IGIHE

Bizezwa akazi keza n’ibitangaza: Ubuhamya ku icuruzwa ry’abantu ‘rigezweho’

0 22-11-2022 - saa 21:52, Akayezu Jean de Dieu

Mu 2014, Keza (izina ryahinduwe), umukobwa wo muri kamwe mu turere tw’u Rwanda, yari arangije amashuri yisumbuye, inzozi zari zose nk’umwana w’umukobwa wumvaga agiye ku isoko ry’umurimo.

Izo nzozi ntabwo yazikabije kuko akazi yumvaga agiye guhita abona byamusabye kwicara hafi umwaka wose akigategereje ariko agenda abaririza haba muri bagenzi be no mu matangazo y’akazi atambuka mu bitangazamakuru.

Mu 2015, nibwo yaje kuganira n’umugabo yari asanzwe azi amubwira ko nubwo yarangije amashuri nta kazi afite. Undi yahise amwizeza igisubizo cy’icyo kibazo mu buryo bwihuse.

Wa mugabo yaje kumubwira ko hari ahantu agiye kujya kumurangira akazi mu gihugu gituranye n’u Rwanda. Kari akazi gashyushye kuri Keza!

Keza wari ugiye kumara umwaka iwabo yahise yumva agiye gukabya inzozi zo kubona akazi ndetse kari keza kuri we nk’uko yabibwiye IGIHE mu kiganiro yagiranye na we kuri uyu wa 22 Ugushyingo 2022, ubwo yari mu Mujyi wa Kigali.

Umugabo wari ujyanye Keza muri icyo gihugu yari yamubwiye ko azajya amuhemba ibihumbi 80 Frw. Kuri Keza yari menshi dore ko yari kujya ayahembwa umukoresha we yamuhaye aho kuba, ibyo kurya yewe ngo yanakenera kugaruka mu Rwanda gusura umuryango we agahabwa ibyangombwa birimo tike imuzana n’imusubizayo.

Ubwo yaje kwemeranya n’uwo mugabo ndetse aza gusanga ako kazi atagiye kugakora wenyine ahubwo hari abandi bagenzi be babiri bagombaga kujyana muri icyo gihugu. Bari babwiwe ko ari ugucuruza mu iduka rigezweho ry’ibiribwa n’ibinyobwa by’ako kanya (Alimentation).

Ku rundi ruhande ariko, ngo kugira ngo bagere muri icyo gihugu basabwe kuzanyura inzira zinyuranije n’amategeko nk’uko uyu mukobwa yabisobanuye.

Ati “Twavuye iwacu, njyewe mbabwiye ko ngiye mu kazi. Ubwo twaragiye tunyura mu nzira zitemewe, tugerayo, batwakirira mu rugo, baduha aho kuryama heza […] aratubwira ngo nimuruhuke, tugira ngo ni umuntu mwiza.”

Keza na bagenzi be baje kumenya ko bacurujwe

Abari bavuye mu Rwanda bagiye gukora muri ‘Alimentation’ bisanze bagomba gukora mu kabari. Icyo gihe bari bamaze kwamburwa telefone zabo, nta bundi buryo bari bafite bwo guhamagara umuntu uwo ari we wese ngo bamumenyeshe ibyabaye.

Keza ati “Turagenda dusanga ni akabari […] niho urugamba rwatangiye, twacuruje, niho yaduhuzaga n’abagabo batandukanye kandi akabidutegeka ku ngufu abagabo bakaba aribo bamuhemba, bakadusambanya. Rwari urugamba rukomeye, byari amarira gusa.’’

Bamaze igihe muri ubwo buzima, aho babaga bashinzwe guhereza ibyo kunywa abakiliya b’ako kabari ariko umugabo yaba ajemo yifuza uwo yishimishirizaho mu buryo bw’imibonano mpuzabitsina yahitaga avugana na nyir’akabari.

Nyir’akabari na we yategekaga uwo mukobwa umwe muri abo, akagenda akaryamana n’uwo mugabo, ku ngufu. Byararangiraga nyir’akabari akishyurwa.

Ni ibintu byabaga biteye agahinda kuko Keza cyangwa abo bagenzi be, nta mahitamo cyangwa kuba yaganira n’uwo mugabo bagiye kuryamana kugira ngo bagene imigendekere y’icyo gikorwa.

Nyuma y’igihe, umwe muri abo bakobwa batatu yaje kubona telefone ahamagara umuvandimwe we wari mu Rwanda nawe ahita atanga ikirego kuri Polisi y’Igihugu, irabikurikirana, Keza na bagenzi be baza gufashwa gutoroka aho hantu bagera mu Rwanda.

Icuruzwa ry’abantu; ikibazo gihangayikishije u Rwanda

Icuruzwa ry’abantu ni icyorezo kibangamiye uburenganzira bw’ibanze bwa muntu, cyibasiye ingeri zose z’abantu baba abagore, abagabo n’abana.

Iki cyaha kimaze kumenyekana nka bimwe mu birimo gukaza umurego ku Isi, kikaba kigira ingaruka zikomeye ku kiremwa muntu ndetse kikanadindiza ubukungu bw’ibihugu ndetse n’umutekano.

Ku rwego rw’Isi, icuruzwa ry’abantu ni irya gatatu mu bucuruzi butemewe bwinjiriza akayabo ababukora kuko imibare igaragaza ko ku mwaka arenga miliyari $150.

Ibi ni byo bituma kurwanya icuruzwa ry’abantu ari urugamba rukomeye kandi abagirwaho ingaruka cyane ni abo ku Mugabane wa Afurika.

Kuva ku wa 21 Ugushyingo 2022, i Kigali hateraniye inama yiga ku icuruzwa ry’abantu, ingamba zo kurwanya iki cyorezo hashingiwe ku buhamya bw’abacurujwe n’ibindi.

Ni inama yateguwe ku bufatanye n’Ihuriro ry’Imiryango itanga ubufasha mu by’amategeko (Legal Aid Forum Rwanda) n’Ihuriro Mpuzamahanga rishinzwe kurwanya icuruzwa ry’abantu, Freedom From Slavery Forum.

Umunyamategeko muri Legal Aid Forum, Ibambe Jean Paul yavuze ko icuruzwa ry’abantu rikorwa mu mayeri menshi cyane ku buryo bigoye kurirwanya.

Ati “Uyu munsi nta soko wabona nk’uko kera twari tuziko habaho isoko ry’abacakara, ubu nta soko rihari. Ariko uyu munsi tujya twumva abantu bavuga ko bagiye gukora mu bihugu byo muri Aziya, i Burayi cyangwa ahandi.”

“Bakakubwira bati ‘twababoneye akazi, uzajya uhembwa tuvuge 5000$, wagerayo ugasanga ugiye gukora mu rugo, bagiye kugucuruza ukore uburaya, hari abo bajyana bakajya gucuruza ingingo zabo.’”

Umunyamabanga Uhoraho muri Minisiteri y’Ubutabera, Mbonera Théophile, yavuze ko ku ruhande rw’u Rwanda n’ubwo ikibazo cy’icuruzwa ry’abantu kitarafata indi ntera ariko hagomba gushyirwaho ingamba zo kugikumira.

Ati ‘‘Iki kibazo cy’icuruzwa ry’abantu twavuga ko ari ikibazo kiriho kimaze igihe ariko uburyo gikorwamo bugenda bugira isura ihishe ku buryo udashobora gupfa kuvuga ngo gikorwa gutya. Ubuhamya bw’abacurujwe bagenda bagaragaza ibyababayeho butuma dutangira kubona neza ko iki kibazo gihari kandi ari icyo guhagurukirwa.’’

Itegeko risobanura icuruzwa ry’abantu nk’igikorwa cyose gikozwe n’umuntu hagamijwe gushaka inyungu, uha cyangwa ushakira undi akazi, utwara, wimura, uhisha cyangwa wakira undi muntu, hakoreshejwe ibikangisho, imbaraga cyangwa ubundi buryo bwose bw’agahato.

Rivuga kandi ko bishobora kuba ishimuta, uburiganya, ubushukanyi, kumubonerana kubera ububasha umufiteho cyangwa kubera ko ari umunyantege nke, gutanga cyangwa kwakira ubwishyu cyangwa inyungu kugira ngo umuntu ufite ububasha ku wundi muntu yemere.

Imibare iheruka igaragaza ko kuva mu 2018, Abanyarwanda 34 bacurujwe mu mahanga baragaruwe ku bufatanye n’izindi nzego.

Mbonera avuga ko Guverinoma y’u Rwanda ikomeje gushyiraho ingamba zo guhangana n’iki kibazo zirimo gushyiraho amategeko ahana iki cyaha, gukumira no gusubiza mu buzima busanzwe abahuye nacyo.

Inama yiga ku icuruzwa ry'abantu muri Afurika yitabiriwe n'abaturutse hirya no hino
Umunyamabanga Uhoraho muri Minisiteri y’Ubutabera, Mbonera Théophile yasabye abakorerwa icuruzwa kujya batanga ubuhamya kuko aribwo bufasha mu guhashya iki kibazo
Me Ibambe Jean Paul avuga ko icuruzwa ry'abantu ari kimwe mu bihangayikishije Isi

Amafoto: Munyakuri Prince

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza