IGIHE

Ikibazo cy’ihohoterwa rikorerwa mu ngo cyahagurukiwe

0 14-01-2022 - saa 08:52, Ntabareshya Jean de Dieu

Inzego zitandukanye zita ku muco no kurengera umuryango zagiranye inama nyungaranabitekerezo n’abasenateri yari igamije kurebera hamwe umuti w’ihohoterwa rikorerwa mu ngo.

Iyi nama yabaye kuri uyu wa Kane tariki ya 13 Mutarama 2022, yahuje abasenateri n’imiryango itandukanye yita ku muryango bagaruka ku bibazo bicyugarije umuryango birimo n’imvugo zidakwiye ziganisha ku ihohoterwa rikorerwa abagore harebwa n’uburyo byakemuka.

Senateri Niyomugabo Cyprien, yagaragaje ko hari imvugo zikiri mu muco nyarwanda zimakajwe ndetse zanditswe no mu bitabo bitandukanye zigira umugabo umuntu w’igitangaza.

Harimo imvugo nka ‘uruvuze umugore ruvuzwa umuhoro, ‘amazi abaye make aharirwa impfizi, ‘amakosa y’umugabo ni bwo buryo bwe’ n’izindi.

Senateri Niyomugabo yasabye ko izo mvugo n’intekerezo nk’izo zahindurwa mu rwego rwo gushakira hamwe ibisubizo ku iterambere ry’umuryango nyandarwanda n’igihugu muri rusange.

Ati “Bamwe baravuga bati ‘icyaziraga ntikikizira’, abandi bati ‘icyaziraga kiracyazira’, ‘intamenya irira ku muziro’. Ni byo twageze aho imigenzo n’imihango byari bigezweho itakijyanye n’igihe kuko ibangamiye kirazira z’umuryango w’uyu munsi Abanyarwanda barimo.”

Yavuze ko hari bimwe byakwifashishwa mu gukemura ibibazo by’ihohoterwa rigikorerwa mu ngo birimo indangagaciroremezo Abanyarwanda bahisemo, imvugo nziza n’umutima mwiza byafasha kuzamura imyumvire y’Abanyarwarwanda.

Yasabye ko ingeri y’ubuvanganzo zakongera gusesengurwa zikavugururwa kugira ngo harebwe neza ibyakorwa mu guteza imbere abaturage no gukora imfashanyigisho ikubiyemo imvugo nziza.

Imiterere y’ikibazo

Ubusanzwe ihohoterwa rikorerwa mu ngo riri mu buryo butandukanye, rishobora gukorerwa ku mitekerereze, ku mubiri, ku mwanya ndangagitsina, ku mitungo n’ibindi kandi rishobora gukorerwa abantu bo mu ngeri zitandukanye.

Ubushakashatis bw’Ikigo cy’Igihugu cy’Ibarurishamibare mu Rwanda, NISR ku mibereho y’Abanyarwanda bugaragaza ko abagore bemeza ko bakubiswe n’abagabo babo nibura bangana na 50% mu 2019-2022 bivuye kuri 41% mu 2014-2015 mu gihe abagabo bangana na 18% mu 2020.

Abagore bahuye n’ihohoterwa kugeza ubu bari hagati y’imyaka 15-49 barikorewe n’abo bashakanye bangana na 60%, abo bahoze babana bakaba baratandukanye ni 27%, abarikorewe na ba nyina cyangwa ba nyirabukwe ni 10%.
Mu gihe abagore bari iwabo bahuye na ryo, abagera kuri 42% barikorerwa n’ababyeyi.

Nubwo bimeze bityo ariko usanga hari intambwe iri guterwa aho 82% by’abagore basigaye bagira uruhare mu gufata ibyemezo ku birebana n’ubuzima bwabo, abagira uruhare mu birebana no kugurisha umutungo bangana na 78%, abagira uruhare mu gusura cyangwa gusurwa n’inshuti ni 87 mu gihe abavuga ko nta ruhare bagira kuri ibyo bangana na 6%.

Minisitiri w'Uburinganirire n'iterambere ry'Umuryango, Prof. Bayisenge Jeannette yavuze ko hari ibiri gukorwa bigamije gukemura ibibazo bicyugarije umuryango

Minisitiri w’Uburinganire n’Iterambere ry’Umuryango, Prof. Bayisenge Jeannette, yavuze ko ubusanzwe umuryango ari izingiro n’itangiriro ry’ubuzima cyane ko ariho Umunyarwanda arererwa.

Ati “Ikindi gikomeye ni uko umuryango ari igicumbi cy’umuco n’uburere akaba ari itangiriro ry’ubuzima kandi ni ho ha mbere higishirizwa indangagaciro.”

Yagaragaje ko hari ibyaha bitanu biza ku isonga kugeza ubu mu muco nyarwanda birimo guhoza ku nkeke, gukubita no gukomeretsa, gukoresha undi imibonano mpuzabitsina ku gahato, ubujura bukoresheje uburiganya, gusambanya abana n’ibindi.

Prof. Bayisenge yavuze ko kugeza ubu nubwo ibyaha biregerwa urwego rw’ubugenzacyaha mu Rwanda bisobanuye ko Abanyarwanda bakomeje gutinyuka kuvuga ku karengane bahura na ko gakorerwa mu muryango.

Yikije cyane ku cyaha cyiza ku isonga cyo gusambanya abana aho abangana na 43 % by’abasambanywa usanga bari hagati y’imyaka 4 na 17.

Kuva 2019 kugera muri 2021 hari ibirego by’ababyeyi bagera ku 159 bakurikiranyweho kwica abana babo bibyariye, mu gihe abaguye mu makimbirane y’abashakanye bagera ku 169 binganjemo abagore bagizwe na 62%.

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yagaragaje ko kuva na kera Abanyarwanda bagiye babeshwaho no kubaha indangagaciro z’umurage nyarwanda.

Bamporiki yavuze ko Abanyarwanda bakwiye kwiyubaka bashingiye ku ndangagaciro zirimo ubumwe, ubupfura, urukundo n’izindi.

Umunyamabanga wa Leta muri Minisiteri y’Urubyiruko n’Umuco, Bamporiki Edouard, yagaragaje ko kuva na kera Abanyarwanda bagiye babeshwaho no kubaha indangagaciro z’umurage nyarwand

Hakenewe impinduka mu migirire

Umunyamabanga Mukuru w’Urugaga rw’Abantu bakurikirana ibijyanye n’ibibazo by’ubuzima bwo mu mutwe, Uwihoreye Chaste yagaragaje ko kuba Abanyarwanda baranyuze mu mage bigira ingaruka ku mibereho, ubuzima n’imitekerereze y’abantu.

Ubushakashatsi bwo muri 2018 bwakozwe na Minisiteri y’Ubuzima bwerekanye ko 12% by’Abanyarwanda babana n’ikibazo cy’agahinda gakabije mu gihe ku barokotse jenoside yakorewe abatutsi ari 33%.

Uwihoreye yavuze ko ibibazo byo mu muryango bikwiye kwigwaho harebwe kuri izo ntekerezo zirwaye kugira ngo ibibazo bikemuke burundu.

Minisitiri w’Ubumwe bw’Abanyarwanda n’Inshingano Mboneragihugu, Dr. Bizimana Jean Damascène, yagaragaje ko hari ingamba nyinshi kandi nziza ariko ikibazo kikaba aho bidakorwa neza.

Yavuze ko hagiye gushyirwa imbaraga mu itorero ry’igihugu ku rwego rw’umudugudu no kubigeza mu nzego zose nk’igisubizo kirambye.

Abanyamadini na bo bemeje ko hari ibikwiye gukorwa mu rwego rwo kurwanya ihohoterwa rikorerwa mu ngo cyane ari n’inshingano zabo nk’uko Umujyanama wa Mufti w’u Rwanda Mbarushimana Suleiman yabigarutseho.

Perezida wa Komisiyo y’Imibereho y’Abaturage n’Ubureganzira bwa Muntu muri Sena, Umuhire Adrie yasabye inzego zose gukorana mu gushyira mu bikorwa ibitekerezo byatangiwemo muri iyo nama mu gukumira no gukemura ikibazo cy’ihohoterwa rikorerwa mu ngo.

Minisitiri w'Ubumwe bw'Abanyarwanda n'inshingano mboregihugu yasabye inzego kwirinda guca intege gahunda nziza zitangizwa zigamije gushakira hamwe igisubizo
Iyi nama yabaye hifashishijwe ikoranabuhanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza