambura ay’ibicuba byacu twamukodeshaga.”

Mugabusengamungu yakomeje avuga ko kuri ubu abayobozi b’amakusanyirizo bose bishyize hamwe bashaka umwavoka ngo barateganya kurega abo ba rwiyemezamirimo babambuye mu nkiko.

Minisitiri Mukeshimana yemeye kandi ko bitarenze ukwezi kumwe Akarere ka Kayonza na Kirehe twashyigikirwa tugahabwa ibigega binini byagenewe gutwarwamo amata kugira ngo bijye biborohera kuyageza ku Inyange Industries, atongeye gutwarwa na ba rwiyemezamirimo.

Imyanzuro y’Inama yabereye i Gatsibo, yafashe imyanzuro yo kubaka amakusanyirizo yigenga yujuje ibisabwa biri mu bigomba gushyirwamo imbaraga nk’uko byakozwe mu ntara y’Amajyepfo n’Amajyaruguru.

Minisieri y’ubuhinzi n’ubworozi kandi yemeye gushyigikira Kayonza binyuze muri RDDP (umushinga wa Minagri wo guteza imbere ubworozi bw’inka z’amata ukorera mu turere 12) na Kirehe binyuze muri PASP (umushinga utera inkunga ibikomoka ku buhinzi n’ubworozi) kugira ngo babone ibigega byabugenewe byo gutwara amata (Milk tanks). Ibi bigakorwa mu kwezi kumwe.

Inyange Ltd kandi igomba gutangira kugura amata yo ku makusanyirizo ya Kayonza.

Aborozi bagiranye na Minisitiri w'ubuhinzi n'ubworozi ibiganiro byo kongera umukamo
Sebudandi Steven yavuze ko bafite ikibazo cyo kubona isoko bagurishaho amata yabo
Minisitiri Mukeshimana yemereye aborozi ba Kayonza kubashakira ibigega binini bazajya bagemuramo amata ku Inyange Industries
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza