IGIHE

BAD yemeje miliyari 8.4 Frw zizashorwa mu rugomero rwa Rusizi IV ruzatanga MW 287

0 13-01-2020 - saa 13:48, Rabbi Malo Umucunguzi

Inama y’Ubutegetsi ya Banki Nyafurika Itsura Amajyambere (BAD), yemeje impano ya miliyoni €8, ni ukuvuga asaga miliyari 8.4 Frw zizashorwa mu bufasha bwa tekiniki mu kubaka uruganda rw’amashanyarazi rwa Rusizi IV, ruzatanga megawatt 287.

Uru rugomero ruzubakwa ku mugezi wa Rusizi uri hagati y’u Rwanda, Repubulika ya Demokarasi ya Congo n’u Burundi, rukazatuma miliyoni z’ingo zo muri ibi bihugu zigerwaho n’amashanyarazi, kimwe n’inganda nto n’iziciriritse.

Iyi nkunga yaturutse mu Kigega cy’Umuryango w’Ubumwe bw’ibihugu by’u Burayi kigenewe ishoramari muri Afurika, (EU-AIP).

Byitezwe ko niyuzura, Rusizi IV izatanga megawatt 287 z’amashanyarazi ndetse uyu mugezi ubashe kubyazwa amashanyarazi uko bikwiye.

Kugeza magingo aya ingomero ebyiri zimaze kubakwa kuri uyu mugezi zirimo Ruzizi I itanga megawatt 29.8 na Rusizi II itanga megawatt 43.8; mu gihe Rusizi III biteganyijwe ko izatanga megawatt 147 irimo kubakwa ku nkunga y’iyi banki.

Biteganyijwe ko gukwirakwiza amashanyarazi muri ibi bihugu bitatu bizateza imbere abaturage, binazamure imitangire ya serivisi z’ibanze zirimo ubuvuzi, uburezi ndetse binateze imbere umutekano.

Umuyobozi Ushinzwe Iterambere ry’Imishinga y’amashanyarazi, Batchi Baldeh yagize ati “Banki Nyafurika Itsura Amajyambere yagize uruhare runini mu gutunganya no gutera inkunga umushinga wa Rusizi III, ndetse amasomo yizwe muri uyu mushinga azakoreshwa mu gutegura no gushyira mu bikorwa Rusizi IV.”

“Ikoreshwa ry’ingufu zisazura kandi zidahenze rizafasha mu kugabanya ubukene, ubushomeri, imyuka yoherezwa mu kirere n’iyangirika ry’amashyamba, ndetse byongere umutekano mu Karere k’Ibiyaga Bigari.”

Iyi mpano ya miliyoni €8 yemejwe ikurikira iya $980,000 yemejwe mu mpera z’umwaka wa 2018 n’Ikigega gifasha mu gutegura imishinga y’ibikorwaremezo, New Partnership for Africa Development’s Infrastructure Project Preparation Facility (NEPAD-IPPF), kibarizwa muri Banki Nyafurika Itsura Amajyambere.

Rusizi Hydro power Plant Project IV ijyanye n’intego ibihugu biyihuriraho by’u Rwanda, u Burundi na RDC bifite, yo guhuza imbaraga mu bikorwa remezo byo gutunganya ingufu z’amashanyarazi, kuzitwara no kuzikwirakwiza.

U Rwanda rufite intego ko mu mwaka wa 2024 ruzaba rumaze kugeza amashanyarazi ku baturage bose, bavuye kuri hafi 60 % muri uyu mwaka.

Umugezi wa Rusizi ukomeje kubyazwa ingufu z'amashanyarazi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza