IGIHE

Ibiganiro ku gushyira inzibutso za Jenoside yakorewe Abatutsi mu murage w’isi bigiye gusubukurwa

0 27-11-2022 - saa 12:52, IGIHE

Guverinoma y’u Rwanda n’Ishami rya Loni rishinzwe Uburezi, Ubumenyi n’Umuco (UNESCO) bigiye gusubukura ibiganiro bigamije gushyira zimwe mu nzibutso za Jenoside yakorewe Abatutsi mu murage w’Isi.

Muri Nzeri 2018 nibwo u Rwanda rwatanze dosiye isabira inzibutso enye gushyirwa mu murage w’Isi. Izo nzibutso zirimo urwa Kigali ruri ku Gisozi mu Mujyi wa Kigali, urwa Nyamata mu Bugesera, Murambi muri Nyamagabe ndetse na Bisesero muri Karongi.

Ibiganiro ngo izo nzibutso zemezwe burundu zagiye zizamo ibibazo birimo icyorezo cya Covid-19 cyashegeshe Isi guhera mu mwaka wa 2020.

Minisitiri w’Ubumwe bw’Abanyarwanda n’Uburere Mboneragihugu, Dr Jean Damascene Bizimana, yavuze ko ibiganiro bizasubukurwa bitarenze uyu mwaka.

Dr Bizimana yabwiye The New Times ko ibyo biganiro byitezwe ko bizasubukurirwa mu nama ya UNESCO iteganyijwe kubera i Kigali mu minsi ya vuba.

Kugira ngo inzibutso za Jenoside yakorewe Abatutsi mu murage w’Isi bizafasha ko amateka yazo ashyirwa mu mfashanyigisho UNESCO itanga ku isi yose, binafashe mu guhangana n’abahakana n’abapfobya Jenoside yakorewe Abatutsi.

Mu mpera za 2018 ubwo u Rwanda rwari rumaze gutanga dosiye yandikisha inzibutso za Jenoside mu murage w’Isi, rwatangaje ko hari bamwe mu bakozi ba UNESCO bagiye bagaragaza ko batumva impamvu inzibutso za Jenoside yakorewe Abatutsi zashyirwa mu murage w’Isi.

Ngo abo bakozi bitwazaga ko hari izindi nzibutso za Jenoside ziri mu murage w’Isi nk’urwa Auschwitz ruba muri Pologne na Hiroshima mu Buyapani.

Icyakora, u Rwanda rwo rugaragaza ko Jenoside yakorewe Abatutsi ifite umwihariko mu zabaye mu mateka zirimo ubugome yakoranywe, uko yateguwe no kuba yarakozwe n’igice kimwe cy’abaturage bayikorera bagenzi babo.

Hari kandi umwihariko w’uburyo u Rwanda rwakoresheje ngo rutange ubutabera ku bakorewe Jenoside n’ababikoze, harimo inkiko Gacaca zafashije kwihutisha imanza zashoboraga kumara imyaka magana iyo zicibwa mu buryo busanzwe.

Kugeza ubu UNESCO imaze kwandika ahantu hasaga igihumbi mu murage w’Isi ariko ibihugu byo mu Burayi na Amerika y’Amajyaruguru ni byo byiganjemo kuko bifite uruhare rwa 47 %, mu gihe Afurika ifitemo 8 %.

Urwibutso rwa Jenoside rwa Bisesero ni rumwe mu zo u Rwanda rwasabiye kujya mu murage w'Isi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza