IGIHE

Ingengo y’imari y’Umujyi wa Kigali ya 2020/2021 yagabanutseho 19%

2 29-06-2020 - saa 21:23, Twarabanye Venuste

Umujyi wa Kigali wemeje Ingengo y’imari uzakoresha mu 2020/2021 ingana na miliyari 100 Frw, yagabanutseho 19% ugereranyije n’iy’umwaka ushize yanganaga na miliyari 124 Frw.

Ni ingengo y’imari irimo amafaranga azaturuka mu kigega cya leta agera kuri 40%, azava mu misoro n’amahoro yinjizwa n’Umujyi wa Kigali nayo agera kuri 40% mu gihe andi akazava mu baterankunga batandukanye.

Imishinga y’ibikorwa remezo niyo izatwara ingengo y’imari nini igera kuri 51%, ibindi bikorwa bitware 49%.

Irimo imihanda na za ruhurura bizabanza kuzuzwa, kunoza ibyo gutwara abantu mu Mujyi wa Kigali, gucanira imihanda itandukanye no kubaka imihanda mishya ya kilometero zirenga 30.

Mu miturire biteganyijwe ko muri uyu mwaka w’ingengo y’imari, Umujyi wa Kigali uzakora inyigo kandi ugatangira kubakira abatuye mu manegeka harimo abo kuri ruhurura ya Mpazi n’abatuye ahashyira ubuzima bwabo mu kaga muri Nyabisindu, Gatenga na Nyagatovu.

Harimo kandi kubaka inzu z’abatishoboye n’abasanzwe bafashwa n’Ikigega gifasha Abacitse ku icumu, FARG.

Muri gahunda zo gukura abantu mu bukene ziziharira 4.9% by’ingengo y’imari hazabaho guhanga imirimo mishya ibihumbi 49 ndetse hafashwe n’amakoperative agamije kuzamura abayagize.

Mu yindi mishinga, iyi ngengo y’imari izasiga hubatswe ibyumba by’amashuri 1634 n’ubwiherero 2263 ndetse n’ibigo nderabuzima bishya bitatu.

Umuyobozi w’Umujyi wa Kigali, Pudence Rubingisa, yavuze ko igabanuka rya 19% rishingiye ku nguzanyo n’amafaranga y’abaterankunga ataragarutse mu ngengo y’imari y’uyu mwaka.

Mu mwaka ushize harimo umushinga minini wo kubaka imihanda ireshya n’ibilometero 54 yari yihariye miliyari 29 Frw.

Yavuze ko muri rusange amafaranga Umujyi wa Kigali winjiza n’azava muri leta yo aziyongera.

Ati “Kugabanuka kw’ingengo y’imari, urebye iyo tuzakoresha ni izava mu misoro n’amahoro iziyongera ku kigereranyo cya 10% n’izava mu kigega cya leta iziyongeraho 10%. Izagabanuka ni izava mu baterankunga, ku buryo ariyo ituma tugabanukaho 19% ariko ni ayabaga yarafashwe mu gukora ibikorwa remezo nk’inkunga cyangwa umwenda ayo rero ntabwo ahari.”

Rubingisa yagaragaje ko ingengo y’imari ikiri ntoya, atanga ingero avuga ko Umujyi wa Kigali ufite ruhurura 40 zo gukora ariko ukaba ufite gusa iyo gukora enye ndetse hakiri abagituye mu manegeka bakeneye gutuzwa neza n’imihanda ikeneye kubakwa n’ibindi.

Ibikorwa by’Umujyi wa Kigali biteganywa mu ngengo y’imari hashingiwe ku cyerekezo cy’igihugu ariko by’umwihariko ku cyerekezo cyo kugira Kigali umujyi w’icyitegererezo mu 2050.

Umuyobozi w'Umujyi wa Kigali, Rubingisa Pudence, yavuze ko kugabanuka kw'ingengo y'imari bishingiye ku mishinga minini yari mu y'umwaka ushize
Umuyobozi w'Urugaga rw'Abikorera mu Mujyi wa Kigali, Bitwayiki André, yasabye ko mu gukura abantu mu bukene bajya babaha amahugurwa kurusha gushyira abantu mu matsinda bakabaha amafaranga
Inama Njyanama y'Umujyi wa Kigali yemeje ingengo y'imari ya 100 115 365 485 Frw ya 2020/2021
Inama Njyanama y'Umujyi wa Kigali yemeje ingengo y'imari ya 100 115 365 485 Frw
Perezida w'Agateganyo w'Inama Njyanama y'Umujyi wa Kigali, Dr Kayihura Muganga Didas, ashyikiriza Umuyobozi w'Umujyi wa Kigali ingengo y'imari ya 2020/2021
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Tegamaso 2020-06-30 23:17:32

Ubuse ko igabanutse batarakoze uyu muhanda wa Mageragere,ubu noneho uracyakozwe kdi buri mwaka ushyirwamo Kandi uyu muhanda urakenewe pe!!!

2
Sebihe 2020-06-29 23:11:22

Bajye bibuka n’aba basenyewe mubishanga ,kuko mayor ndabona ntacyo yabivuzeho.

Kwamamaza