IGIHE

Impuhwe za kibyeyi zatumye Mukashyaka ashinga ikigo cyita ku bana bafite ibibazo byo mu mutwe

0 25-01-2023 - saa 11:41, Ntabareshya Jean de Dieu

Ibibazo by’ubuzima bwo mu mutwe ni bimwe mu bidakunze kwitabwaho mu muryango nyarwanda, byagera ku bakiri bato ugasanga ni agatereranzamba kubera imyumvire itari myiza ya bamwe babigereranya n’amarozi.

Mukashyaka Agnes ni umwe mu bagize uruhare rwo gufasha mu guteza imbere uburere bw’abana bafite ubumuga by’umwihariko ubwo mu mutwe bakunze guhezwa.

Ibikorwa bye abinyuza mu muryango ‘Izere Mubyeyi’ ufasha abana bafite ubumuga n’ibibazo by’ubuzima bwo mu mutwe kugerwaho na serivisi z’uburezi basaga n’abahezwaho nkuko Mukashyaka abisobanura.

Ati “Ujya kujyaho hari abana bafite ibibazo by’ubuzima bwo mu mutwe batari bafite kirengera, abandi bajya ku mashuri ariko bo batajyayo. Bamwe birirwa bakingiraniwe mu nzu. Uyu muryango rero washinzwe n’ababyeyi n’inshuti zabo kugira ngo bashobore gufasha abo bana bazagirire umumaro umuryango nyarwanda aho kuzaba umuzigo ku miryango cyangwa ku gihugu.”

Yavuze ko kuri ubu iki kigo gifite abana barenga 125 bafashwa guhabwa serivisi zitandukanye zirimo ubugororangingo n’uburezi kuko ari zo nshingano z’umuryango.

Umubyeyi ufite umwana ufashwa n’iki kigo, Mumararungu Anette yavuze ko umwana we amaze imyaka igera kuri itanu ahabwa ubufasha bw’ibanze kandi agaragaza ko biri kugenda bitanga icyizere.

Ati “Nkimara kubona ko afite ikibazo, ntabwo nabyakiriye ariko nza kugira amahirwe yo kubona iki kigo. Ababyeyi bamwe barambwiraga bati ‘nubwo uyu mwana umukingirana hari abantu bashobora kumufasha akiga.”

Yavuze ko byasabye imbaraga kugira ngo yumve ko bishoboka, umwana utarabashaga kweguka aho aryamye akagororwa cyangwa agafashwa kwiga nk’uko babimubwiraga.

Ati “Nari naramaze kwiheba kubera ko abantu bantukaga, umugabo twabyaranye aranta ngo iwacu ntitwabyara ibigoryi. Ubu gutya umureba aragenda atanga icyizere kuko nk’izi ntoki ntizafataga, aya maguru na yo ntiyarambukaga ndetse n’ijosi ryaragwaga ariko aho mugereje aha baramugoroye biremera ubu abasha kwicara kandi baranamwigisha.”

Umukozi ushinzwe ubugororangingo muri iki Kigo ukunze gufasha abana bafite ubumuga bw’ingingo, Nyurwimfura Tresor, yavuze ko nubwo batanga ubufasha ku bana ariko usanga ababyeyi bakora amakosa yo gutinda kuvuza abana babo bigatuma ku bafasha bigorana.

Yakomeje ati “Hari ibibazo by’uko ababyeyi babibona batinze, ndetse bakanabyemera batinze abandi ugasanga bafite imyumvire mibi ko ari amarozi cyangwa bakabifata nk’umwaku uterwa n’uwo bashakanye bikaba byaba intandaro yo gutandukana. Hari umwana bakuzanira afite imyaka 10 cyangwa 15 atarigeze ahabwa ubuvuzi bigatuma urwana n’ikintu gisa n’aho cyagusize. Ibyo bituma umwana niba hari aho yari kugera akira kubera imyaka afite bikaba imbogamizi cyane.”

Kuri ubu Izere Mubyeyi Organisation itanga serivisi z’uburezi budaheza ku bana biga mu mashuri y’inshuke, uburezi bwihariye bw’abafite ibibazo by’ubuzima bwo mu mutwe no kwigisha imyuga abana bakuru baba barafashijwe na wo.

Abana bafite ibibazo by'ingingo babanza kwitabwaho
Abana bigishwa imikino itandukanye mu gukangura ubwenge
Hari n'ubufasha bwihariye buhabwa abafite ibibazo by'ubuzima bwo mu mutwe
Bagira umwanya wo kugaragaza impano bafite
Mukashyaka avuga ko gushinga uyu muryango yabikomoye ku kuba abafite ibibazo byo mu mutwe birengagizwa
Mumararungu agaragaza ko umwana ufite ubumuga iyo akurikiranwe hakiri kare bitanga umusaruro

Amafoto: Munyakuri Prince

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza