IGIHE

Abanyarwanda icyenda bajyanye Uganda mu nkiko basaba indishyi no gusubizwa imitungo yabo

5 13-08-2019 - saa 16:09, Ishimwe Israel

Abanyarwanda icyenda bari mu bandi benshi bafungiwe muri Uganda ndetse bagakorerwa iyicarubozo rikomeye, bajyanye Leta ya Uganda mu nkiko bayisaba indishyi ndetse no gusubizwa imitungo basize muri icyo gihugu ubwo boherezwaga mu Rwanda.

Kuri uyu wa Kabiri, tariki ya 13 Kanama 2019 nibwo aba Banyarwanda bashyikirije ikirego cyabo Urukiko rw’Umuryango wa Afurika y’Iburasirazuba, ku rugereko rwarwo ruri i Kigali.

Iki kirego cyatanzwe nyuma y’imyaka isaga ibiri inzego zishinzwe umutekano muri Uganda, zifata zikanakorera iyicarubozo Abanyarwanda bakorerayo ingendo, abahatuye n’abashakirayo ubuzima.

Rev Pasiteri Singirankabo Jean de Dieu ari mu Banyarwanda birukanwe muri Uganda, igihugu yari amazemo imyaka 13. Uyu mugabo wabarizwaga muri ADEPR Pentecostal Church International Uganda (PCIU) wakorewe iyicarubozo rikaze kugeza n’aho akubiswe inkoni hejuru y’ubugabo.

Ku wa 12 Kamena 2019, we n’abandi 20 bagejejwe ku mupaka wa Kagitumba birukanwe ku butaka bwa Uganda nyuma y’igihe kirekire bakorerwa iyicarubozo muri za gereza Uganda bashinjwa kuba za maneko z’u Rwanda.

Icyo gihe yagize ati “Turinginga kandi dutabaza, uwagira ubushobozi bwo gutabara uwitwa Umunyarwanda muri kiriya gihugu, yagira icyo akora.’’

Nyuma yo kugaruka mu Rwanda, Pasiteri Singirankabo yihuje n’abandi bantu umunani na bo batoterejwe muri Uganda, bagatandukanywa n’imiryango yabo, batanga ikirego.

Singirankabo uri mu batanze ikirego ku Kimihurura yavuze ko ifungwa rinyuranye n’amategeko riri mu byatumye batanga ikirego.

Yagize ati “Twageze mu Rwanda tubaza uko twakongera gusaba ubutabera, tugahabwa imitungo yacu twambuwe n’indishyi z’akababaro zo gufungwa nabi dutotezwa. Twishyize hamwe turi abantu icyenda, dushaka umwavoka ngo adufashe tuze mu rukiko atwunganire mu mategeko.’’

Abajijwe ku gaciro k’indishyi z’akababaro bari gusaba yavuze ko umwavoka wabo, Butera Emmanuel, ariwe uzabigiramo uruhare.

Ati “Umwunganizi wacu azadufasha, ni we uzi iby’amategeko kuko baduhinduye ibisenzegeri.’’

Pasiteri Singirankabo usengera muri ADEPR Nyakabanda yavuze ko yatakarije imitungo myinshi muri Uganda aho bimwe mu byo yegeranyije bifite agaciro k’arenga ibihumbi $100.

Ati “Nari mfite umuryango udaharanira inyungu witwa Munezero Foundation of Life ufasha abana b’imfubyi batandukanye. Harimo ibikoresho , ibiro, amamodoka n’ibindi. Turi gukora icyegeranyo ngo tuzabashe kwishyurwa kandi abavoka bari kudufasha.’’

Aba Banyarwanda kandi batanze iki kirego ngo abandi Banyarwanda bakiri muri za gereza za Uganda bahabwe ubutabera cyangwa barekurwe.

Rusa Moses w’imyaka 64 yavuze ko yafatiwe mu nzira anafungwa ukwezi n’igice muri Uganda.

Ati “Nafashwe ndi muri Uganda aho nari nagiye gusura abana bigayo n’abavandimwe banjye bariyo.’’

Yakomeje avuga ko “Tubabajwe nuko twarenganye, ntibatujyana mu nkiko. Icya kabiri ni uko hariyo abantu benshi cyane bagifunze, turifuza ko Uganda yabarekura.’’

Rusa yavuze ko azabona ubutabera mu gihe Abanyarwanda bafungiye Uganda bazarekurwa n’abambuwe imitungo, bakanatotezwa bahabwa indishyi y’akababaro.

Abatanze ikirego ni bamwe mu basaga igihumbi bagiye batanga ubuhamya bw’uburyo bakorewe iyicarubozo muri Uganda, bagafungwa ku maherere, bagakorerwa iyicarubozo ndetse bakirukanwa mu gihugu, imitungo yabo igasigarayo.

Guverinoma y’u Rwanda iheruka gusaba Abanyarwanda guhagarika kujya muri Uganda kugeza igihe ikibazo cy’umutekano wabo kizakemukira.

U Rwanda rushinja Uganda ibintu bitatu; ihohoterwa rikorerwa Abanyarwanda; icyuho Uganda iha abarwanya ubutegetsi bw’u Rwanda barimo RNC kandi bagakorana na bamwe mu bayobozi mu gihugu no kuba abacuruzi b’Abanyarwanda muri Uganda, baba abahakorera cyangwa abahanyura bafatirwa ibicuruzwa bikamara amezi.

Muri Kamena 2019 nibwo abandi Banyarwanda batatu barimo umuryango wa Muhawenimana Ezekiel na Dusabimana Espérance na Hakorimana Venant, batanze ikirego ku rukiko rwa EAC barega Uganda kubera ko bafungiweyo mu buryo bunyuranyije n’amategeko.

-  Indi nkuru wasoma: Ubuhamya bw’Umupasiteri wa ADEPR wakubiswe hafi yo kwangirizwa imyanya y’ibanga muri Uganda (Video)

Rev Pasiteri Singirankabo Jean de Dieu wabarizwaga muri ADEPR Pentecostal Church International Uganda (PCIU) yavuze ko iyicarubozo yakorewe ryamusigiye ubumuga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
klololo 2019-08-14 12:22:31

Wowe wiyise Habineza,mujye muvuga ibintu mufitiye amakuru.Ko bafite se deportation order bahaye copie Immigration y’u Rwanda ikindi uvuga nigiki?Mujyaho mugashyiraho comments zidafite icyo zifashije!!!!

2
Dieudonne Hakizayezu 2019-08-14 01:40:25

Me Butare Emmanuel n’avocat w’umuhanga, yatsinze imanza nyinshi ariko uru nguru azarwitondere! Azi bariya 40 baherutse gufatirwa Kampala batararekurwa na n’ubu barabwiye iki inzego z’ubutasi za Uganda gituma banga no gusubizwa mu Rwanda?

3
Et Gang-p 2019-08-13 22:21:09

nibakurikirane iyo mitungo yabo kbx bagume bakorere nubuvugiza abandi banyarwanda bakiri muri Uganda

4
Habineza 2019-08-13 18:00:18

Udafite impapuro wahawe ufungurwa twagereranya na "Billet d’elargissement"Uganda ifite guhakana ko batanabazi kandi niko bizavugwa.Keretse ufite Ordre de Mission ikujyanayo n’umunsi winjiliyeyo ukaba muli Pass.

5
Nahayo 2019-08-13 11:09:12

Azarege na ADEPR ,yanze kumuhemba umushaharawe wamezi menshi uwomwana wumuhungu yarahababariye impande zose

Kwamamaza