IGIHE

Kabuga yashinjwe n’uwamubonye yinjira muri RTLM

0 23-11-2022 - saa 10:02, IGIHE

Umutangabuhamya wahoze ari Interahamwe ufungiye mu Rwanda nyuma yo guhamywa uruhare muri Jenoside yakorewe Abatutsi, yashinje Kabuga Félicien ko yamubonye yinjira mu Biro bya Radiyo RTLM mu 1994.

Ubuhamya bw’uyu mutangabuhamya bwumviswe n’ Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT) ruri kuburanisha urubanza rwa Félicien Kabuga mu mizi.

Kabuga akurikiranyweho ibyaha bya jenoside, gushishikariza no gukangurira rubanda gukora jenoside, umugambi wo gukora jenoside n’ibyaha byibasiye inyokomuntu byo gutsemba, ubwicanyi no gutoteza, byose byakozwe mu gihe cya Jenoside yakorewe Abatutsi mu 1994.

Yabutanze yifashishije ikoranabuhanga ari i Arusha muri Tanzania, mu gihe Kabuga we yakurikiye urubanza mu buryo bw’ikoranabuhanga ari muri gereza afungiyemo i Hague mu Buholandi.

Yavuze ko yabonye Kabuga yinjira aho RTLM yakoreraga mu Mujyi wa Kigali mu 1994 [aho yakoreraga ni ahari Car Free Zone uyu munsi mu nyubako yakoreragamo KCB].

Yasobanuriye inteko iburanisha ko yari asanzwe azi Kabuga, ndetse ko yamwiboneye n’amaso ye yinjira kuri iyo radiyo muri Mata 1994, gusa asobanura ko atibuka neza abantu bari kumwe.

Uwo munsi, ngo Kabuga ntiyahamaze umwanya munini cyane ko hari mu gihe cy’urugamba rwa RPA rwo guhagarika Jenoside yari imaze iminsi icumi itangiye, kuko ngo uwo munsi hari ku wa 17 Mata.

Kabuga uwo munsi ngo yinjiye muri RTLM, amaramo iminota igera kuri 15 nyuma asohoka ari kumwe n’uwari Umuyobozi wayo witwa Habimana Phocas hamwe n’Umwanditsi Mukuru wayo witwaga Gahigi Gaspard.

Yasobanuye ko nyuma yaganiriye na Gahigi akamubwira ko RTLM ari iya Kabuga, anavuga ko we ubwo yayiyumviye iri gutanga ibiganiro byari bigamije gutuma Abatutsi bicwa.

Mu bo azi bishwe, yavuzemo uwari umukuru w’ishyaka CDR, Martin Bucyana , wishwe muri Gashyantare mu 1994. Amaze kwicwa, ngo RTLM yatangaje ko yishwe n’Abatutsi bamuteze ageze i Butare avuye muri mitingi ya CDR i Cyangugu aho yavukaga.

Urupfu rwe n’ibyo RTLM yatangaje ngo byatumye Interahamwe [urubyiruko rwo muri MRND] hamwe n’Impuzamugambi za CDR, batera Segiteri ya Gikondo aho yari atuye, bica Abatutsi bari bahatuye, abandi barahunga.

Yatanze n’urugero rw’urupfu rw’uwo bitaga Katumba wari "Impuzamugambi ikomeye ya CDR yabaga mu Biryogo muri komine Nyarugenge".

Urupfu rwe ngo rwatangajwe kuri RLTM, hanyuma Impuzamugambi n’Interahamwe zihita zitangira guhiga Abatutsi zibica, abandi bava mu Biryogo bahungira ahantu harimo nko kuri Paruwasi ya Mutagatifu Charles Lwanga i Kigali.

Isano ya Kabuga na RTLM

RTLM yifashishwaga mu icengezamatwara ikanatera urwango rwarangiriye mu ihohoterwa ry’Abatutsi; noneho n’Interahamwe zumvaga ubutumwa bwa RTLM ziritoza, zitwaza intwaro ziteguye gushyira ubu butumwa mu bikorwa.

Mbere ya jenoside, Kabuga yari umwe mu bantu bari bakize kandi bakomeye mu Rwanda, akaba yari n’inshuti ya hafi ya Perezida Habyarimana, umugore we Agathe Kanziga n’agatsiko k’ akazu kayoboraga u Rwanda.

N’ubwo yari afite amateka yoroheje cyane kandi akaba atarize amashuri ahambaye, yakoze ubucuruzi ku rwego ruhambaye, hanyuma abukoresha kugira ngo yubake umubano n’abayobozi ba politiki, ingabo n’abandi bacuruzi hirya no hino mu Rwanda.

Igihe amashyaka menshi yatangiraga ndetse n’intambara ya FPR yo kubohora u Rwanda yatangiraga mu ntangiriro ya za 1990, habayeho amacakubiri imbere mu buyobozi bw’u Rwanda, hagati y’abiyemeje gukomeza ubutegetsi bw’Abahutu gusa n’abashyigikiraga amahoro n’ibitekerezo bitandukanye.

Kabuga yakoresheje ubutunzi bwe no kuba yaravugaga rikijyana kugira ngo ashyigikire ingengabitekerezo ya ‘Hutu Power’ n’amagambo yangishaga rubanda Abatutsi.

Kabuga hamwe n’izindi ntagondwa z’Abahutu, yateguye ishyirwaho rya RTLM kugira ngo ikwirakwize ingengabitekerezo ya jenoside,

Yatanze amafaranga y’ibikoresho bikenewe, abona imirongo yo gutangaza amakuru, ategura inkunga y’inguzanyo, yandikisha RTLM kandi aranayiyobora binyuze muri Comite d’Initiative, ari rwo rwego rw’ubuyobozi bwa RTLM rukumbi rwari ruhari.

RTLM, n’ubutumwa bwayo bwo kurwanya Abatutsi – yagize abayikurikira benshi vuba cyane imaze gutangira gukora itangazamakuru ryayo rya mbere muri Nyakanga 1993.

Igihe Minisiteri y’Itangazamakuru yagerageje gufunga RTLM kubera gukwizakwiza urwango, Kabuga yavugiye iyo radio ku buryo yakomeje gukora nta nkomyi.

Jenoside itangiye ku ya 7 Mata 1994, RTLM yari hose, isakaza ibiganiro amasaha 24 kuri 24 ku buryo yarenze Radio Rwanda nka radiyo yumvwaga na benshi.

Ibiganiro bya RTLM byahamagariraga "gutsemba Abatutsi ku Isi" no "kubazimiza burundu". RTLM yategetse kandi Interahamwe gutera abantu runaka, inashishikariza cyane cyane abagore b’abatutsi gufatwa ku ngufu hanyuma bakicwa.

Usibye kuba yaragize uruhare rukomeye mu gukwirakwiza ingengabitekerezo ya jenoside, Kabuga nanone yateye inkunga itaziguye umutwe w’ Interahamwe, waje kuba umwe mu yagize uruhare runini muri jenoside.

Yabahaye inkunga, agura kandi akwirakwiza intwaro, ategura imyitozo hanyuma ku giti cye awushishikariza ubwicanyi.

Kabuga yabanje gushyigikira Interahamwe mu turere twa Muhima na Kimironko ya Kigali, hanyuma ava muri Kigali yerekeza i Gisenyi hagati muri Mata 1994.

I Gisenyi, Kabuga yari ku isonga mu bikorwa byo guharanira ko intwaro ziboneka, amafaranga atabura, ubwikorezi ndetse no gutera inkunga Interahamwe kugirango itsembabwoko rikomeze.

Amaherezo Kabuga yahunze Gisenyi n’u Rwanda nyuma ya jenoside irangiye muri Nyakanga 1994.

Kabuga yashinjwe n'uwamubonye yinjira mu biro bya Radio RTLM rwagati mu Mujyi wa Kigali mu 1994
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza