IGIHE

Impamvu bamwe mu bana b’abakozi b’Imana bakunze kubonwa nk’ibirara iyo bakuze

0 26-06-2022 - saa 09:02, Hakizimana Jean Paul

Abana b’abapasiteri ni bamwe mu bakunze kubonwa nk’abananiranye bitewe n’imyitwarire bakunze kugaragaza ihabanye cyane n’iy’ababyeyi babo. Akenshi hari abavuga ko nta bidasanzwe bakora ahubwo ngo abantu babarebera mu isura y’ababyeyi babo bakirengagiza ko umuntu yivukira.

Mu bana bakuriye mu ngo z’abantu bakunda gusenga cyangwa se abihayimana, hari abo usanga bakora ibihabanye cyane n’ababyeyi babo dukunze kubona ari abavuga rikumvikana.

Mu minsi ishize hari umusore w’umumotari twaganiriye ubwo yari antwaye kuri moto, ambwira ko yavuye kugororerwa Iwawa nyuma yo gufatwa yarasaritswe n’ibiyobyabwenge birimo urumogi, mugo n’ibindi byinshi.

Uyu musore yakomeje kunganiriza ambwira ko yatangiye kunywa ibiyobyabwenge ubwo yari yarajyanywe kwiga kure y’ababyeyi be akagira ukwisanzura cyane.

Yambwiye ko yanyweye ibiyobyabwenge kuko yari ageze kure y’ababyeyi be mu gihe ngo mbere akiga hafi bamuhozagaho ijisho, bakamubuza gukora ibyo ashaka.

Uyu musore yambwiye ko se ari umwe mu bapasiteri bakomeye cyane mu itorero ntaribugarukeho ariko ngo we ibyo kwitwara nka se byaranze.

Byatumye nshaka uko nganira na bamwe mu bana b’abapasiteri yaba abubatse ndetse n’urubyiruko kuri iyi ngingo ituma bananirana, abenshi bagaragaza ko kimwe mu bibatera uburara ari uko bakura ababyeyi babo basa n’ababafungiye ahantu hamwe.

Abenshi twaganiriye ntibifuje ko imyirondoro yabo ikoreshwa muri iyi nkuru kubw’impamvu zabo bwite gusa bavuze ko imwe mu mpamvu zituma bananirana harimo kuba sosiyete ibarebera mu ndorerwamo z’ababyeyi babo.

Umwe yagize ati “Ntekereza ko icya mbere kibitera ari imirererwe yacu, dukura dusanga ababyeyi bacu bifunze nabo bagashaka kudutwara gutyo, aho kutureka ngo twisanzure bagashaka ko natwe tujya mu mwuka. Iyo wa mwana amaze gukura rero hari ibyo aba atarakoze akabigirira amatsiko akabikora ari mukuru bikarangira bimuraruye.”

Undi yagize ati “ Umwana wa pasiteri afite amaso menshi amureba, amugenzura kuruta abandi bana. Iyo abana icumi bakoze ikosa nta kibazo, ariko iyo rya kosa rikozwe n’umwana wa pasiteri bihinduka ikibazo kandi ari ikosa rikorwa n’abandi bana.”

Hari abapasiteri barutisha abana babo insengero

Umwe mu baganiriye na IGIHE yavuze ko asa nk’utarigeze arerwa n’ababyeyi be ahubwo ngo yarezwe n’umukozi kuko ababyeyi be akenshi babaga bagiye gusenga no kwita ku bakristu.

Ati “ Nkanjye rwose sinavuga ngo Papa na Mama barandeze, nakuze buri munsi babyukira ku rusengero bakirirwayo. Nta mwanya nagize wo kuganira nabo kuko bajyaga muri ‘Burakeye’ nkiryamye, nataha ku mugoroba nkasanga nabwo ngo bari ku rusengero. Urumva rero gukurira mu buzima utabonamo urukundo rw’umubyeyi biri mu byatumye nsa nk’uwirera nisanga ntangiye gukora ibitandukanye nabo.”

Gutoteza umwana ugendeye ku gitutu cya rubanda

Hari undi musore twaganiriye avuga ko kimwe mu byatumye yangirika ari uburyo ngo yakoraga ikosa rito ku ishuri yanarikoranye n’abandi bana, abarimu n’abayobozi b’ikigo bagahita bamufata nk’uwakoze ibintu bitabaho.

Ibi ngo byagiye bituma umubyeyi we amuhana yihanukiriye cyane nyamara ngo amakosa yabaga yakoze ari amakosa asanzwe akorwa n’abandi bana.

Ati “ Hari ubwo rimwe badufashe twatorotse twagiye kureba umupira, abandi bana barabababarira njye babibwira papa [pasiteri]. Icyo gihe yarankubise bituma nkura noneho nshaka kumwereka ko njye ibyo nkora mbikora ku bwanjye ntateze kuba pasiteri.”

Ababyeyi babo babonwa nk’abamalayika mu rugo ari ibirura

Abana b’abapasiteri bavuga ko hari abafite ababyeyi sosiyete ifata nka malayika nyamara ngo mu rugo iwabo ari ibirura.

Ibi ngo bituma abana babo babona ibyo barimo nk’ubutekamutwe bagahitamo kumesa kamwe.

Umwe yagize ati “ Uzi kubona umubyeyi wawe ari kubwira abakristu ko gusambana ari icyaha nyamara yarabyaye umwana hanze, atumvikana na Mama wawe kubera ubusambanyi bwe. Ubwo se ari wowe uzi amabanga nk’ayo ya papa wawe wasubira gusenga?”

Yakomeje avuga ko uretse ibyo byaha hari n’abo usanga bafite ababyeyi barwanira mu rugo bagera mu rusengero bakagenda baseka nk’aho nta cyabaye, ibi ngo bituma abana babo batabona ibyo bakora nk’icyitegererezo.

Bamwe mu bana bakuriye mu buzima nk’ubwo kandi bavuga ko batagira uruhare mu kwihitiramo aho basengera ahubwo ngo byose babikorerwa n’ababyeyi babo.

Hari uwagize ati “ Nkanjye nakuze ari itegeko ko mba muri korali nkanayicurangira kuko ryari itegeko rya Papa, ni ibintu njye ntakundaga pe. Maze gusoza amashuri yisumbuye nkajya muri kaminuza narabiretse ntangira kubaho mu buzima bwanjye bwite, abo twasenganaga bahise bavuga ngo narananiranye kuko naretse ibyo ntakunda nkakurikira inzozi zanjye.”

Uyu yakomeje avuga ko ibi bijyana n’imyambarire aho ngo umwana wa pasiteri wambara ipantalo ari umukobwa abantu bamufata nk’ikirara nyamara ngo atanarusha uburara abandi bana babo.

Umushumba mukuru w’itorero Four Square, Dr Masengo Fidèle yabwiye IGIHE ko abana b’abapasiteri kimwe n’abana b’abayobozi ngo nta kidasanzwe bakora muri sosiyete ahubwo ngo abantu baba bifuza kubabona mu isura y’ababyeyi babo.

Yagize ati “ Abapasiteri ni abantu bazwi cyane muri rubanda, kubera iyo mpamvu abana babo nabo baramenyekana kuburyo iyo umwe atitwaye neza abantu bahita babifata nk’aho abana babo bose bananiranye ariko na none kuko banabamenyekana bakiri bato cyane usanga n’iyo bakoze amakosa akorwa n’abandi bana, abantu babifata ukundi ntibite ko ari abana nk’abandi.”

Yavuze ko hari abakozi b’Imana batita ku bana babo nkuko bikwiriye kubera kubaburira umwanya bigatuma umwana yigenga .

Dr Masengo avuga ko abapasiteri bakwiriye kwegera abana bakabaganiriza aho biri ngombwa bakabacyaha. Ngo bakwiriye kandi kujya basengera abana babo cyane kuko Satani ashobora kumufatirana mu ntege nke ze akamutwara.

Ababyeyi basabwe korohera abana babo bakagira ubwinyagamburiro kugira ngo bitazabagaruka nyuma
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza