IGIHE

Ibyaranze urubanza rwa Bamporiki kugeza yinjiye i Mageragere

0 25-01-2023 - saa 07:21, Ntabareshya Jean de Dieu

Burya koko iminsi irasa ariko ntihwana. Ku wa 23 Mutarama 2022, Bamporiki Edouard yari kuri Televiziyo y’u Rwanda yigisha ubutwari nk’ibikorwa umuntu akora "bitari mu nyungu ze, atari ukuvuga ngo ibi ni ibyanjye n’abanjye.

Nyuma y’umwaka umwe wuzuye neza, ku wa 23 Mutarama 2023, Bamporiki yinjijwe muri gereza ya Mageragere, nyuma yo guhamwa n’ibyaha byo kwihesha ikintu cy’undi hakoreshejwe uburiganya no gukoresha ububasha ahabwa n’itegeko, mu nyungu ze bwite.

Bamporiki wari Umunyamabanga wa Leta muri Minisiteri y’Urubyiruko n’Umuco, yakatiwe n’Urukiko Rukuru igifungo cy’imyaka itanu n’ihazabu ya miliyoni 30 Frw.

Icyemezo cy’Urukiko Rwisumbuye rwa Nyarugenge yari yajuririye, cyanajuririwe n’Ubushijacyaha, cyari cyamuhamije biriya byaha kimuhanisha gufungwa imyaka ine, n’ihazabu ya miliyoni 60 Frw.

Impinduka mu birego

Dosiye ya Bamporiki yashyikirijwe Ubushinjacyaha ku wa 7 Nyakanga 2022, aregwa icyaha cyo gusaba, kwakira cyangwa gutanga indoke.

Ni amafaranga agera kuri miliyoni 10 Frw yahawe n’umushoramari Gatera Norbert ufite Uruganda rwitwa Norbert Business Group n’ubusitani buzwi nka Romantic Garden buherereye ku Gisozi, kugira ngo amuhuze n’ubuyobozi bw’Umujyi wa Kigali, ibikorwa bye bidafungwa.

Bitewe n‘uko ibikorwa yari kumufashamo bitari bihuye n’inshingano ze, byongeye mu iperereza bikagaragara ko Bamporiki ari we wamutanzeho amakuru ku buyobozi, yarangiza akamwizeza kumufasha, ibyaha byahinduye isura.

Yatangiye gukurikirawaho kwihesha ikintu cy’undi hakoreshejwe uburiganya no gukoresha mu nyungu ze bwite ububasha ahabwa n’itegeko.

Gufungirwa mu rugo

Ubwo Bamporiki yatangiraga gukurikiranwa, Urwego rw’Ubugenzacyaha, RIB, rwavuze ko ataza gushyirwa muri gereza, ahubwo “iperereza ku byaha akurikiranyweho rikomeje mu gihe afungiwe iwe mu rugo.”

Ni icyemezo cyavuzweho byinshi, bamwe bibaza impamvu atafunzwe nk’uko byakomeje kugenda ku bandi benshi bashinjwa ibyaha bya ruswa.

Icyakora, biteganywa n’itegeko ryerekeye imiburanishirize y’imanza z’inshinjabyaha ryo ku wa 19 Nzeri 2019, aho ingingo ya 67 ivuga ko "mu gihe cy’iperereza, n’iyo haba hari impamvu zikomeye zo gukeka ko umuntu yakoze icyaha cyangwa ko yagerageje kugikora, Umugenzacyaha cyangwa Umushinjacyaha bashobora kutamufunga bakamutegeka ibyo agomba kubahiriza".

Yemeye icyaha rugikubita, Perezida amusabira guhanwa

Nyuma yo guhagarikwa ku mirimo ye no gutangira gukorwaho iperereza, yatangiye kubona ko amazi atakiri ya yandi.

Yigiriye inama yo kwifashisha imbuga nkoranyambanga nka Twitter asaba imbabazi Umukuru w’Igihugu, inshuti n’abamukurikira, kuri urwo rubuga ko yakoze icyaha cyo kwakira indonke.

Abantu banyuranye batanze ibitekerezo kuri iyo ngingo, bamwe bakavuga ko akwiye guhanwa abandi bakamusabira imbabazi.

Perezida Paul Kagame na we yamusubije binyuze kuri urwo rukuta rwa Twitter, aho yabwiraga uwitwa Yumva wasabiye Bamporiki imbabazi ko ibyo avuga byumvikana.

Ati “Ibyo uvuga wowe bifite ishingiro. Kutongera gukora ibisa nk’ibyo yakoze bibi. Bitari uguhora mu bibi ugahora usaba kubabarirwa! Ibya Bamporiki niko bimeze. Hari n’abandi bameze gutyo. Umuntu wese yakora icyaha ariko no kukirinda birashoboka. Guhanwa nabyo birafasha !!!”

Inzira z’ubutabera zarakomeje Bamporiki, agezwa imbere y’Urukiko Rwisumbuye rwa Nyarugenge ngo rumuburanishe ku rwego rwa mbere.

Yagejejwe mu rukiko akurikiranyweho icyaha cyo kwakira indonke ndetse ubwe yari yaranabyiyemereye ariko urukiko rwisumbuye rwa Nyarugenge ruza kumuhamya ibyaha bibiri birimo kwihesha ikintu cy’undi hakoreshejwe uburiganya no gukoresha mu nyungu ze bwite ububasha ahabwa n’itegeko.

Rwamuhanishije gufungwa imyaka ine no gutanga ihazabu ya miliyoni 60 Frw nubwo ubushinjacyaha bwamusabiraga imyaka 20 n’ihazabu ya miliyoni 200 Frw, bituma impande zombi zijurira.

Urukiko Rukuru rwabunanishije urubanza mu bujurire rwongereye ibihano byari byahawe Bamporiki nyuma yo kumuhamya ibyaha byo gukoresha ububasha ahabwa n’itegeko mu nyungu ze bwite.

Urukiko rugaragaza ko bitewe no kuba mu rubanza Bamporiki yaragiye yemera ibyaha ndetse akanabisabira imbabazi habonekamo impamvu nyoroshyacyaha ishobora no gutuma ahanishwa igihano gito munsi y’igiteganywa n’amategeko.

Ibyo byatumye ahanishwa igifungo cy’imyaka itanu n’ihazabu na miliyoni 30 Frw.

Igereranya rya 10.000.000 Frw y’umukire na 1000 Frw y’umukene

Bamporiki yatangiye gukurikiranwa nyuma y’umwaka atanze ubuhamya bw’uko yageze i Kigali afite ibiceri 300 Frw, ariko yabashije gutera imbere, agera ku butuzi bufite agaciro ka miliyari y’amafaranga.

Ati "Noneho ugiye gushaka umuntu yahemukiye, yagambaniye, yibye ngo abigereho, byakubera ubushakashatsi watakazamo amafaranga gusa ariko ntabyo wabona."

Nyuma y’amezi icumi, byamenyekanye ko yakiriye indonke.

Ubwo Bamporiki yaburanaga mu rukiko, yagaragaje ko amafaranga miliyoni 10 yahawe ngo afunguze umugore wa Gatera, yari agashimwe.

Yavuze ko asasiye ko yakiriye impano irengeje iyo itegeko rimwemerera (100.000 Frw) bikamubera "ikosa", ati iyo "njye na Norbert tuza kuba dutuye i Nyamasheke, nkagirira umumaro Norbert mu kibazo afite, nkamuba hafi mu buzima bw’i Nyamasheke, byarangira nkaba mfite ingorane z’amafaranga 1000 Frw akayampa, ntabwo tuba turi mu rukiko."

"Ariko kuko yangiriye umumaro ku rwego rw’ubuzima turiho, urwego rw’amafaranga dutunze, amafaraga 1000 Frw y’umuturage w’i Nyamasheke angana na miliyoni 10 Frw z’umuturage w’i Kigali, ibyo byitwa gutanga impano."

Ku bwe, ngo ubunini bw’icyo yamuhaye nibwo bwateye abantu kwibaza uburyo ahabwa impano itazishyurwa ya miliyoni 10 Frw.

Yakomeje abwira umucamaza ati "Nyakubahwa Perezida, ibi bitu abantu bakwiye kubyumvira mu kuvuga ngo ese ‘Bamporiki iyo ahuye na Norbert baywa mukaru?’ Wajya kureba ugasanga banywa Champagne. Rero twe gufata ibintu by’abantu banywa mukaru bahana 1000 Frw, ngo tuyigire ingorane mu gihe abantu bahana miliyoni 10 Frw bananyweye champagne."

"Nasabye imbabazi, ndagumya no gusaba imbabazi kuko narengeje ayo nagombaga kuba nakwemera. Ariko we ntabwo byamuvunye, ni nayo mpamvu atabiburana, atabigira n’ikibazo."

Inzira imwe rukumbi asigaranye

Kuri ubu yamaze kugezwa muri Gereza ya Mageragere aho agomba kurangiriza igihano yakatiwe n’urukiko.

Itegeko rigena ububasha bw’inkiko riteganya ko umuntu waburanishijwe n’urukiko rukuru ashobora kujurira ku rwego rwa kabiri mu rukiko rw’ubujurire iyo urubanza rushobora kugira ingaruka ku mutekano w’igihugu no kuba rwatanzwemo ibihano bidateganyijwe n’amategeko.

Hari kandi kuba urukiko rwashingiye ku itegeko ritariho, ingingo z’amategeko zitakiriho cyangwa zaciwe n’urukiko rutabifitiye ububasha n’izindi zinyuranye ndetse no kuba nibura hatanzwemo igihano kingana n’imyaka 15.

Icyakora urukiko rw’ubujurire ntirwakira urubanza rw’abaregwa baburanye bemera icyaha cyangwa batsinzwe imanza mu nzego zombi.

Ibi nibyo bituma Bamporiki atemerewe kujurira bivuze ko icyashoboka kuri we ari ugusaba gusubirashamo urubanza ku mpamvu z’akarengane nabyo byakorwa ari muri gereza.

Bitabaye ibyo, azakomeza kurangiza igihano cyangwa agatekereza gusaba imbabazi Perezida wa Repubulika, nyuma yo gukora kimwe cya kabiri cy’igihano yakatiwe kuko ari bwo yemerewe n’itegeko kuzisaba binyuze mu nyandiko.

Bamporiki Edouard yavukiye mu yahoze ari Cyangungu kuri ubu ni mu Karere ka Nyamasheke. Yageze mu Mujyi wa Kigali mu 2000, atagira akora imirimo iciriritse, ndetse avuga ko yacukuye imisarane, anakora akazi ko mu rugo.

Ni umwe mu bantu bazi kwirwanaho cyane, ku buryo yuma yaje kuba intyoza mu mivugo, ajya mu makinamico nk’Urunana, aba Umudepite, ayobora Itorero ry’Igihugu, aza kuba Umunyamabanga wa Leta.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza