IGIHE

Iby’ibiciro bikomeje gutumbagira, kongera ibyoherezwa mu mahanga, … Ikiganiro na Minisitiri Dr Ngabitsinze (Video)

0 2-08-2022 - saa 14:58, Akayezu Jean de Dieu

Ku wa 30 Nyakanga 2022, Perezida wa Repubulika yongereye imbaraga n’amaraso mashya mu bagize Guverinoma y’u Rwanda, Dr. Jean Chrysostome Ngabitsinze, ahabwa inshingano zo kuyobora Minisiteri y’Ubucuruzi n’Inganda, MINICOM.

Dr Ngabitsinze w’imyaka 45 ni impuguke mu bukungu bushingiye ku buhinzi dore ko amaze imyaka myinshi ari umwarimu wabyo muri Kaminuza zitandukanye zirimo iy’u Rwanda.

Urwego rw’Ubucuruzi n’Inganda yaragijwe rusanzwe rukorana bya hafi na Minisiteri y’Ubuhinzi n’Ubworozi yari amaze imyaka ibiri abereye Umunyamabanga wa Leta.

Ni umwanya yagiyeho avuye mu Nteko Ishinga Amategeko aho yari Umudepite uhagarariye Komisiyo Ishinzwe kugenzura Imikoreshereze y’Umutungo wa Leta, PAC.

Urwego rw’inganda n’ubucuruzi agiye kuyobora muri rusange nubwo rufatwa nk’inkingi ya mwamba mu kubaka ubukungu n’iterambere ry’igihugu, ruri mu zagizweho ingaruka zikomeye n’icyorezo cya Covid-19.

Ubwo Covid-19 yari imaze gutanga agahenge, intambara y’u Burusiya na Ukraine yahise itangira ndetse yo yatumye habaho izamuka rikabije ry’ibiciro byaba iby’ibikomoka kuri peteroli n’ibindi bicuruzwa muri rusange.

Dr Ngabitsinze yaganiriye na IGIHE agaruka ku byo abona bizafasha mu kubaka urwego rw’ubucuruzi n’inganda, kugira ngo rurusheho kuba umusemburo w’iterambere ry’igihugu no kuziba ibyuho byose byazanywe n’icyorezo cya Covid-19 ndetse n’intambara y’u Burusiya na Ukraine.

IGIHE: Uhawe kuyobora Minicom mu gihe wari umaze imyaka ibiri muri Guverinoma, inshingano zawe zari zimeze gute?

Minisitiri Dr Ngabitsinze: N’ubundi Nyakubahwa Perezida wa Repubulika yari yampaye aka kazi tariki 9 Werurwe 2020, ni akazi hashize icyumweru hatangira Covid-19, gatangirana na Guma mu Rugo, imihangayiko myinshi y’Abanyarwanda, gatangirana n’Isi yari ifite ibibazo. Nka minisiteri rero twari dufite inshingano zo kugira ngo abantu batagira icyo babura kuko bari bari mu rugo.

Nagize amahirwe rero nsanga minisiteri ngiyemo na bo barakoze cyane dufatanya mu gufasha Abanyarwanda kubona ibibatunga, twongeraho no guhinga cyane ndetse n’umusaruro ariko haza ibibazo na none byo kubura amasoko.

Twari dufite umusaruro mwinshi cyane kandi amasoko hirya no hino hafunze. Twararaga twicaye duhuza abaguzi n’abagura, hari n’aho byagiye bigorana kuko imipaka yari ifunze.

Rero ni akazi katangiranye ibibazo byinshi ariko mpamya ko byatumye umuntu abona n’ibisubizo cyangwa se yumva ko n’inshingano ziba ziremereye.

Rero iyi myaka nk’uko byagiye bigenda haje kuzamo n’ibindi bibazo byugarije Isi, murabizi Covid-19 n’ubu iracyahari kandi akenshi na kenshi ubuhinzi nubwo duhingira kwigaburira, ibyinshi na byo bijya mu masoko yaba ayo mu gihugu imbere no hanze.

Kugumana iyi ntumbero kugira ngo ayo masoko akomeze aboneke mu bibazo bigoye cyane kari akazi kenshi, twafatanyije twese ariko nishimiye ko n’iyi minisiteri Perezida wa Repubulika yanjyanyemo twarakoranye cyane kandi nkanashimira n’izindi nzego za Guverinoma.

Navuga ko iyi myaka ibiri nizemo byinshi ariko igikomeye umuntu yigamo ni ukumenya ko mu kazi utari wenyine ugomba gukorana n’abandi kandi ukamenya ko inshingano wahawe zisumba wowe ubwawe n’abo mukorana rero mugatuma muziha agaciro.

Ubunararibonye uvanye muri Minagri buzagufasha gute kuzuza inshingano zawe muri Minicom?

Mu by’ukuri njyewe nize ubukungu ariko nkorera Impamyabushobozi y’Ikirenga mu bijyanye n’ubukungu n’ubucuruzi mu buhinzi. Bivuze ko hagati y’ubuhinzi na Minicom hari aho twahuriraga cyane.

Kubera ko Minisiteri y’Ubuhinzi n’Ubworozi ifite uruhare runini mu kujyana ibintu ku masoko, Minisiteri y’Ubucuruzi n’Inganda twakoranaga cyane, yewe nanabahe n’amakuru, hari itsinda rihuriweho, njye na Minisitiri nasimbuye [Béata Uwamaliza Habyarimana] twakoranaga inama kenshi.

Ikigiye gukurikiraho ni ugukomeza gusa nta gishyashya tugiye guhimba, tugiye gushyira imbaraga no kunoza ahaba hatameze neza ariko imikorere n’imikoranire ndetse n’ibyo nize birahura cyane n’ibyo nari ndimo hano n’ibyo ngiyemo hariya.

Ugiye kuyobora urwego rw’inganda n’ubucuruzi mu bihe Isi yugarijwe n’ibibazo byaruzahaje birimo Covid-19 n’intambara ya Ukraine n’u Burusiya

Njyewe iyo ndebye uko Isi ihagaze uyu munsi wa none, ibibazo tumazemo igihe muri Covid-19, intambara ya Ukraine n’u Burusiya, ubona ko Isi yugarijwe n’ibibazo.

Ibibazo rero iyo byugarije ubukungu no mu bucuruzi, bisaba ko abantu babona ibisubizo mu buryo bwihuse. Ibyo ni ukureba ingamba zatuma udahagarika gucuruza kandi udahagarika gushora imari.

Ibisubizo nta bindi ni ukureba uko twakomeza gushaka abo dukorana mu bucuruzi n’ishoramari kandi tukareba uburyo n’abo Banyarwanda ubwabo bagira ubwo bushobozi bwo gushora imari zihutisha ubucuruzi.

Izo rero ni ingamba zihutisha ubucuruzi, nta kindi wakora uvanyemo gushaka uburyo wabona aho wakura amafaranga hano cyangwa se hariya adahenze. Ni byo byiza kuko amafaranga muri rusange arahenda iyo hajemo ibibazo ariko twe nk’Abanyarwanda twagiye dushaka imishinga yafasha kwinjiza amafaranga. Tugomba kwinjiza amafaranga.

Minisitiri mushya w'Ubucuruzi n'Inganda, Dr Ngabitsinze Jean Chrysostome, yavuze ko kugira ngo u Rwanda ruzibe icyuho cy'ibyoherezwa mu mahanga n'ibitumizwayo hakenewe ko n'urubyiruko rubigiramo uruhare

Ibyo bibazo uvuzeho byateje izamuka ry’ibiciro kandi biragaragara ko nta cyizere cyo kuba byamanuka vuba, harakorwa iki?

Ni byo ibiciro birazamuka, bizamuka kubera ko Isi itagihahirana ku buryo bworoshye kandi abantu bashaka ibyo kurya no gukoresha bo ntibagabanuka bariyongera. Rero ikiba gishoboka ni ukureba uko muzamura umusaruro w’ibikorerwa imbere mu gihugu.

Kuko iyo umusaruro imbere mu gihugu uzamutse bituma ibiciro bigabanuka ubwabyo ariko iyo harimo kuvana ibintu hanze bitandukanye, ifaranga murabizi muri iyi minsi idorali ryarazamutse, ama-Euro yaraguye, twe dukoresha amafaranga, uko guhererekanya amafaranga rero bituma hari ibyo twe tutahindura kuko bituruka hanze.

Igikomeye ni ukwiteguramo imbere tukongera umusaruro w’ibyo dukora kandi tugakora ibishoboka tukabona inganda zishoboka iwacu mu gihugu kugira ngo tugabanye bya bindi byo kuvana ibintu hanze.

Kuko birazamura igiciro ku buryo bukomeye n’iyo habaye ibibazo, muba mwiteguye. Ikindi gikomeye cyane ni ugushaka uburyo tuzamura ibyo ducuruza hanze kuko bizana ya mafaranga twebwe aduhenda noneho akaza ari amadovize. Ikindi ni ugushyiraho ingamba za politiki z’uko tugomba gukora ibyacu kandi tukabikora neza.

Ibihe Isi irimo by’izamuka ry’ibikomoka kuri peteroli byo murabikoraho iki nka Minicom?

Iyo ibibazo byabaye haba hagomba kugira abantu bicara bagashaka ibisubizo, peteroli yarazamutse ariko muzi neza ko Leta hari icyo yongeramo kugira ngo yunganire wa Munyarwanda.

Uko ibiciro by’ibikomoka kuri peteroli bizamutse, Leta igira icyo yongeraho, uyu munsi byari bigoranye ko imodoka zijya mu muhanda cyangwa se ngo n’inganda zikore iyo Leta iba itagira nkunganire ishyiramo.

Akenshi kugira ngo ibihugu bikomere ni uko biba bifite ubwizigame buhagije. Ubwizigame bwacu rero Leta ibushyira muri ubwo buryo bwo kunganira igiciro cya peteroli, ni ibibazo byaturutse ahandi kandi twe ntabwo tugira peteroli ducukura.

Ibyakozwe na Leta rero ni ukunganira kugira ngo cya giciro cyazamutse, Umunyarwanda ushaka gukoresha lisansi cyangwa se inganda, bitaza kuzamura ibiciro cyane ku muturage. Iyo bitaza kuba byarakozwe, bya biciro twavugaga byazamutse ubu ngubu byagombaga kuba byaratumbagiye.

Politiki y’ibyanya byahariwe inganda mubona yafasha mu kongera ibikorerwa imbere mu gihugu ku kihe kigero?

Iyo ni politiki ubwayo yamaze kugira aho igera kuko inganda dufite inyinshi niho ziri, izikora ibintu bitandukanye, ibikomoka ku buhinzi n’ahandi, ibi bya serivisi niho biri, bivuze ko ari politiki nziza cyane icyo tugomba gukora ni ukureba uko twagira uko dukomeza kuyiteza imbere.

Ni yo mpamvu navuze ko ishoramari risaba ubufatanye, amafaranga, gukorana n’abandi neza. Biriya byanya bizakomeza bikorerwemo n’Abanyarwanda n’abanyamahanga bazifuza ko dufatanya guteza imbere ariko ni politiki nziza tugomba gushyigikira twese.

U Rwanda rukomeje kwinjira mu Miryango Mpuzamahanga n’uturere dutandukanye ariko iyo urebye ubona ibyoherezwa mu mahanga bikiri hasi, mubona hakorwa iki mu kuziba icyo cyuho?

Kugira ngo twongere ibyo twohereza hanze ni uko twongera umusaruro ukiyongera mu bwiza no mu bwinshi.

Kandi iyo urebye ubona bigenda bizamuka ntibiramanuka uvanyeho mu gihe cya Covid-19 kubera ko tutashoboye gucuruza. Ariko kugira ngo ujyane ibintu hanze ni uko umenya icyo hanze bashaka, ibyo basaba ukagikora bigendeye ku gihugu runaka cyangwa ku gace runaka bitewe n’ibyo bashaka cyane cyane ku bijyanye no kongera ubwiza.

Ukamenya niba ugomba kohereza imbuto Dubai uko zigomba kuba zimeze, niba ugomba kohereza urusenda mu Bushinwa [kandi ibyo turimo kubikora], mu gihugu imbere mu bwiza kugira ngo abo hanze babone ko ari byiza.

Icyo navuga mu by’ukuri nubwo dufite igihugu navuga ko ari igihugu gito ariko mu bitekerezo ni kinini, akenshi tuba tureba ngo dukore ibyiza cyane n’iyo byaba bike ariko bya bindi byiza twajyanye nk’ikawa, icyayi, aya mashati twambara, bibe mpuzamahanga.

Ni ibintu byiza twakomeza kunoza ibyo dukora kandi tukabikora neza kandi tugakangurira urubyiruko kugira ishoramari mu mitwe yarwo, rukagira imitekerereze yagutse kuko ni rwo ejo ruzazamura uko isura y’u Rwanda igaragara hanze cyane cyane mu byoherezwa mu mahanga.

Mu nshingano za Minicom harimo ibijyanye n’imikino y’amahirwe kandi ntivugwaho rumwe, wowe ubona ute imikorere yayo?

Imikino y’amahirwe iri mu cyo twita amahitamo ariko afite ibibazo, mu Kinyarwanda babyita amahitamo avuga ati ‘irabyara inyana nitabyara ikimasa’. Ni ukuvuga ngo amahirwe aba ari 50%.

Imikino y’amahirwe rero ushobora no kutagira amahirwe. Ni ukuvuga ngo ushobora gutakaza byose, icyo abantu bakora ni umukino uri ku Isi yose ukorwa n’abantu batandukanye mu byiciro byinshi.

Ahubwo turibaza, ese Abanyarwanda barateguwe bihagije ngo bumve ko umuntu akina uriya mukino hari aho yabanje kugera? Cyangwa ubona amafaranga wagombaga kugura ibyo kurya nimugoroba kugira ngo urebe ko wayakina akaguha menshi?

Kenshi na kenshi abantu bakina imikino y’amahirwe ni abantu baba bafite amafaranga nakwita ko yasagutse cyangwa avuga ati ’iyi nyungu nshobora kuyishora mu mikino y’amahirwe akunguka’.

Aha rero icyo twakora mu gihugu cyacu mpamya ko tugomba gukora cyane ni ukumvisha abantu ko umukino w’amahirwe, ni icyo umutima wawe wahisemo. Icyo twe nka Leta tugomba gukora ni ugushyiramo amategeko abigenga.

Ariko ntabwo ari ibintu uhubukira ngo n’umushahara wawe, utarishyurira abana ishuri ngo wumve ko ugomba kuwujyana hariya […] kuko burya ni ibintu biba bibaze, uwakoze uwo mukino hari ibyo aba ashaka.

Rero harimo imibare myinshi tugomba kwigisha Abanyarwanda, ntiwumve ko niba ushoye 1000 Frw ugomba kunguka 2000 Frw, uko ni ko bimeze ariko ni gahunda nziza na politiki iriho yo kubikurikirana. Mpamya ko n’impamvu hagiye hazamo ibibazo wenda na Leta ikagira icyo ikora, ubona ko abayifite bashobora kuba bakinisha abantu bataragira imyumvire ya nyayo kuri iyo mikino.

IGIHE: Hari icyo wakongeraho dusoza?

Icyo nakongeraho ni ugushimira Nyakubahwa Perezida wa Repubulika ku cyizere yangiriye kandi nkizeza abantu bose ko nta cyizere njyewe nzahabwa ngo ngipfushe ubusa cyangwa se ngo ngitere inyoni.

Ni na cyo nsaba Imana y’i Rwanda igihe nagiriwe icyizere izampe imbaraga zo gukomeza gukora igikwiye kandi na ba bandi bato nibabona umuntu bajye babona ari umuntu bakwigiraho.

Ikindi kimwe navuga, turi mu gihugu kirimo kwihuta kubera ubuyobozi bwiza, turi mu gihugu gishaka guhinduka kikaba igihugu cy’Isi. Nahamagarira Abanyarwanda bose kumva iyo ntumbero duhamagarirwa gukora na Perezida wa Repubulika, ni byiza ko iki gihugu cyacu kigomba kubaho imyaka na nyakaka.

Dr Ngabitsinze wari umaze imyaka ibiri ari Umunyamabanga wa Leta muri Minisiteri y'Ubuhinzi n'Ubworozi, yahawe kuyobora Minisiteri y'Ubucuruzi n'Inganda

Camera: Mucyo Jean Regis

Editing: Mugisha Lucien

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza