IGIHE

Bugesera: Ababyeyi bibukijwe ko kutita ku mirire y’umwana ari uguhombya igihugu

0 21-11-2020 - saa 19:55, IGIHE

Ababyeyi bo mu Karere ka Bugesera bakanguriwe gushyira imbere imirire y’abana babo, kuko kutabikora gutyo bituma bagwingira cyangwa bagakura nabi bikaba igihombo ku gihugu mu gihe kizaza.

Byatangajwe kuri uyu wa Gatanu ubwo mu Kigo Gasore Serge Foundation hasozwaga icyiciro cya gatatu cy’itsinda ry’ababyeyi bafite abana bari bamaze umwaka bitabwaho, nyuma yo kugaragaza imirire mibi.

Ubushakashatsi ku Buzima bw’Abaturage (DHS) bwakozwe n’Ikigo cy’Igihugu cy’Ibarurishamibare mu 2015, bwagaragaje ko mu Rwanda abana bari munsi y’imyaka itanu bagwingiye bangana na 38 %. Bugesera ni kamwe mu turere twagaragayemo icyo kibazo aho abana bagwingiye mu 2015 bari kuri 39, 4%.

Byatumye ku bufatanye bw’ako karere, Ikigo Gasore Serge Foundation, Ibitaro bya Nyamata, Ikigo Nderabuzima cya Ntarama, Urwego rw’Igihugu rw’Imiyoborere n’Ishami ry’Umuryango w’Abibumbye ryita ku Iterambere (UNDP) batangiza gahunda bise “Kuraneza Fighting against Malnutrition’ igamije kwita ku bana bagaragaza ibibazo by’imirire mibi.

Icyiciro cya gatatu cy’ababyeyi bafite abana bitaweho muri iyi gahunda cyasoje amasomo kuri uyu wa Gatanu. Ni nyuma y’igihe abana babo bahabwa indyo yuzuye kugira ngo basubire mu mirire myiza naho ababyeyi babo bakigishwa gutegurira abana indyo yuzuye n’ibindi bikorwa byabateza imbere.

Uwobasa Florentine, umwe mu babyeyi bari bafite abana bitabwaho, yashimye amahugurwa bahawe n’uburyo abana babo bitaweho kandi ubuzima bwabo bwari bugeze habi.

Yagize ati “Kuraneza uretse kudutabarira ubuzima bw’abana bari bagiye kudupfana, yanadufashije kwiga ibindi bikorwa by’iterambere nko guhinga, korora neza no kurera neza, byose bigamije guteza imbere ubukungu bwacu n’imiberehio myiza. Batwigishije uko umwana afata indyo nziza akabifatanya n’imiti, ubu abana abacu bameze neza.”

Ntakirutimana Elizaphan na we ni undi mubyeyi ufite umwana witaweho. Yagaragaje uburyo ubujiji bushobora gutuma umwana arya nabi, yihereyeho kuko umwana we yagize imirire mibi kandi atabuze ibyo kumuha.

Ati “Byari ibihe bikomeye kuri njye n’umuryango wanjye kuko ibyo kugaburira abana byari bihari. Nyuma yo gutangiza umwana wanjye muri iyi gahunda, yatangiye guhabwa ifunguro ryiza n’ibindi byangombwa nkenerwa birimo imiti. Bampaye ubumenyi butandukanye bwo kurera umwana, batwigisha kuboneza urubyaro, indwara zitandura none baduhurije muri koperative yo kubitsa yitwa Hingaweze.”

Nkurikiye André ushinzwe Ubugenzuzi muri RGB, yashimye iyo gahunda yo kwita ku bana bafite imirire mibi no kwigisha ababyeyi babo, asaba ko byakomeza.

Yagize ati “Twishimiye umusanzu wa gahunda ya Kuraneza, ku bw’umuhate mu gukemura ibibazo by’imirire mibi mu bana. Tuzakomeza kubafasha mu buryo bwose bushoboka, tubashimiye ubufatanye kandi tubasaba gukomereza aho.”

Meya w’Akarere ka Bugesera, Mutabazi Richard, yasabye ababyeyi gushyira imbere uburere n’imikurire by’abana babo, kuko umwana wakuze nabi bigira ingaruka kuri ejo heza he n’igihugu kikabihomberamo.

Umuyobozi w’Umuryango Gasore Serge Foundation, Gasore Serge, yashimiye abagenerwabikorwa bamaze igihe bahugurwa no kuba beremeye ko abana babo bafashwa kuva mu mirire mibi. Yavuze ko bazakomeza ubufatanye muri gahunda zigamije iterambere.

Ku rwego mpuzamahanga, umwana afatwa nk’uwagwingiye iyo avutse afite uburebure bwo munsi ya santimetero 46.1. Iyo afite munsi ya cm 44.2 aba yaragwingiye bikabije.

Umwana w’umuhungu w’amezi atanu afatwa nk’uwagwingiye bidakabije iyo afite munsi ya cm 61.7 kugeza cm 59.6.Iyo ifite munsi ya cm 59.6 aba yaragwingiye bikabije.

Ingaruka za vuba ziba ku mwana wagwingiye harimo ibyago byo kurwaragurika cyane, bikamushyira mu bana bafite ibyago byo gupfa ugereranyije n’abana batagwingiye.

Umwana wagwingiye kandi iyo atitaweho akiri muto bimugiraho ingaruka mu mitsindire ye mu ishuri kuko byangiza imikorere y’ubwonko.

Nkurikiye yashimye uburyo ababyeyi bigishwa kwita ku mirire y'abana babo, asaba ko byakomeza bikagera kuri benshi
Meya Mutabazi yavuze ko kutita ku mirire y'umwana ari uguhemukira ejo hazaza he
Abamaze igihe bigishwa kwita ku mirire y'abana no kwiteza imbere bahawe impamyabushobozi
Ababyeyi bibukijwe ko kutita ku mirire y’umwana ari uguhombya igihugu
Nyuma yo gusoza amahugurwa, ababyeyi bahawe ihene zo kubafasha kwiteza imbere no gukomeza kwita ku bana babo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza