IGIHE

CHOGM: Guverinoma igiye gutangaza gahunda y’uko ubuzima buzaba bwifashe i Kigali

0 20-05-2022 - saa 08:16, IGIHE

Minisitiri w’Intebe Dr Edouard Ngirente yatangaje ko mu minsi itarenze 15 abaturarwanda bazamenya gahunda ubuzima bwo mu mujyi buzagenderaho, mu gihe cy’inama y’abakuru b’ibihugu na za Guverinoma bigize Commonwealth, CHOGM.

Ni inama iteganyijwe mu cyumweru cyo kuva ku wa 20 Kamena, ikazitabirwa n’abashyitsi basaga 5000 bazaturuka mu mahanga.

Ni abashyitsi barimo intumwa z’ibihugu 54 bigize uyu muryango, urubyiruko, abacuruzi, abagore n’abandi.

Ubwo yaganiraga n’abanyamakuru ku wa Gatatu, Minisitiri w’Intebe, Dr Ngirente yavuze ko gahunda abantu bazakurikiza izatangazwa vuba, mu kurinda ko ibikorwa byinshi byagongana.

Byitezwe ko imihanda myinshi ishobora kuzafungwa cyangwa igahindurirwa ibyerekezo, ubwo abayobozi bazaba bajya cyangwa bava kuri hoteli zabo cyangwa ahabera inama.

Yagize ati "Muri CHOGM tuzerekana imihanda abantu banyuramo kugira ngo abashyitsi, intumwa z’ibihugu, babone aho banyura natwe abaturage tubone aho tunyura tutagonganye, hazajya haba porogaramu yerekana uko amashuri aziga, uko abajya ku kazi ka leta bazakora."

"Ibyo bintu byose tuzabibatangariza mu minsi itarenze 15, tuzababwira uko ibintu bizakora. Tuzababwira ngo mu gihe cya CHOGM muri iyi minsi ingana uku, abakozi ba leta bazitwara uku, abanyeshuri bizagenda uku, imihanda ku ikarita ni iyi, byose tuzabibatangariza."

Umunyamabanga wa Leta muri Minisiteri y’Ibikorwaremezo, Eng. Uwase Patricie, aheruka kuvuga ko mu kwitegura iyo nama, Guverioma yashyize imbaraga mu kwagura imihanda isanzwe no guhanga imishya.

Ati "Hafi ya yose yaruzuye - imihanda umunani ari byo bilometero 12 birenga, hari n’indi mihanda icyenda minini [irimo kubakwa], navuze umwe wa Sonatubes-Gahanga ubu ugeze kuri 96% yo kuzura, hari n’indi mihanda uwo mu Itunda (Kanombe) ugeze kuri 70% kurenga, yose izaba yuzuye mbere ya CHOGM." Yari kuri Televiziyo Rwanda.

Bijyanye n’uburyo indege nyinshi zizaba zururukira i Kanombe, bamwe mu bazagira ikibazo cy’imihanda ni nk’abatuye mu bice bya Masaka, Kabuga, Gasogi n’ahandi hagana Iburasirazuba.

Eng. Uwase yavuze ko hari nk’umuhanda wa Nyarutarama na Contrôle Technique ukagera ku Kimironko n’indi iyunganira, ishobora kuzifashishwa n’abantu bajya mu mujyi rwagati cyangwa Nyabugogo.

Mu bice bya Kabeza, Rubirizi n’ahandi, hari umuhanda uca mu Itunda uhura n’uva i Kanombe, ushobora kwifashishwa.

Eng Uwase ati "Uzuzura, ugeze hafi 70%, ni ibintu byihuta ku buryo tuzawukora tukawurangiza."

"Ariko hari n’umuhanda na wo ukwiye gukoreshwa cyane uca mu bice bya Kabeza uvuye ahahoze Alpha Palace hotel, hari n’undi uturuka muri Niboye, mu by’ukuri iyo mihanda ikoreshejwe neza yatugeza aho tugiye."

Eng. Uwase yavuze ko mbere ya CHOGM iyo mihanda izamenyekanishwa, ikarushaho kwifashishwa, cyane ko mu bayikenera harimo abajya gutanga serivisi nko kwakira abashyitsi.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza