IGIHE

Ingabire Marie Immaculée yavuze kuri Idamange, ibiganiro byo ku mashyiga n’abitwaza kunenga leta bagakora ibyaha

0 18-02-2021 - saa 07:23, Akayezu Jean de Dieu

Mu gihe Abanyarwanda bitegura kwibuka ku nshuro ya 27, Jenoside yakorewe Abatutsi mu 1994, ni nako bamwe mu bayigizemo uruhare bagitsimbaraye kubyo bakoze na bamwe mu bayirokotse bahisemo kubayoboka, bakomeje kumvikana mu mugambi wo kuyipfobya no kuyihakana bakoresheje imiyoboro irimo imbuga nkoranyambaga.

Abenshi bakora ibi bikorwa babinyuza kuri YouTube, Twitter n’ahandi barimo abasize bakoze Jenoside yakorewe Abatutsi bakomeje gukwirakwiza amatwara agamije kuyihakana no kuyipfoba, ababakomokaho biyemeje kusa ikivi cyabo n’abandi batandukanye bakomeje kubatera ingabo mu bitugu.

Komisiyo y’Igihugu yo Kurwanya Jenoside (CNLG), iherutse gutangaza imiyoboro ya YouTube irimo uwa Idamange Iryamugwiza Yvonne n’abandi batandukanye bafite imbuga zinyuzwaho ibiganiro bisa n’ibihembera ingengabitekerezo ya Jenoside.

Mu kiganiro cyihariye na IGIHE, Ingabire Marie Immaculée, impirimbanyi mu kurwanya ruswa n’akarengane akaba n’Umuyobozi wa Transparence International Rwanda, yavuze ko akenshi iyo Abanyarwanda bageze mu bihe byo Kwibuka Jenoside yakorewe Abatutsi, havuka amajwi menshi y’abayihakana bagamije gukomeretsa abayirokotse.

Ati “Usubize amaso inyuma ubirebe [...] igihe cyose iyo tugiye kwinjira muri ibi bihe by’icyunamo bene bariya bantu baravumbuka nk’amadayimoni cyangwa amashitani utazi iyo bavuye, bakavuga bakavuga. Niba baba bagira ngo abantu ntibababaye cyane, niba baba bagira ngo abantu ntibatonekara.”

Yakomeje agira ati “Noneho rero icyunamo kikaba cyarangiza gutuza bagaceceka bakajya mu bindi. Ariko mbere y’icyunamo muzabirebe,ibikorwa nka biriya by’ingengabitekerezo no gupfobya Jenoside yakorewe Abatutsi biraba.”

Itegeko ryo mu 2013 rishyiraho icyaha cy’ingengabitekerezo ya Jenoside n’ibindi byaha bifitanye isano nayo, rivuga ko guhakana Jenoside bishingiye ku magambo agoreka ukuri kuri Jenoside hagamijwe kuyobya rubanda no kwerekana ko Jenoside yakorewe Abatutsi itateguwe.

Rikomeza rivuga ko gupfobya bigizwe n’amagambo agabanya uburemere cyangwa ingaruka za Jenoside yakorewe Abatutsi no koroshya uburyo Jenoside yakozwemo.

Itegeko riteganya ibyaha n’ibihano rigaragaza ko ibyaha by’ingengabitekerezo bihanishwa hagati y’imyaka itanu n’imyaka 15 y’igifungo hiyongereyeho n’ihazabu y’ibihumbi 500 Frw kugeza kuri miliyoni 2 Frw.

Ingabire avuga ko gufunga abagaragaraho ibikorwa nk’ibi by’ingengabitekerezo ari ibyo gutekerezwaho neza kuko akenshi bashobora kujya kuroga abo basanga muri gereza.

Ati “Kubafunga nta n’icyo byamara, ntacyo bimaze usibye ko wenda bajya kwangiza n’abari muri gereza, ahubwo ni bagume aha kandi bakomeze bavuge noneho bagaragare bose uko bakabaye. Uzi kwiyambura imyenda, ukiyambika ubusa ukajya hariya? Nibyo bari kwikorera.”

Yakomeje agira ati “Bariya kugenda ukabafunga, leta ikabatungisha imisoro yanjye, ntacyo mbona bimaze ahubwo ndagira inama abandi bantu b’imiryango yabo cyangwa inshuti zabo, nibabagire inama bareke gukomeza batoneka Abanyarwanda.”

Avuga ko ibikorwa nk’ibi byo gupfobya no guhakana Jenoside yakorewe Abatutsi kandi yaremejwe n’Umuryango w’Abibumbye ndetse n’abanyarwanda bose bayemera ari ubugome , usanga abenshi babukora bitwaje ko bari mu buvugizi.

Ati “Ubugome bungana kuriya ariko nibabureke, barafata ibintu by’ubugome, bakabyita ubuvugizi. Kuki bihaye kumenya ko bazi ubwenge kuturusha twese? Ariko rwose bubahe abantu bivugire ibyo bashaka benenge imihanda, ibiki byose ariko rwose birinde gukomeretsa abandi, bitonde.”

Yakomeje agira ati “Nibareke ubugome, ariko ubundi bagiye bareka inda nini? Kandi buriya cyera abakurambere baravugaga ngo urya nk’inka ugapfa nk’imbwa, warya duke ukaryama kare.”

Idamange warihiwe amashuri na FARG, ari mu bari gupfobya Jenoside

Ku mugoroba wo ku wa 15 Gashyantare 2021, Urwego rw’Igihugu rw’Ubugenzacyaha, RIB, rwatangaje ko rwataye muri yombi Idamange Iryamugwiza Yvonne akurikiranyweho ibyaha birimo guteza imvururu cyangwa imidugararo muri rubanda.

Uyu umubyeyi w’imyaka 42, yari umaze iminsi yumvikanaho imvugo zirimo n’izipfobya Jenoside yakorewe Abatutsi, kandi ari mu bayirokotse wanagobotswe n’Ikigega kigenewe Gutera Inkunga Abacitse ku Icumu batishoboye, FARG.

Yifashishaga urukuta rwa YouTube maze agatambutsa ibiganiro birimo imvugo zagaragajwe nk’izigumura abaturage, ibyafashwe nko guhakana no gupfobya Jenoside n’ibindi bitandukanye bikekwa ko bigize ibyaha.

Idamange ni umwe mu bafashijwe, uretse kubona umutekano, uretse guhumurizwa, Yvonne yarihiwe amashuri.

Ingabire avuga ko bitangaje kubona umuntu anenga akanenga n’abamwishyuriye amashuri by’umwihariko agashaka no gupfobya Jenoside yarokotse.

Ati “Umuntu unenga, akanenga n’abamwishyuriye ishuri! Cyakora bo nanjye simbanenga ndababariye kuko amafaranga yabo yapfuye ubusa. Simpamya ko n’ayo mashuri avuga yayize ntabwo azi kugira intego ariko noneho yarangiza akanahangara cyane, akajya no gupfobya Jenoside.”

Yakomeje agira ati “Utarayikoze cyangwa utayemera ntabwo wakoresha imvugo nk’iriya, niba ataranayikoze ariko arayemera. Wenda we abona yarayigizemo amahirwe n’ayo mashuri akayishyurirwa. Ni bavuga irije, ikije cyose aravuga atitaye…. Mbese uriya mugore njyewe singishaka no kumutindaho cyane.”

Ese abaturage ntibabeshya Leta?

Kuva muri Werurwe 2020, igihugu cy’u Rwanda n’Isi yose biri mu bihe bidasanzwe byazanywe n’icyorezo cya COVID-19, cyatumye ibikorwa bitandukanye bigenda bihagarikwa mu rwego rwo kwirinda ikwirakwira ryacyo.

Nko mu Rwanda, hari ibyemezo bitandukanye byagiye bifatwa birimo gushyira abaturage muri gahunda ya guma mu rugo, gufunga ibikorwa birimo utubari n’ibindi bishobora kuba intandaro y’ikwirakwira ry’iki cyorezo.

Mu byo Idamange yumvikanye anenga harimo amabwiriza yashyizweho n’inzego zishinzwe ubuzima mu Rwanda hagamijwe kwirinda ikwirakwira rya COVID-19, arimo amasaha yo gutaha, gufunga bimwe mu bikorwa n’ibindi.

Ingabire yavuze ko abona Idamange anenga akanenga n’ibyo bidafite ishingiro kuko atigeze na rimwe abigaragaza mbere hose ngo inzego zibikurikirane ahubwo afite uwamutumye.

Ati “Uriya mugore uwamubaza, ngo ikibazo na kimwe muri biriya avuga icyo yigeze abaza muri ziriya nteko z’abaturage cyangwa n’inama ziba nyuma y’umuganda, ntacyo wabona. Ni ukuvuga rero ko atari agifite, ni ibyo ahimbye ubu ubwo impamvu itumye azihimba zirahari n’ingaruka zabyo arazitegereza.”

Yakomeje agira ati “Umuntu witwa ngo ni umugore, ni umubyeyi akananirwa gucunga urubyaro rwe yicaye kuri YouTube, umwana we uri munsi y’imyaka 18 akagomba kurara muri sitade kubera ko yarengeje amasaya [ateganywa n’amabwiriza ya COVID-19], ubwo koko uwo muntu ikindi wamuvugaho ni iki?”

Ntabwo ari Idamange gusa umaze iminsi yumvikana ku mbuga nkoranyambaga mu bikorwa binenga bimwe mu byemezo bifatwa n’inzego zitandukanye mu Rwanda gusa , kuko ku mbuga za YouTube hari ibiganiro bitandukanye by’amajwi y’abantu ari muri uwo mujyo wa Idamange.

Ibi ni ibintu bishobora gutuma umuntu yibaza niba ibyo abaturage bereka leta aribyo koko bafite mu mitima yabo cyangwa baganira ku mashyiga.

Ingabire avuga ko u Rwanda ari igihugu kigendera ku mategeko ku buryo byajya biba byiza niba hari ubona icyo anenga yagitangaza mu buryo buboneye cyangwa bukurikije amategeko kigashakirwa umuti.

Yagize ati “Icya mbere na mbere nibo bibeshya, kuko njye nawe turi leta. Impamvu ni uko mu buzima duhura nabwo buri munsi hari ibitunogera n’ibitatunogera. Amategeko tugenderaho hari adushimisha n’atadushimisha.”

Yakomeje agira ati “Ariko niba ubona hari ikibangamiye Umunyarwanda, kigaragaze uburyo kibangamye n’uburyo wifuza ko cyakosoka, naho kujya hariya ukabeshya ugakoma amashyi hanyuma waza kugera ku ishyiga cyangwa izi YouTube ugakora izindi.”

Abakoresha imbuga nkoranyambaga by’umwihariko urubyiruko, basabwa kwitwararika ku bizitangarizwaho cyane ko bimwe muri byo biba bigize ibyaha bityo bikaba byabatura mu mutego wo gukurikiranwa n’ubutabera.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza